الموضوع: لماذا أقدم بنكا "الأهلى" و"مصر" على رفع الفائدة على شهادة الادخار لـ12,5%

بص يا احمد بك. . . فيه حكمة قديمة بتقولك ايه. . . من يزيد علما يزيد حزنا. . . لانه بيشوف الامور بشكل اعمق و بيدرك الفرق بين الواقع و المأمول لكى تتحسن حياتنا و هذا ما يحزنه فى النهاية . . . انا شايف ناس ذات غرض و باين اوى. . . و فاكرين الثمرة اللى ضاعت منهم. . . يتوهمون انها قربت تستوى و اقترب وقت قطافها و سقوطها حسب ما يتوهمون و حسب غسيل الدماغ بتاعهم. . . و عمالين يدوسوا فى الاتجاه ده بالقول و بالفعل. . . و للاسف فى غلابة كتير بيتم استغفالهم بلوى للحقائق و نشر اشاعات. . . للاسف بسبب عدم الفهم و القراءة . . . بس سيبك من كل الكلام و هم محاولاتهم المغرضة تبوء بالفشل و كله على فشوش. . . و انا شفت بعينى محدش قالى. . .300 الف جنيه داخلة البنك شهادات فى خمس دقائق من اول ساعتين من عمل البنك لعدد 5 عملاء 2 اتنين منهم اول مرة يتعاملوا مع البنوك فى حياتهم مع ان اعمارهم كبيرة. . . و دول بقى بالذات اللى كنت مبسوط بيهم جدا. . . ليه. . . لان دول كانت فلوسهم تحت البلاطة و طلعت. . . كانت فى الاقتصاد الموازى اللى اتكلمنا عنه. . . فاكره؟ اهو بيطلع اهه و يدخل شرايين الاقتصاد الفعلى . . . و لو كره الكارهون

انا مش عارف الخناقة علي ايه ؟ الناس بتحول للدولار بسبب عدم ثقتها في الجنيه وانه هينزل لوحده او بفعل فاعل
الناس خايفه انه يحصل زي ماحصل 2003 والناس تخسر ثلث فلوسها والشعب كله زي مانتو شايفين تحت خط الفقر
يعني الناس بتتكلم في مبالغ اقل من 200 الف جنيه والا كان اشتري شقة او قطعة ارض
الناس دي يعني غلبانة قوي بتقاسي في الحياة ومنهم شباب بيشق طريقة ومش عاوز يخسر تعبه وشقاه
يبقي معاه 200 الف وفجأه يلاقيهم ب175 الف دا لوسعر الدولار بقي ب9 جنيه
او يلاقيهم بقو 160 الف لو الدولار بقي ب10 جنيه
وك يوم عمال يسمع عن ازمات الدولار حتي علي المصاطب وع القهاوي
مش غلط انه يخاف علي تعب وشقاه
خصوصا انه مع كل ارتفاع للدولار ترتفع كل السلع مستورده ومحليه اشتروها قبل الزياده او بعدها
كله بيرفع علي كله

يعني ايهما افضل شراء شقة اومحل ولا الشهادات دي؟؟
كمان 3سنين
لو شقة ب 200000 سعرها حيبقي كام؟
لو شهادات ب 200000 بفوايدها حتساوي الشقة

فين ايقونة الاقتباااااس . . . الشكل الجديد مجننى

المهم. . . حبيبى طول عمرك يا حاج احمد و حصل خير و طول عمرك انسان محترم و ذوق

الاخ mohamed 2002
من امتى كان فى حاجة ماشية بعقل او منطق او قواعد فى بلدنا العزيزة و لا حد يقدر يقولك حتى بكرة ايه اللى ممكن يحصل بدرجة من اليقين تريحك من قلقك خاصة ان ظروفك انت ادرى الناس بها
لكن المنطق يقول الاتى. . . لو انت شاب صغير لسه متجوزتش. . . يبقى شقة طبعا. . . طب لو دى مدخرات و انت عندك شقة. . . ممكن شقة تانية بس خلى بالك من كذا عقبة فى الطريق منها سهولة التسييل و البيع و الشراء عند الاحتياج للفلوس و قرف الايجارات و كمان ان فى ضريبة عقارية على المسكن الثانى اعتقد هتطولك

