كار بارك دريفت 2015 والغاء السباق وغضب الجمهور كتب كريم منير
لكل عشاق السيارات اعتقد البوست بالفيديو يهمكم :-)
عن كار بارك دريفت والمتسابقين والجهور الغاضب اتحدث
كتب كريم منير :
اولا انا امتنعت عن اني اعلق او اكتب اي كلمة عن اللي حصل امس في تصفيات سباق ريد بول كار بارك دريفت 2015 عشان ميطلعش التعلق فيه نوع من الغضب ولكن امتلكت اعصابي وهديت وكتبت تاني يوم الغاء الحدث بعد اصدار ادارة السباق انه هايتعمل صباح يوم الثلاثاء
بداية قرار ادارة ريدبول انها تعمل الدريفت بليل ده قرار خاطئ تماما ولم يراعي ظروف كثيرة جدا في مصر
اولا احنا في مصر معندناش شركات تقدر تعمل اضائة محترفة لتراك تخليه ضهر بحيث ان المتسابقين يبقوا شايفين الاقماع كويس جدا ويعرفوا يدخلوا التراك وتحتسب بوينت باحتراف وهو شايف كل التفاصيل زي النهار
خاصة ان الدريفت بيعتمد بشكل كبير على احتكاك الكاوتش بالاسفلت مما ينتج غبار وشبورة دخان عنيفة وده هايصعب عملية المشاهدة والتصوير الى حد كبير جدا وده بحكم اني كان معايا فريق تصوير عملنا حسابنا ومع ذلك كنا متخوفين بشدة بسبب الدخان
ثانيا اداره السباق لم تراعي مكان مخصوص للميديا او الصحافة سواء ديجتال او مرئية ولم تهتم بارسال الدعوات زي كل سنة واخبرونا صراحة انكم هاتقعدو مع الجمهور في المدرجات ؟؟
يعني المفروض ان فريق تصور ونقل للحدث محترف شايل كاميرات وعدسات وتجهيزات يدخل يقعد في وسط مشجعين لنقل الحدث وكمان اي تعليق هاعلقه هايكون طالع كل الاصوات في الخلفية .. قمه اللامبالاة
ثالثا مشهد اعمدة الانارة الموضوع بجانب المدرجات يوحي بكارثة متوقعة لدرجة ان الفوتجرافر بيقولي واحنا داخلين (العامود ده بيتلكك عشان يقع) هو ده الامن والسلامة الي انتوا مهتمين بيهم جدا وبناء عليه لغيتوا السباق عشان شوية هوا !!
ازاي تسمحوا للشركة اللي حضرت للايفنت انها تعرض حياة الجمهور للخطر ده وتسند عامود انارة شايل 4 كشافات كبيرة بشوية شكاير رمل ؟؟؟
هو اللي نظم السباق ده معندوش ولا برنامج من برامج الطقس اللي بتتوقع سرعة الرياح في اي منطقة لغايه 72 ساعه قدام وده اللي بيستخدموه كل اللي بينزلوا سفاري في الصحراء او رحلات الصيد العادية ؟؟
رابعا المدرجات نفسها اللي المفروض يشيل المدرج الواحد 1500 مشجع فعلا وعالواقع متشيلش ولا 500 مشجع حتى مش 1500 !!
ومن اول دخولنا من بوابة الاوتيل لغاية الباركينج مفيش اي تنظيم ولا اي حد يقولنا نعمل ايه
فين الاورجانيزيشن بتوع اليوم انا مشفتش امبارح الا بدي جاردات عشان تطلع الناس من ارض الباركينج والاوتيل واستاذة سلوي الي مكنش عندها خليفةكبيرة باللي بيحصل ؟
ليه مفيش اي خدمات معاونة سواء جوة او برة ؟ وليه التصميم علي المكان ده ؟ ده اوتيل ليه متعملش فى ارض الاستاد او ارض القرية الذكية ودول كانوا افضل بكتير من المكان ده
مفيش تنظيم لاماكن وجبات او مشروبات وعشان اشرب فنجان سبريسو ادخل الوتيل اطلب من اللوبي ؟؟؟
السادة اداره الريد بول وادارة الاتحاد المصري للسيارات
جمهور وعشاق السيارات في مصر جمهور واعي ومتحضر ومن ارقى الجماهير اللي عارفين بيعملوا ايه وبيشجعوا مين ورغم انها رياضة مكلفة بشدة الا انه بيتكلف صعاب كتير عشان يستمتع بالرياضة والمتسابقين
الجمهور الي انتم استهنتم بيه سنة ورا التانية ومحدش نسي ابدا مهزله سباق بورتو السخنة والتراك المقسوم علي مرحلتين ضد اي قواعد فنية للتصوير والمتابعة واللي هايقعد في مدرج هايشوف نص التراك فقط والجمهور طلع قعد فوق الجبل في التراب والشمس العنيفة لمتابعة السباق وكادت ان تحصل كوارث لولا ستر ربنا وواضح انكم كل ما تتعنتوا مع الجمهور ويرضى بتزيدوا فيها
