كان نفسي اتخانق معاهم !!!!

**نور القمر** · 22-11-2008 12:07 AM

النهاردة كنت في واقفة في الشارع مستنية واحدة صاحبتي
لقيت طفلين بنت حوالي 4 سنين وولد حوالي 5 سنين بيعدوشارع اتجاهين هم الاتنين جري من غير ما يبصو شمال ولا يمين
والله البنت عربيه فرملت فجأة على بعد ربع مترمنها ثواني وعربية تانية اتكرر معاها نفس الموقف
كنت مستنية توصلي واقولهم ماشين في الشارع لوحدكم ليه
اتاري البيه باباهم كان واقف جنبي وعدى الاول ووقف تاكسي ومستنيهم يعدو لوحدهم يركبو
وهو ولا واخد بالو من كل اللي حصل
لسه هقوله على اللي حصل
لقيت الهانم مامتهم وراهم عدت معاها بيبي شيلاه وولد تاني 7 سنين تقريبا
الولد ركب التاكسي بعد اخواته
الهانم مامتهم مش لاقيه مكان
شدت الولد 7 سنين من هدومه كفته على الارض وقالت له اركب قدام مع ابوك
طبعا البيه باباهم ركب وقفل الباب ولا هو هنا بكل ده
الولد صعب عليا اوي .. قام نفض هدومه وزنق نفسه جنب الهانم ماما
الموضوع كله مخدتش دقيقتين بس والله كنت متغاظة نفسي اتخانق مع الهانم والبيه
معرفش دول مخلفين ليه .. ايه الاهمال ده والقسوة والعنف ده .. ايه الناس المستفذة دي

**aboelnagah** · 22-11-2008 12:20 AM

يانهار ابيض دول ناس معندهمش اى حاجة من الاحمر

**night_whisper** · 22-11-2008 12:20 AM

يا حول الله يا رب
ناس مش حاسة بالنعمة اللى ربنا مدية ليهم
موقف يغيظ و يفور الدم
الأولاد دول أمانة فى رقبتهم

**MoToRiZeR** · 22-11-2008 12:25 AM

المشكلة إن فيه ناس كتير جداَ بتتجوز من أجل الجواز فقط لا غير
و بتخلف عشان كل الناس المفروض تخلف

فا لا بتبقي طايقة شريك حياتها ولا عيالها ولا عيشتها و ضيف علي كل ده الظروف الإقتصادية الصعبة و ظروف البلد المهببة و الإحباط اللي من كل ناحية .

فا بتبقي النهاية كارثة .

حد شاف فيلم قص و لزق ؟ انا عاجبني شخصية حنان مطاوع فيه لأنها واقعية أوي (اللي هي كانت بتضرب ولادها بهيستيرية) .. و السبب إنها مكبوتة لأن جوزها مسافر بقاله سنين .

انا خايف من الجيل اللي جي .. يا هيطلع كله بلطجية يا ثوار علي كل الغلط اللي إحنا عايشينه .

welcome to the jungle

**Hany A Fattah** · 22-11-2008 12:41 AM

انا لو مكانك كنت نزلت ضربتهم فعلا

**Samir Elshahawy** · 22-11-2008 01:07 AM

حاجة غريبة فعلا أمهات اخر زمن

نفس الموقف حصل معايا من فترة في مدينة نصر كنت ماشي بالعربية في شارع جانبي ضيق و طبعا كنت علي الثاني علشان بعمل حساب المفاجأت , المهم لاقيت قدامي سيدة شكلها محترم ماشية علي الجانب الايسر و فيه بنت صغيرة - 6 سنوات - ماشية علي الجانب الاخر

معرفش ليه حسيت بخطر و هديت و اديت كلاكس علشان انبههم اني جاي , و فعلا البنت الصغيرة ارتبكت و بقت مش عارفة تعمل ايه و الاغرب امها اللي ندهت عليها !!

امها بتنده عليها علشان تعدي و تجيلها من امام العربية مش الام هي اللي راحت تمسك بنتها !!

بصراحة وقفت لحد ما الموقف اتحل و البنت بقت في ايد امها و اول ما عديت جنبها بستفتها علي الاهمال ده و هي و لا هي هنا !!!

الناس بقي عندها لامبالاة و بله غير عاديين مش عارف ليه

SS · 22-11-2008 01:21 AM

المشاركة الأصلية كتبت بواسطة نور القمر

والله لولا الموضوع كانت احداثه سريعه وركبوا التاكسي واتحرك بيهم بسرعه كنت اتخانقت

ما هى المشكلة ان الواحد بيخاف يتدخل ...خوفا من ان الاهالى الافاضل ...يطلعوا اللى اتعمل فيهم فى عيالهم بعد ما يروحوا

اما الحركة بقى اللى بتستفزنى اوى...الناس اللى بتبقى ساحبة عيالها فى ايديها وماشية وسط العربيات ..او بتعدى بيهم الشارع..المنطق بيقول انهم يبقوا فى الجهة اللى العربيات ماشية فيها...و العيال الصغيرة بعيد عن العربيات...لكن اللى بيحصل العكس تلاقيهم مصدرين العيال للعربيات و هما بيرغوا و لا بيبصوا ع اى حاجة ...و العيال سارحة ف دنيا لوحديها يتنطط يلوش بايده ناحية العربيات..و كان الناس ديه لسان حالها بيقول ...يلا السكة اللى تودى بناقص واحد...صراحة بيبقى نفسى ساعتها يكونوا ماشيين من غير ولادهم عشان يتخبطوا هما و نخلص.

**bee** · 22-11-2008 01:27 AM

الانسان مش بيحس بقيمة النعمة الا لما بتزول
وعشان كده المفروض نحمد ربنا دايماً ونراعي النعمة الي مديهالنا

حسبي الله ونعم الوكيل فعلا موقف مقرف

**نور القمر** · 22-11-2008 01:36 AM

المشاركة الأصلية كتبت بواسطة SE_coralsea

بصراحة وقفت لحد ما الموقف اتحل و البنت بقت في ايد امها و اول ما عديت جنبها بستفتها علي الاهمال ده و هي و لا هي هنا !!!

الناس بقي عندها لامبالاة و بله غير عاديين مش عارف ليه

مرة كنت سايقه في شارع ضيق وفجأه لقيت هانم معاها بيبي في عربيه الاطفال .. نزلت عربيه البيبي من الرصيف فجأه قدامي
الحمد لله ديما هادية في الاماكن اللي فيها مشاه كتير
المهم فرملت بسرعه واديتها كلاكس جامد (يعني تفهم منه اني مستاءة منها)
والهانم مش عاجبها الكلاكس وعلقت بساخفة وتقولي انتي فاكرة نفسك راكبه المرسيدس
قمت بأه لاول مرة ابستف حد في الشارع واتكتمت على طول
مش مقدرة ان لولا ستر ربنا كان البيبي اتأذى