لكل مستخدمى موبينيل يو اس بى مودم - خلى بالك احنا بنتسرق

**mmtronic** · 27-10-2015 10:17 PM

انا معنديش dsl فى البيت من زمان لعدة اسباب ( مش موضوعنا دلوقتى ) - فكان الحل امامى انى استخدم انترنت usb - جربت الشركات الثلاثه و استقريت على موبينيل لسرعتها المعقوله

المهم بداءت استخدمه من 3 سنين و كنت مشترك فى باقه3 جيجا للاى باد و باقه 15 جيجا فى يو اس بى مودم موصله على رواتر ًwifi / 3g و كانت بتكفينى انا و اسرتى الصغيرة ( زوجه و طفل ) الى اخر الشهر ( يعنى 15 جيجا فى شهر ) و كنت مبسوط و اهه ماشيه و كنت بدفع 300 جنيه فى الشهر و احيانا 400 جنيه لما الباقه بتخلص و بسحب زيادة لان الخط مفتوح مش كونترول

خد بالك الكلام دة لمدة 3 سنين متغيرش

من 3 شهور رصدت الاتى

1- فاتورة يوليو 1300 جنيه - يا نها اسود - ايه دة - عملت شكوى - قالولى استهلاكك خلص الباقه و استهلكت زيادة و الفاتورة سليمه
قولك اكيد انا استهبلت - طيب ادفع

2- فاتورة اغسطس 2100 جنيه - يا نهار مدوحس - هوة فيه ايه يا جدعان - قولت اكيد فيه حاجه غلط - عملت شكوى تانيه و قولتلهم ازاى فهمونى - تسمع كلام من ناس غايبه عن الوعى

طيب ما انا ماشى 3 سنين معاكم من غير مشاكل - ايه الى جد

المهم قولت اكيد الخطوط دى حصل فيها مشكله و همه مش عارفين يصلحوها

عملت الاتى

دفعت طبعا - و لغيت الخطوط دى تماما و اشتريت خطين انترنت جداد كل واحد 15 جيجا بس كونترول يعنى تخلص الباقه يطلعلى لسانه و يقولى بح - يعنى بقيت بستخدم 30 جيجا فى الشهر - اهه قولت بقى علشان محدش يضحك عليا و اهه 30 جيجل حتغطينى تالت و متلت

اليكم النتيجه

بعد مراقبه الاستهلاك و مراقبه ابنى و مراتى ( خلونى شكيت فى نفسى ) و مراقبه الراوترات ( قولت يمكن حد عرف الباسوورد و بيقلبنى )

بعد دة كله و على مدار شهرين براقب

ال 15 جيجا بقت بتقعد 10 ايام و تطلعلى لسانها

معايا خط تبع شغلى 6 جيجا - ركبته فى الراوتر يوم 22 اكتوبر و طلعلى لسانه يوم 27 اكتوبر - ينى 6 جيجا فى 5 ايام

بصراحه انا لو كنت مستخدم جديد كنت شربتها - بس الى كشفهم انى معاهم بقالى اكتر من 3 سنين

من الواضح جدا انا الشركه دى ابتدت تتحول الى سرقه و تقليب العميل فى باقات الانترنت و دى الخلاصه

هذا للعلم علشان محدش يتنصب عليه و يتقلب زى

و حسب الله و نعم الوكيل

انا الاسبوع دة حقدم على تليفون علشان اقدر ادخل dsl و الغى الخطوط دى تماما

**homme49** · 27-10-2015 10:36 PM

فى كل الشركات و كذلك تى إى داتا - الأنترنت المحدود أو الكوتا هى الباب الخلفى لسرقة العميل

**7oda** · 27-10-2015 10:40 PM

2 Excellent Software to Monitor Internet Usage in Windows

5 Free Windows Programs To Monitor Your Internet Usage - Hongkiat

**mmtronic** · 27-10-2015 10:41 PM

بس بالفجر دة
انا مشفتش كده
حسبى الله و نعم الوكيل

**ahmedk7** · 28-10-2015 12:00 AM

الكلام ده معروف من زمان

عشان كده كل الناس بتشترك dsl

الا لو خطك مينفعش عليه عشان ده للضرورة بس .