الجمهور اللي عشان يجيب تكت السنادي نزل من المحافظات لغاية القاهرة ويشتري ويرجع وينزل تاني يوم السباق في ميعاد غير مناسب تمام لاقامة السباق الساعه 6 مساء وكاننت الحجة عشان يكون الجو بارد شوية عشان الحرارة بتتعب مواتير السيارات ورغم انه مبرر غير مقتنع ولما الجو اتعدل وقامت شوية تراب لغيتوا السباق رغم ان الجو اتعدل تماما قبل الساعه 5
ليه مفيش حجز اونلاين تكت واللي ميعرفش يجيبها اونلاين يقدر يشتريها من اون ذا ران
من فضلكم لو انتم مش قد تنظيم السباق شوفوا شركا اجنبيا محترما تيجي تنظم السباق وحطوا التكلفة علي الرعاة اللي بيستفيدوا بشدة من التسويق لمنتجاتهم ولما يكون الحدث محترم وكبير وتنظيم كبير هاتلاقوا رعاة كتير جدا تغطي تكاليف الحدث وبربح كبير
وماتش الاهلي والزمالك علي كاس السوبرفي دولة الامارات كان خير مثال
من فضلكم احترموا جمهور الرياضة شوية
اما قرار ان السباق يتعمل يوم الثلاثاء في وسط الاسبوع ولا كأن الجمهور ده عنده شغل او دراسة فهو قرار في قمه التخبط
كان ممكن يتعمل تاني يوم فورا او يتأجل للجمعة اللي بعدها
انا عارف كويس ان سباق دبي كمان 3 اسابيع لكن رياضة بدون جمهور هي رياضة فاشلة بكل المقاييس الا لو كان قصدكم هو تقليل الجمهور للحد الادنى عشان محدش يحضر
ورسالتي لكل المتسابقين اللي اكتر من 70 % منهم اصدقاء شخصيين سواء اللي اتاهلو للتصفيه او اللي خرجو من التصفيات
احنا بنحبكم ونحترمكم وهانشجعكم ونقف وراكم لحد اخر نفس فينا وعارفين قد ايه مقدار التعب والسهر والتكاليف اللي شوفتوها الشهور اللي فاتت واللي عقود الرعاة مبتغطيش نصها حتى وبتصرفوا من جيبكم كتير
لكن كلمة واحدة بس هاقولهالكم
احترامكم لجمهوركم ووقفته معاكم هو اكبر دافع انكم تكملوا
محدش شاف منكم الافات السيارت على طريق السويس امس بعد قرار الاغاء ومحدش شاف خيبة الامل والزعل وقد ايه كان نفسهم يتمتعوا ويشجعوا ويشوف ابطالهم الحقيقين عالطبيعة
عمر ما كانت ال 100 جنيه بتاعت التكت الي مزعلاهم
الجمهور ده صرف كتير وجهز نفسه وفضى يومه عشان يجي يقضي اليوم معاكم كابطال ليه
كان فيه جمهور جاي من اسكندرية ومحافظات الصعيد وقاطعين اكتر من 500 كم جاي وزيهم راجع عشان يشوفوكم ويستمتعوا بادائكم
من فضلكم حتى لو هاتكملوا التصفية وتدخلوا السباق يوم التلات
لازم لازم يكون ليكم وقفا جادة وقوية وحازمة مع الاتحاد ومع ادارة الريد بول
انا اتكلمت مع كابتن عبده فغالي امبارح وكان في قمه الاستياء من قرار الالغاء وازاي ضاضو يقول انه مستاء وازاي ادارة الريد بول تقول ان الالغاء تم عشان دوافع امنية وشوية هواء وقعو كريين اضائه ؟؟؟
في انتظر تدخلكم يا ابطال رياضة السيارت في مصر
عن كل الجمهور اللي واقف وراكم يشجعكم لحد دبي باذن الله
لكن لحد السفر لدبى وبالنسبة ليوم الثلاثاء اتمني من اللي فاضي يروح يشجع ويقف وراهم احنا بنحبهم وبنحب رياضة السيارات في مصر وواقفين وراهم لغاية الاخر
كريم منير
واحد من عشاق السيارات في مصر
قبل ما كون مؤسس مواقع ومنتديات نايل موتورز
اكبر محتوى عن السيارات في اللغة العربية واكبر مرجع مكتوب لكل عشاق السيارات في الوطن العربي
ملحوظه :
تضامنا مع غضب الجمهور قررت ادارة نايل موتورز عدم تغطية الحدث يوم الثلاثاء ردا على قرار الالغاء والاستهتار بالجمهور من قبل ادارة ريد بول وحتى اشعار اخر ولكن هانفضل نتابع الحدث
لينك لفيديو انترفيو كريم منير ونايل موتورز مع متسابقين وجمهور كار بارك دريفت 2015 وانطباعهم عن قرار الالغاء والتوقعات المرتقبه
https://youtu.be/yTPqx_mNDeo
#CPD
#Ramy_Serry
#Hossam_Soliman
#Haitham_Samir
#Moaatz_Atef
#Ahmed_Tarek
#Karim_Monir
#Nile_Motors