تقرير مفصل عن الألفا روميو ميتو
بسم الله الرحمن الرحيم
وبعد طول بحث ومقارنات في السوق المصري بداية من اللوجان مرورا بكيا ريو هاتشباك وفورد فيستا وغيرها
الحمد لله اشتريت ميتو من حوالي شهر وده انطباعي عنها
العيوب.
أول حاجة ودي اكتر عيب شايفه فيها بشكل خاص وعام عن الألفا روميو أن المعلومات عنها في مصر ضعيفة جدا
لما كنت بدور عن معلومات عنها في النت صحرا ودي حاجة تخوف من الأول من جهة استخدامها صيانتها قطع غيار.
ثانيا العربية تلاتة باب فكدة دخول وخروج للكرسي الخلفي غلس بالرغم من أنه مريح وواسع في القعدة.
ثالثا مافيش مسند بين الكرسيين والشباك عالي نسبيا وانت سايق.
الفئة اللي انا جيبها مافيهاش سنسور خلفي.
العربية واطية من قدام ومع أي مطب من مطبات المحروسة لازم تحف مع أن علوها بشكل عام معقول.
أول ماجت كان الولاعة مش شغالة ولما رحت التوكيل كانوا عايزين ادفع تمنها عشان الضمان مابيغطيش الحجات دي وانا رفضت طبعاً وفي الآخر صلحوه على حسابهم.
الباور معقول بس مقارنة بالفلونس أنعم شوية
باور الفلونس من انعم اذا ماكنتش أنعم باور في مصر.
المميزات
انسا دلوقتي انها ألفا روميو وهتكلم عن إمكانيات العربية.
الماتور1400 تيربو 135 حصان على عربية وزنها خفيف ويقبل 92 عادي.
جنوط 16.
تكييف أوتوماتيكي.
سبعة ايرباج abs وكل مواصفات الأمان الأوربية.
وطبعاً العربية ايطالي.
العربية لحد دلوقتي مواصفاتها مناسبة جدا لسعرها وفوق ده كله ألفا روميو.
روح الالفا روميو اللي كنت بسمع عنها من برامج زي top gear ماكنتش بفهماها بس بجد ليها روح.
في نظام في القيادة اسمه dna.
D دينامك
N natural
A all weather
N بيخلي العربية ناعمة وسلسة في القيادة a المفروض للمطرة والتلج.
نيجي لا D. العربية بتتحول.
لباور بيتقل صوت الماتور بيعلا واستجابة دواسة البنزين دقيق جداً.
العربية من 0 100 خلال 8.4 ثوان السرعة القصوى 215.
العربية ثابتة على سرعة 200 وتبدأ تتهز شوية فوق كدة.
تجربة القيادة باستخدام ناقل الحركة اللي في الدركسيون doupl clutch gear خيالي وممتع.
وفي الآخر انا شايف ان العربية مظلومة في مصر
قطع غيرها معقولة نسبيا الفانوس الأمامي 1200 الخلفي 650 المراية كهربا 900
مافيش حد نصحني بيها بحجة إعادة البيع وقلتها وعدم وجود صيانة أو قطع غيار إلا في التوكيل.
بس دي ألفا روميو.