استفسار عن عداد كهرباء ممارسة فى شقق حدائق الاهرام

**shndoo** · 24-10-2015 08:14 PM

السلام عليكم

عندى استفسار لشقة في حدائق الاهرام
انا لقيت شقة حلوة و فى مكان كويس بس لما سألت على عداد الكهرباء السمسار قالى عدادها (عداد ممارسة ) و قالى كل العدادات فى حدائق الاهرام كدة ؟
حد عندة فكرة عن الموضوع دا ؟
و قالى العداد هايكون باسمك بس العداد نوعه ممارسة كل 3 شهور ادفع 670 جنيه
انا مش عارف دا عادى و اتوكل على الله
ولا الوضع كدة غلط !!
تنصحونى ب ايه تانى اخلى بالى منه ؟

**khairat hammad** · 24-10-2015 09:45 PM

الوضع دة عادي متقلقش منة خالص
بس المهم الشقة متكنش في دور مخالف يعني خامس دور او سادس دور
لو دور ااقل من كدة لا تقلق كدة كدة هيركب كهربا ولو مركبتش متقلقش كلنا كدة

**shndoo** · 24-10-2015 10:49 PM

شكرآ أستاذ خيرت

**svneleven** · 25-10-2015 04:38 AM

حدايق الاهرام مش كلها كده و لا حاجة. كل الجديد ما فيش عداد عشان مخالف. سواء مخالف دور او ما فيش جراج أو اي مخالفة, المهم دور علي شقة قديمة عمارة فيها جراج هتلاقي عدادات و الدنيا فل. علي فكرة الممارسة ما فيهاش عداد اساسا يعني ما فيش حاجة باسمك. كل ما هنالك سيادتك بتاخد وصلة كهربا من الصاعد أكنك سارق كهربا بالظبط و تروح تدفع غرامة في مباحث الهربا اللي هي ال 670 جتيه اللي قالك عليها و تلزق صورة ايصال الدفع علي الباب عشان اما حد يعدي و ما يلاقيش عداد يعرف انك دافع المخالفة.

**mk3** · 25-10-2015 12:44 PM

مفيش حاجه اسمها عداد ممارسه
دى اسمها محضر سرقه تيار بتدفع الغرامه وتنتفع بالكهرباء
دلوقتى بقت تقريبا 777 كل 3 شهور
وفعلا معظم الحدايق كده الا القديم او بانى حديث ومش مخالف وده صعب او سعر المتر عاااالى ...دلوقتى بقت المحلات تحت العماير من اول يوم بناء..زمان كانت فلل وبتتقلب محلات. فالمخالفات كتير جدا.
الممارسه لها ميزه فى الصيف بتشغل الشقه كلها تكييفات والمبلغ ثابت

**wawamoha** · 25-10-2015 04:44 PM

طب و حضرتك تزنق نفسك ليه ؟؟؟ و تتدبس بعد كده في عماره مخالفه ؟؟؟ و تدفع ليه كل شهر 200 300 ج
يبقى ابني في ايدي و ادور عليه ؟؟؟؟
انصحك تدور عل حاجه مستقره و ف يالسليم زي ما الشباب قالولك ....ماتسمعش كلام الناس النصابة