العربية الهيونداي ix35 2016 الفئة التانية .. تجربة سواقة
العربية الهيونداي ix35 موديل 2016 الفئة الثانية
رؤية في العربية الهيونداي دي ... بعد حوالي 8000 كيلو متر
العربية عالية .. بسم الله ماشاء الله
عديت بيها في المية ساعة المطر اللي فات .. والحمد لله
وكذلك في المطبات
بتدبدب رغم إني حاطط نيتروجين ..
العزل بتاعها فيه مشكله بنسبة ..يعني طول مانا ماشي سامع الهوااا .. بيقولوا علشان ارتفاع العربية
مشكلة الرؤية .. الجزء اليمين من العربية قدام .. صعب تشوف منه حاجه
يعني لو داخل يمين في ملف وطفل صغير واقف أو عجلة مركونة أو حتة حتة حجر من بتوع الناس الله يسامحهم دول ممكن يحكلك العربية
وطبعا لو طفل ربنا يستر
مهم قوي وانت ماشي لو داخل في حتة فيها زحمة تبقي عينك سابقاك علي الأرض ... علشان لو حد قاعد لو طفل بيلعب لو قطة أو كلب وربنا يستر في الآول وفي الآخر
السحب بتاع العربية صعب قوي
كنت في مشوار ضروري وكنت بأجري ورا عربية علي الصحراوي ... جبت الـ 170 بس بإيه بطلوع الروح
ما أعرفش ازاي كنت بأكلم واحد في التوكيل عميل يعني .. وقاللي انه جاب 180 بسهولة ..
عافرت لغاية لما جبت 150 ... واقعدت احفر علشان اطلع للـ 160 وللـ 170 .. كان فيلم طويل قوي ...
العربية بتعلمك الأدب .. يعني ما تنفعش تاخد بيها غرز ما تنفع تزاحم العربيات السيدان .. تحسسك أنك كبرت ... ولازم تسوق في حدودك ... ياراجل يا عجوز ... عربية عجوزه فعلا رغم شكلها الشبابي الجميل ..
أمكانياتها معقولة قوي انا باتكلم عن الفئة التانية إللي من غير فتحة سقف
يعني فيها بلوتوث وسينسور ومرايات ضم وروف راك للسقف وتكييف ديول زون ... يعني يقسم العربية بالطول .. ليك وللي جنبك ..
عربية حلوة موتورها ضعيف علي البودي ... سحبه مش قد كده .. رغم انه 1600 135 حصان .. لكن هي متزنة وعاقلة .. ومش عايزه شباب
فرشها رائع وفخم .. الصالون جميل وشيك .. في الفئة دي جلد علي قماش ... الفتيس جلد والدريكسيون جلد .. ودي حاجه حلوه بصراحه
عيبها أنها ما بتقفلش اوتوماتيك اول ما تتحرك .. لازم تقفلها بنفسك ..
فيها جهاز إنذار ... علشان تجربة لازم تستني شويه .. وبعدين تفتح العربية .. ليه لمبة إِشارة في تابلوه العربية ..
لو فاتح الشنطة العربية ما بتقفلش ...
الثبات حسيت انه مش قوي علشان انا كنت راكب كيا سيراتو سيدان ... وكانت اكيد عا الارض .. وده فرق في إحساسي بثبات العربية لكن بمرور الوقت ابتديت اتعود عليها
ما اعرفش إيه إللي غلاها بالسعر المخيف ده .. يعني عربية زي دي تبقي بربع مليون جنيه ليه ... مشكلة السعر ده إنه ممكن يأثر علي إعادة البيع نظرا لآنه بيدخلها في شرائح تانية وبمقارنات صعبه عليها ..
استهلاك البنزين تقريبا 200 في الصفيحة .. مع ملاحظة جميلة فيها .. في شاشة تقييم لإستهلاك البنزين عا الهوا ..يعني تقولك كل دوسة بتعمل إيه في الإستهلاك .. دي تخليك تضبط دوستك علي البنزين .. وتحاول تقللها ... وفعلا دي فرقت معايا .. يعني كان مؤشر الاستهلاك معايا 9.3 بالتكييف ... بمرور الوقت وبالتدريب بقي 9.0 وده فارق كبير مش صغير ..
بالنسبة للإكسسوارات ... ما ضيفتش فيها أي حاجه .. لكن ممكن تحط اكصدام خفيف من وراء ومن قدام وشكله ممكن يبقي حلو .. سألت عليه قالولي في حدود 400 جنيه القطعة ... وممكن تركب عتب علي جنبين العربية علشان لو ناس كبيرة أو عيانة عايزه تركب لأن العربية عالية ومتعبة عند الركوب ... تكلفة العتب ده حوالي 650 جنيه .. الأسعار دي انا سألت واحد مركبها .. وقاللي أنه ركبها في وسط البلد .
شغل الكهرباء بقي يعني حكاية الزنون ومكنة الرفع ونظام الترحيب بتاع العربية إللي بيخليهالك تنور وتطفي لوحدها وتضم المرايات أول ما تقفلها .. كل ده متاح ... بناء علي كلام عضو اسكندراني في النايل موتوز والعهدة علي كلامه ..
لكن انا سمعت ان اي لعب في الكهرباء يخرجك بره الضمان .. أو علي الأقل بره ضمان الكهرباء
التوكيل ... كويس ومريح بس زحمة ..انا بأتكلم علي أبو رواش .. بس مدبسينا في حكاية كل 5000 كيلو دي ... ولما قلتلهم انا بأغير زيت كل 10000 قالولي مالناش دعوة ولو ما فحصتش ثلاث مرات في فترة الضمان ممكن تخرج بره الضمان ..
شغل استغلال من وجهه نظري .. بأدفع في الفحص العادي حوالي 260 جنيه أو اكتر شوية .. ولو في زيت بتتكلم في 850 جنيه تقريبا .. ومع واحد زيي الكلام ده بيبقي تقريبا كل شهرين مع الاستهلاك العالي للبنزين ..
شكرا للجميع .. وعذرا علي الإطالة .. لكن انا قلت أٌقولكم كل حاجه بالتفصيل .. وربنا يبارك للجميع ويسترها ..