الموضوع: لماذا أقدم بنكا "الأهلى" و"مصر" على رفع الفائدة على شهادة الادخار لـ12,5%

المشاركة الأصلية كتبت بواسطة imhotep

الناس اللى فاكرة نفسها انصح من اللى ماسكين السياسة النقدية لدولة
ناسيين بس حاجة صغيرة
ان الجنيه انخفضت قيمته من اول السنة حتى الان 11% فى ظرف استثنائى لم يحدث من قبل و غير مضمون تكراره للى بيراهن على كده
لكن اهه اهم عملوا شهادات بالجنيه تفوق نسبة فائدتها نسبة انخفاص الجنيه
عشان هم مش عبط يخفضوا الجنيه امام الدولار بنسبة اعلى من نسبة الفائدة على الجنيه
ده معناه ان الشخص البورام اللى فاكر نفسه فلوطة و بيحول فلوسه لدولار
يستنى بقى جنبهم لما ان شاء الله نسبة زيادة الدولار امام الجنيه تزيد عن الفائدة على الجنيه و ده عمره ما هيحصل

هييجى حد انصح و يقولى ما هو هيبيع و يشترى سوق سودا و يستغل الازمة فى تحقيق ربح سريع (طبعا بلا وازع من ضمير او دين يمنعه من استغلال احتياجات الناس اللى الدولة مسئولة عن توفيرها و هو بأفعاله دى بيأثر على ده). . . هقوله برافو عليك ده انت شاطر اهه. . . بس خليك بقى مستنى السوق السودا و تقلباتها المش مضمونة والضربات اللى هتستمر تضربها لها الدولة لغاية ما إن شاء الله تقضى عليها و التضييق اللى بيحصل عليها دلوقت و بيتقبض عليهم مش عشان بيبيعوا سوق سودا لكن كمان عشان التحويلات اللى بتتم عن غير طريق البنوك. . . و شوف مين اللى هيغلب الدولة و لا السوق السودا

و هقوله كمان برافو عليك اكتر و اكتر. . . عشان و سيادتك بتبص تحت رجليك على الكام قرش اللى هتكسبهم فى الكام دولار التعبانين بتوعك و انت و غيرك من القطيع اللى بيعمل كده بناء على نصائح من مغرضين. . . و سيادتك بتعمل كده بتدى ذريعة لكل التجار تزود بعد كده على حضرتك كل السلع و الخدمات زيادات هتخسرك اضعاف اضعاف القروش اللى كسبتها. . . هتيجى تشترى او تغير الشقة اللى بفلوسها اشتريت دولار هتلاقى سعرها زاد النص. . . و العربية اللى هتيجى تشتريها او تغيرها شرحه . . . و السلع الغذائية شرحه. . . يعنى فى النهاية خسران خسران اضعاف اضعاف القروش اللى كسبتها من الكام جنيه اللى حيلتك و محيرينك و سمعت نصائح اصحاب السوء و حولتهم لدولار

ها نقول كمان و لا وصلت

رأيك حلو و يحترم .تقريبا أنا واحد من عشرات الآلاف من البورام و الفلوطة اللى بيشيلوا بالدولار . بس اللى مضايقنى من كلامك إنك بتعتبر اللى بيتعامل فى السوق السودة معندوش ضمير

أنا كدة وفقا لكلامك معنديش ضمير . فعلا أنا معنديش ضمير لإن بنوك الدولة لم تستفد مني بدولار واحد منذ ثورة يناير حتى الآن . كل تعاملاتي مع السوق السودة حتى لما كان الفرق خمس قروش بس .

بصراحة أنا شايف مصلحتى أهم من مصلحة الدولة ( مش الدولة بمعنى مصر الأرض و المواطنين الغلابة و النيل و الهرم و الهري ده ) أقصد مصلحة النظام القائم على الدولة . ليه يكون عندى أنا ضمير و أضحي بفلوسى اللى أتعب فيها علشان يستفيد بيها رئيس حي مرتشى أو ضابط أو أمين شرطة حرامي الحكومة حتاخد فلوسي تصرفها عليهم بدلات حضور إجتماعات و بدلات تمثيل و حوافز بالملايين و عربيات و فى الآخر أنا لا أستفيد حتى بماسورة غاز فى بيتي ترحمنى من ذل الأنابيب . أنا و إنت بندفع مرتب المدرس الجاهل اللى بيعلم أولادنا فى المدارس الغش و التخلف .بندفع رسوم رفع الزبالة فى الشوارع بالمليارات و منعرفش بتروح فين بس أكيد نعرف إن الزبالة ما بتتشالش. الأمثلة كتير . لو أضمن إن الدولار بتاعي حيرجعلى خدمات أستفيد بيها أكيد سأكون أول الوطنيين .

