عيوب ومميزات 406 مع فورد فوكس 2008-2010

بفكر فى ال 406 او الفورد فوكس
مميزات ال 406 (كمالياتها)
كنت عايز أعرف قطع الغيار متوفرة سواء جديد او استيراد ؟
اعطالها إيه واذا كان فيه مشاكل؟
موضوع الفتيس هل إتحل فى موديل 2005 الى 2006؟
العربية من فرنسا وﻻ نقفيل مصرى ؟
هل فعلا العربية دى كانت ب 220 الف جنيه لما كانت زيرو ؟
انا سمعت عن حاجة إسمها المكنة السودا والبيضاء ..إيه الفرق؟
رينج اﻷسعار من كام الى كام .وهل الواحد ممكن يﻻقى حاجة نظيفة من غير ما شيد وﻻ إيه؟
تنصحونى بإيه مع العلم العربية اللى معايا كويسة جدا بس عايز اطلع فى الموديل واركب حديث... ومعليش طولت وشاكر جدا لكل اللى حيساعدنى

وبجد أيهما أفضل ؟؟

أهلا أستاذ محمد صلاح

:welcome1:

أنا لسا مجاوبك من شوية على الفيس.....شفت عرفتك ازاى !!


" الفورد كانت مع زميلى فى الشغل موديل 2006......قطع غيار كارثة بالنسبة للفئة بتاعتها....و قليل اوى المحلات بتاعتها مقارنة بالبيجو او غير البيجو و الاستيراد مش كتير مقارنة بالبيجو و غير البيجو ...بس كموتور حاجة محترمة جدا و الفتيس معاه كان كويس...باعها علشان واطية و بتحك فى المطبات خصوصا لما بيروح بلدهم "

ااااه المقارنه ديه في الجووون

اقتباس:

---

المشاركة الأصلية كتبت بواسطة far!d

ااااه المقارنه ديه في الجووون

---

بيجو 406....فورد فوكاس 2008

الموتور : 2000 سى سى - 1600 سى سى--------بيجو
الفتيس:مشاكل فى الفتيس-كويس----------------فورد
السعة الداخلية : واسعة جدا-واسعة---------------بيجو
الشكل الخارجى : أذواق بس انا شايف البيجو احلى---- مصممها هو مصمم فيرارى-----بيجو

قطع الغيار:غالية شوية-غالية جدا------------بيجو
زيت فتيس مثلا بيجو 450 - فورد 1200 جنيه...مارش بيجو 900..مارش فورد 1200....طلبمة بنزين فورد او مياه مش فاكر 2800 جنيه

إعادة بيع : تقيلة و اللقط بتتلقط-----تقيلة جدا جدا---------بيجو
ورش صيانة متخصصة : كتير- نادرة-----------بيجو
محلات قطع الغيار : كتير - نادرة--------بيجو
استهلاك بنزين : متقارب !!! (لاحظ البيجو مكنة 2000)
كماليات و وسائل أمان: الاتنين مليانين و البيجو اعلى سنة
خامات : الاتنين على جودة عالية و البيجو اعلى سنة
المتانة : الاتنين تمام
المعالجة ضد الصدأ : مش عارف فى الفورد بس كبوت البيجو كان فيه حتة مقشرة(كرتونة سيراميك وقعت عليه) قعدت سنة من غير تمليح صدأ حتى
الارتفاع عن الارض : البيجو
الثبات : الاتنين تمام
الضريبة : متوسط 600 جنيه فى السنة - متوسط 300 جنيه فى السنة------فورد
التكييف : تلاجة - عادى-------بيجو

العربية تقفيل وجيه اباظة و فى حاجت نادرة فرنساوى و تقفيل وجيه كويس و سعرها من 10 سنين بتمن كورولا او اوكتافيا او فوكس او سيفيك موديل 2015 و اركب اى واحدة من دول و احكم :)

قفشتنى إنت يا باشا ..هنا وهناك ....
أصل بصراحة أنا حموت عليهل وكل صحابي بيقولوا بلاش ... والتانى عمال يقولى فورد ..

لكن الحمد لله أنا كده إستقريت على ال 406 .. وحقنع الوالد علشان يتكرم وبتعاون في الشراء ..

ربنا يسهل و الواحد يلاقى حاجة نظيفة ... أ.أحمد مكن رقم تليفونك علشان أسألك على كام حاجة

اقتباس:

---

المشاركة الأصلية كتبت بواسطة Unknown_84

قفشتنى إنت يا باشا ..هنا وهناك ....
أصل بصراحة أنا حموت عليهل وكل صحابي بيقولوا بلاش ... والتانى عمال يقولى فورد ..

لكن الحمد لله أنا كده إستقريت على ال 406 .. وحقنع الوالد علشان يتكرم وبتعاون في الشراء ..

ربنا يسهل و الواحد يلاقى حاجة نظيفة ... أ.أحمد مكن رقم تليفونك علشان أسألك على كام حاجة

---

هبعتهولك على الخاص

بص يا معلم، انا راكب فوكس 2009 جيا (فتحة سقف) الشكل و التابلوه المعدل، و كنت ناوي علي 406 زمان و حاليا بفكر اجيبها جنب الفوكس.

بشكل عام قطع غيار الفوكس ممكن تكون اقل شوية من البيجو و اغلي، بس في متوسط سعر الاوكتافيات و الجيتا. ليها صناعية متخصصين و معروف سكتهم و نفس الكلام في محلات قطع الغيار، و عموما ليها جروب علي الفيس و جروب نشيط جدا علي الواتس.

التقييم باه، انا قبل الفوكاس ركبت النترا 2005 و عربيتين بورا و اوبترا و قبليهم ركبت اكسيل و اكسنت و سبكترا، اهم حاجة في الفوكاس انك تجبها من حد مهتم بيها و بحالة كويسة، و ساعتها هتظبطك، العربية ملاكها بيعزوها جدا، اكتر عربية حبيتها و الوحيدة الكسرت السنه معايا و داخلة علي سنتين ان شاء الله، عمرها ما قلت معايا الحمد لله ولا عطلت، اعتماديه عالية جدا ما شاء الله. ماشي بيها 50 الف ك و داخل علي ال 130000 الف ك اهو. مصرفتش غير صيانات و عفشة.

مميزات، اعتمادية و ثبات و رفاهية و امان و اوبشنز و خامات اعلي من ال 406 للعلم. و عالية عن ااارض.

عيوبها، ثقيلة علي ماتورها، جابت مع ناس طلمبة بنزين و كانت بتتغير ب 3000 ج، بس دلوقتي ليها حلول باستخدام قلب طرمبة المازدا 3. لازم تعرف سككها من صناعية و محلات قطع الغيار عشان تسلك فيها، في الغالب مش هتحتاج تنزل منها الا علي الماني عالي و ده موقفي دلوقتي.