شاب 21 سنة رايكم في الزواج من اجنبية و الهجرة - القصة كاملة

**mmm81254** · 26-10-2015 01:09 AM

السلام عليكم

انا شفت المنتدي بالصدفة و يعني شايف فيه ناس كبيرة عاقلة ف حابب اعرض كلام جوايا و منكم نستفيد

انا شاب 21 سنة من اسرة متوسطة من وسط القاهرة .. لسة متخرج حاليا من كلية سياحة و فنادق ارشاد انجلش حلوان بتقدير امتياز مع مرتبة الشرف
بشتغل من اولي ثانوي و محطتش ف دماغي تعليم مصري جامد لانه ملوش فايدة بس دخلت برضه الكلية اللي حاببها لاني ليا حلم ابقي مرشد سياحي و بشتغل الفترة دي مرشد سياحي ع خفيف خالص .. السياحة فكسانة هنا حاليا

بشتغل ف التجارة الالكترونية من اولي ثانوي و بدون تفاصيل عملت منها فلوس كويسة و بصرف علي نفسي و بجيب كل حاجة ليا و كمان اشتريت شقة ب 220 الف ف مدينة الشروق من سنتين و حاليا تمنها 400 الف .. شغلي كان مع اجانب برضه و قصة كبيرة جدا بس انا جايب الملخص

كل ما اتمناه في حياتي هو الهجرة يعني مش شايف هنا اي مستقبل و لا شايف حياة و لا شايف اي الوان ليها ... مستعد اضحي باي شئ .. ايا كان من اجل الهجرة

مش حلمي اتجوز واحدة تعملي محشي و كشري و بتنجان و اقعد اخلف عيال يدعوا عليا اني خلفتهم ف البلد دي ... ادامي بنات دكاترة و مهندسات و قمرات و جملات و كل الكلام ده ... بس ده مش عاوزه

نفسي احس اني انسان و اعيش ف اي بلد ان شاله اشتغل زبال فيها و اخد اقل مرتب بس احس اني انسان و اتقدر ... عرفت كل انظمة الهجرة و هي ف منتهي الصعوبة مش ماديا بس للطلبات اللي طالبينها

انا حاليا داخل اهه الجيش و بتهان كل يوم زي ما بتهان من اول ما اتولدت هنا

هستغل شهادتي و هروح شرم اشتغل و اتزوج من اجنبية .. اعرف 10 غيري عملوا كدا و شهادتهم من اول هندسة لحد دبلوم .. لغتي كويسة و بطور فيها

ارائكم و خبراتكم ... و عارف ان فيه ناس هتشتم و هتدعي ... بس مش مهم احنا كدا كدا متهانين

**kazamodia** · 26-10-2015 02:38 AM

القرار له مميزات وعيوب لكن طبعا الهجرة كلها مميزات كفاية انك تضمن مستقبل افضل

**4fun14** · 26-10-2015 08:37 AM

معاك فى الهجرة لكن مش معاك فى الزواج من اجنبية..انت من كلامك واضح انك ذكى ومجتهد مش مضطر تلجأ للاساليب دى..
الاجنبية عموما مش مناسبة خالص للمصرى بالاضافه ان فكرة الجواز لمجرد الجنسية فكره انانية مادية جدا
وكمان مش بيدوا الجنسية بمجرد انك تتجوز معظم البلاد بتشترط انك تفضل متجوزها 3-5سنين ويتأكدوا انك بتبات معاها والدنيا ماشية عشان عارفين حوارات الجواز من اجل الجنسية دى

**volociximab** · 26-10-2015 10:11 AM

فكرة سيئة لسبب--الست مش مجرد واحدة معاك-دى مؤتمنة على شرفك و ممكن تحط راسك فى التراب
ده غير انك لو انجبت منها تبقى المشكلة مضاعفة

**melouk1** · 26-10-2015 12:34 PM

أحسن فكرة صح جاتلك من يوم ماتولدت إنك تسيب مصر
و أسوأ فكرة جاتلك برده من يوم متولدت إنك تتجوز بالطريقة دي
لو هنصحك زي أخ كبير .. إهررررب من البلد إطلع بره هجرة
قدم في كل السفارات المتاحة و حاول بشتى الطرق تطلع
ولما تطلع وتستقر إتجوز من هناك و تكون أسرة لطيفة ، بس أنصحك تبقى من ديانتك فقط لا غير مش مهم عربيه ولا غيرها..

**hilal** · 26-10-2015 12:41 PM

نصيحة مخلصة لله
أرى فيك شابا ذكيا وطموحا وناجحا
واتوقع لك مستقبلا رفيعا داخل بلدك ان شاء الله
الغرب له مميزاته وعيوبه ايضا فلا تفكر في هذا الموضوع مطلقا وعش وسط اهلك واحبابك

**ALYSALIM** · 26-10-2015 12:49 PM

اهرب من مصر بسرعة باي طريقة مضمونة وباقل تكلفة ممكنة
لو صحابك اللي اتجوزو كان سهل عليهم الهجره اعمل زيهم
متضيعش وقتك في مصر
انت لسه صغير
فكرتك عن الجواز من مصرية والعيشه في مصر وتاديتك للخدمه العسكرية غلط
بس دي مش مشكلتنا دلوقتي
اهرب وانت لسه صغير يااما افكارك هتقتلك وانت وبتكبر

**hugan** · 26-10-2015 12:56 PM

لي راءي مخالف
لو تقدر تشتغل هنا شغل يوفر لك حياه كريمه بجد
ماتهاجرش
وبفلوسك هنا مش هاتحس بفرق جامد
انا ضد الزواج من اجنبيه لتكوين اسره
ممكن تتجوزها علي سبيل المتعه والتغيير
بدون إنجاب
عقلي ﻻ يتقبل نهائي اخلف اوﻻد ممكن دينهم يتغيير
او يعيشوا حياه فيها انحراف او حريه جنسيه
ولو رافض الحياه هنا ومصمم علي الهجره
يبقي تتجوز مصريه او عربيه
وتعيش معاك هناك

**ahmed.awaad** · 26-10-2015 07:20 PM

فيه حل تاني غير الجواز وهو إنك تقدم على منحة دراسية وتكمل حياتك في الدولة اللي انت هتروحها

ده بوست على الفيس بوك لشاب مصري حصل على منحة دكتوراه في اليابان
https://www.facebook.com/Eng.mohamed...03798779646743

وتقدر تبعتله على الفيس رسائل وتقرأ بوستاته لأنها مفيدة جدا وهو عنده خبرة كبيرة في المنح وطريقة الحصول عليها في المجال اللي انت عاوزه
ده بالنسبة لسؤالك

بس ممكن سؤال إنت كسبت من التجارة الإلكترونية إزاي المبالغ دي (يا ريت لو تبعت عىلى الخاص التفاصيل لأن فيه شباب كتير أعرفهم عاوزين يعملوا الفكرة دي )