حاجة تانية : مش كل تجار السوق السودا بياخدوا الدولار و يبيعوه لتجار المخدرات و السلاح . أغلب الدولار بيروح لمستوردين بيجيبوا بيه مستلزمات إنتاج أنا و إنت محتاجينها و الدولة مش قادرة توفرها . أبسط حاجة كيماويات المعالجة للمياة المعبأة اللى بنشربها و إحنا بنكتب البوستات على المنتدى دى مستوردة بالدولار . أبسط شيىء فى مصر . عجانة الفلافل اللى فى أي محل الترس اللى بيدورها مستورد بالدولار .

أفضل أعيش بلا ضمير من أجل أولادي و مصلحتهم بمعنى إني أبيع الدولار فى السوق السودا و أستفيد بالفرق إنى أديهم دروس خصوصية محتاجينها و أجيبلهم أكل و شرب أنضف أحافظ بيه على صحتهم أو أعالجهم فى مستشفيات نضيفة بدل ما يستفيد بيها إبن المسئول و يتعالج هو فى النيل بدراوى و وادي النيل و أدوخ أنا بأولادى على المستشفى الميري . و أحييك على وطنيتك و أرجو إنك تكون عرفت البورم و الفلاليط بيفكروا إزاى و يارب يلغوا السوق السودة و يبقى سعر صرف الدولار موحد زى باقى العالم

طبيعى مع دوله فيها عجز موازنة وتضخم مرعب انها تعلى الفايده عشان عاوزه تلم الفلوس من الناس...وبرضه الفايده كده بتعلى على القروض.
اما بخصوص الناس الفلوطه اللى ماسكين السياسات النقديه في البلد فلا تعليق..فعلا البلد ممسوكه بناس ماشاء الله,فاضلنا أسبوع ونطلع القمر

1-تمام سعادتك لم تحسب ايضا الزيادة السنوية في سعر الدولار اللي هو لا يقل عن جنيه سنويا منذ ثورة يناير
2-سعادتك لم تحسب التصريخات الحكومية بوجوب تحرير الجنية في اشارة ضمنية لوصوله ل 10 ج
3-سعادتك بتهلل لسياسيات حكومية من اجل رفع الفائدة فارجو من سعادتك مناشدة المسئولين عن البلد منع استيراد السلع الاستفزازية او الترفيهية (فانوس رمضان ) او السلع اللي ليها بديل محلي حتى لو وحش
4-سعادتك ارجو ان تنناشد مسئولين البلد بعدم الدفع بالدولار الى مدربين الكورة الاجانب والى الجكام الاجانب الخ الخ
5-سعدتك ممكن تسأل الحكومة اللي لسه مطلعه قرار من يومين برفع الدعم اللي كان عامله حسني مبارك عن زراعة القمح كأن البلد عنده دولارات كتير وهتستورد قمح بيها ان شاء الله فمش محتاجة قمح محلي
6-سعادتك ممكن تبلغ الحكومة اللي بتههدد كل شوية برفع الدفع عن المشتثات البترولية تسألهم خفض الرواتب في المنشأت البترولية لتكون مثل بقية مرافق الدولة لان الرواتب دي بردو مشمولة من ضمن الدغم اللي انا مذلول بيه يعني محاسب في البترول بياخد 8000 ج ومحاسب في اي وزااررة اخري بياخد 1200 ج ده على اساس ان محاسب البترول بيركب البريمة وهي نازله تجيب البترول من تحت الارض او بيعمل نفسه برميل بيعبوا فيه البترول المستورد
مش هكلم على رواتب الشرطة والجيش لان دول صراحة يستحقوا رواتبهم لانهم بيقدموا ارواحهم وبعد عن بيوتهم وده لا يقدر بمال

لن يمل الانسان من تبرير ما يفعله. . . فعلى هذا جبلت طبيعته منذ اول خطيئة حين قتل اول اخ اخيه فمن المؤكد انه وجد ما يبرر فعلته
لذلك خير ختام لكلامى فى هذا الموضوع الذى لا جدوى من اى مزيد منه. . . هو مقولة ليو تولستوى الخالدة