الموبايل و انت برا البيت و طبعا مش استعمال فيديو بيخلص الرصيد

البيت احسن يكون unlimited دلوقتى كل حاجة بتأخد استهلاك جامد و لو محدود يبقى ابو 150 او 200 جيجا

**kazamodia** · 28-10-2015 02:13 AM

ممكن بيحسبوا الاستهلاك بالميجابايت مش بالكيلوبايت بس عموما موبينيل وحشة جدا في النت

**DreAmO** · 28-10-2015 08:16 AM

في مرة اكتشفت اني اتكلمت 1 دقيقة بالضبط .. وجاتلي الرساله بعد المكالمه بتاعة الرصيد
اني اتكلمت ب 18 قرش .. والدقيقة عندي على نظام " روقانجي " ب 14 قرش
يعني اتحسب 2 دقيقة + ان في قرش بتاع رسالة الرصيد بعد كل مكالمة ماتخصمش

يعني المفروض الصح كان انا اتكلمت دقيقة ب 14 قرش + 1 قرش خدمة الرسالة = 15 قرش
ولو دقيقتين يبقى 18 قرش + 1 قرش = 19 قرش

طبعاً كدة في خطأ اكيد في السيستم وطريقة الحساب ( يعني يمين شمال في خطأ )

اتصلت بيهم وغرمت ال 50 قرش حق المكالمة لخدمة العملاء .. وانتظرت وانتظرت وانتظرت

وعملولي شكوى .. وكان الرد بعد يومين كالأتي :

حضرتك اتكلمت دقيقة وثانيتين وليس دقيقة .. وحسابهم 18 قرش مفيش أي خطأ
واحنا التوقيت عندنا مضبوط وبيشرف عليه جهاز تنظيم الإتصالات الخ الخ
وسبب ظهور التوقيت على تليفونك 1 دقيقة .. هو ان التوقيت في تليفونك غير منضبط

( مع العلم ان صدفة مكاملة تبقى 1 دقيقة دي حصلتلي كتير وبتتحسب بسعر مكالمة على نفس التليفون )

اما موضوع القرش اللي ماتخصمش مقابل خدمة الرسالة اللي بتيجي بعد كل مكالمة توضح الرصيد

فدي يا فندم خطأ في السيستم عندنا وتم إصلاحه بعد شكوى حضرتك .. وهيتم خصم القرش كالمعتاد

شوفت البجاحه والإستفزاز والبرود والنصب عالمكشوف

يعني الدقيقة عندهم مخرفة وبتزود ثانيتين عالمكالمة .. ويقولك دة من تليفونك وسيستمنا تمام التمام

لكن القرش اللي ماتخصمش منك .. ده خطأ من السيستم عندنا وشكراً انك نبهتنا وطبعاً هيتم خصمه من حضرتك

ولا قالي طيب احنا هنديك كارت ب 10 هدية .. ولا حتى حق المكالمة دي علينا .. ولا اي بتنجان

كنت بتصل واغرم لخدمتهم مش خدمتي .

اما بخصوص النت .. عندي قصة له هو كمان .

**DreAmO** · 28-10-2015 08:29 AM

عايز اقولك نصيحة بخصوص التليفون الثابت

اشتري دماغك واتصل ب 111 .. واطلب التليفون دليفري
الخدمة دي بتوفرلك التعاقد والتركيب في نفس الوقت في منزلك ( انت مش بتروح السنترال خالص )
وبتوفرلك رقم مميز للتليفون + الخط ارضي وليس هوائي + اول 3 شهور مجاني بدون اشتراك + مش عارف اد ايه مكالمات مجانية + التعاقد والتركيب خلال 3 ايام

يعني الراجل بيجيلك البيت بعد اتصال على موبايلك لتحديد المعاد واختيار رقم التليفون معاه استمارات التعاقد
ومعاه فني التركيب .

كل دة مقابل 150 جنيه لخدمة الدليفري + مصاريف تركيب الخط العادية اللي هي 50 جنيه تقريباً .

خلي بالك : تستلم عقدك والركيب كله مع بعضه

علشان سعات تلاقيه من غير الفني ويقولك هيجيلك بعد شوية ولا بكرة وتفضل تدور عليه

وتستلم العقد وكل حاجة وهو عندك .. مايقولكش العقد بس هاخده امضيه من استاذة سعاد واجيبه لحضرتك
مش هيجيلك .. وهتشتكي يقولولك العقد في السنترال روح استلمه .

أفتكر انك دافع 150 جنيه مقابل انك مش عايز تروح السنترال ولا تشوف منظره + باقي المميزات .