الخطيئة عمل انسانى. . . لكن تبرير تلك الخطايا عمل شيطانى

و المعنى و المغزى واضح . . . و لا يلومن اى احد الا نفسه التى كما لا يراعى الا مصلحتها الفردية . . . لا يعود يشتكى و يتباكى على حاله و حال البلد لانه هنا يناقض نفسه و يعيب زمانه و العيب فيه و ما لزمانه عيب سواه سواء فرد او مجموع افراد لاننا كمجتمع ليس الا محصلة سلوكيات و افعال الافراد . . . لكنه لا يرى الا تبرير افعاله . . . لا اقول قطعا انه لا يوجد اى عيب اخر فى زماننا الا نحن كما يقول بيت الشعر لان العيوب كثير خارجنا. . . لكن ما اقوله اننا فقط محصلة ما نفعل جميعا . . . و ما نزرعه اليوم بأفعالنا خيرا كان ام شرا . . . وعى منا ام جهلا. . . نحصده غدا . . . و غدا دائما لناظره قريب

سلاما

مفيش فايده لا في الحكومات المتتاليه الفاشله ولا في فكر الناس...مفيش اي امل في تحسن الوضع لان الكل-المسئول والمواطن- بيفكر في نفسه وبس


ممنوع إستخدام اللون الأحمر حيث أنه مخصص للمداخلات الإدارية

م ع 7

احلى حاجة اتقالت

لاننا كمجتمع ليس الا محصلة سلوكيات و افعال الافراد . . . لكنه لا يرى الا تبرير افعاله

المرتشي و الفاسد و الحرامى و اللي ماعندوش ضمير و اللي بيزوغ من شغله و اللي مش بيراعى ربنا

هما دول افراد المجتمع ........... عايزين المجتمع يبقي عامل ازاى

فيه حاجات كتييييييييير اوي…… ممكن نعملها من غير و لا حكومه و لا احزاب و لا رئيس و لا بطيخ…… انا ساكن في اسكندريه في عماره طويله عريضه…… المفروض انها في حته كويسه…… فيها 40 شقه و كل شقه فيها في المتوسط عربيه و اتنين احدث موديل …… يعني ناس ميسوره الحال…. العماره اتحاد ملاك…… اتفرج علي المسخره عشان نلم من كل شقه 50 و لا 100 جنيه عشان نوضب الاسانسير و لا نعمل صيانه للعماره و لا نبيضها و لا نجيب مولد عشان النور لما يقطع …… 10 شقق تدفع و الباقي يتهرب…… تلم ال 10 شقق من بعضها و تصلح علي حسابها…… تلاقي الباقي بمنتهي البرود بيستخدم كل حاجه مادفعش تمنها و برضه مش عايز يدفع

صوتنا اتنبح ....... ياجماعة ماحدش يطلع كيس الزباله بره قدام باب شقته ....... عشان مانشوهش منظر العمارة ....... البواب حيطلع كل يوم فى وقت معين يخبط على الشقق و يلم الزباله ........ و يا ريت لو تحطها فى كيس مقفول عشان ماتقعش و تبهدل الدنيا

تلاقى اصرار غريب على العفانة و النتانة ....... برضه بحطوها رة على السلم ....... و برضه مش بيحطوها فى كيس مقفول

ده المفروض الناس المتعلمة ميسورة الحال ........ مابالك بالطبقات الأكثر جهلا و فقرا

احنا كشعب عاملين زى اللى مستنى المهدى المنتظر ........ و لغاية ما ييجى ..... عادى ...... حنفضل فاسدين مرتشين غير متعاونين ماعندناش ضمير

المشاركة الأصلية كتبت بواسطة aif

..................................................

فى الحقيقه يا فندم السياسه النقديه المعلنه و زياده الفايده هى بالظبط الى حضرتك قولته يعنى لو من شهر كانت الفايده 15% كنت حضرتك وفرت وجع قلبك فى تحويل دولار ثم بيعه عشان كده هما دلوقتى مع توقع استمرار ارتفاعه بيزدو الفايده تدريجيا عشان الشهر ده حضرتك تعمل شهاده بدل متشترى دولار تانى يعنى القرار انعكاس مباشر للتجربه الواقعيه لحضرتك ياريت يعرفو يوازنو مبينها لفتره عشان الدولار يهدى لاننا دوله و شعب مش بيعمل حاجه غير انه يستورد كل حاجه و بس

و بالنسبه للقرار فده واقع و نظريه اقتصاديه معروفه جدا انخفاض عملتك ترفع الفايده و العكس صحيح حسب احتياجات الدوله فى التحكم فى النقد الاجنبى يعنى ده مش تفكير عبقرى او غبى ده اساسيات الاقتصاد المركزى و معروفه عالميا ة نفس الى حصل فى 2013 لما وصل سعره برضه 8.5 و برضه عملو شهادات ب 12.5 :d