الافضل لو تقدر تعمل مشروع. . . مينفعش. . . يبقى قدامك الشهادات . . . انما اللى انا اتنبح صوتى فى شرحه و الشئ المؤكد. . . انك لو اشتريت بهم دولار و احتفظت بهم تحت البلاطة املا فى ربح مستقبلى من فرق سعر البيع و الشراء بعد تلات سنين و لو كل الناس عملت زيك. . . يبقى ابشرك ان الشقة اللى ب 200 الف دلوقتى هتبقى ب 700 الف و لو كنت بتحلم تشترى عربية تمنها دلوقت 100 الف بعد تلات سنين هتلاقيها ب 200 الف على الاقل. . . و لو الدولار بعد 3 سنين زاد 50% و وصل 12 جنيه يعنى ال 200 الف بتوعك بسعر النهاردة دولارات هيجيبوا 276 الف يعنى تقريبا نفس قيمة الشهادات. . . بس ساعتها ابقى روح ناقش التجار اللى خلت الشقة ام 200 الف تمنها وصل 700 الف. . . و العربية اتضاعف تمنها. . . ما هو كله بيغلى على كله. . . بس مين الخسران و مين الكسبان. . . هتبقى انت ساعدت التجار تستغلك و تزود جشعها والحجة جاهزة . . . اصل الدولار غلى. . . و بالتالى هتمشى من ادامهم بتضرب كف بكف و تقول حزبنا الله و تدعى على اللى نصحك بالتحويل لدولارات اللى وصل خسايرك فى فرق اتمان الشقة و العربية اضعاف اضعاف ما ربحته من التحويل لدولار

التعامل فى العملة يا سادة ليس تجارة للافراد للمضاربة عليها. . . دى سلعة سيادية للدولة تشترى بها احتياجات المجتمع خاصة فى مجتمع يستورد كل شئ. . . و اللى سمع من حد عايش بره. . . هيعرف منه الاجراءات المشددة مع المواطنين فى التعاملات النقدية حتى داخل البنوك. . . فى امريكا لو حبيت تفتح حساب تحط فيه كام الف دولار كاش تلاقيه يقولك لحظة واحدة. . . و يرجعلك الموظف معاه مندوب من مكتب التحقيقات الفيدرالى بيدردش معاك انت جايب الفلوس دى منين و مصدرها ايه و انت شغلك ايه و عايش فين. . . و ابقى اثبت بقى . . . غير كده ممكن تتكلبش و انت قاعد لانك ببساطة مادمت تعمل بفلوس كاش تحت رادار الاقتصاد الرسمى و ملهاش مصدر واضح يمكن تتبعه . . . يبقى انت اكيد يا بتتاجر فى مخدرات يا سلاح يا جاى تحاول تغسل اموال استنى بقى لما يشوفوك جايبها منين. . ده فى عملة البلد نفسها . . . مش عملة اجنبية

احنا بس شاطرين نحلم و نقول نفسنا نبقى زى امريكا و اوروبا. . . تيجى بقى تنفذ حاجة على طريق انك تتقدم خطوة للامام من اللى بتعملها الناس دى فى نظامها. . . تلاقى الناس بتصوصو و محدش عاجبه و كله ماشى بدماغه اللى مريحاه و مش باصص غير لتحت رجليه

احلى حاجة فى الخطوة المفاجئة بتاعة رفع سعر الفايدة على الشهادات. . . انها روشت بتوع الدولار. . . يعنى عمالين يسألوا. . . يا ترى مين اللى عملها. . . هل هشام رامز اللى لسه استقالته ميعادها 26 نوفمبر . . . و لا الراجل الجديد. . . و لو الراجل الجديد. . . و داخل شادد اوى كده و زود 2% مرة واحدة فى خطوة تعبر عن عقلية تعمل بمبدأ الهجوم خير وسيلة للدفاع. . . يا ترى لو دى سياسته. . . هيعمل ايه بقى فى الصرافات. . . و هل عنده حلول للتعامل مع تحويلات المصريين فى الخارج. . . و هكذا. . . يالله . . . خلى اصحابنا اللى بيحبوا الدولار ياخدوا و يدوا مع نفسهم شوية زى اعلان البنك الاهلى. . . ما تروح تطمن على فلوسك :-)
شخصيا . . . اتمنى انهم يعوموا الجنيه مرة واحدة و نخلص من القصة دى و المتربحين منها. . . و ياكش يوصل تمنه 20 جنيه. . . خلينا نخلص و تخلص الحجج. . . و اللى يفتح بقه بعد كده من التجار و يقولك اصل أدولار مش عارف ماله يتعلق من رجليه :-)
الدولة بتعويم الجنيه بالتدريج واحدة واحدة عشان تقليل الاثار السلبية الاقتصادية لكده. . . بس هل الناس بتساعد نفسها و تسيب الدولار للدولة تشترى لهم به حاجاتهم و تحاول تحجيم جشع التجار. . . كثير من الناس باصص تحت رجليه بس و عايز يتربح من كده. . . عشان كده انا بقول يالله خليها خبطة واحدة و نخلص. . . و يحصل اللى يحصل. . . و بما انه لا يغير الله ما بقوم حتى يعفيروا ما بأنفسهم. . . و بالانجليزى God helps those who help themselves. . . يبقى عايزين نخلص بقى من القصة الحزينة دى

المشاركة الأصلية كتبت بواسطة mohamed2002

يعني ايهما افضل شراء شقة اومحل ولا الشهادات دي؟؟
كمان 3سنين
لو شقة ب 200000 سعرها حيبقي كام؟
لو شهادات ب 200000 بفوايدها حتساوي الشقة

لو سألت اى متخصص محايد و بيفهم هيقلك انك لازم تنوع استثماراتك و متركزش على أداه مالية واحدة و بكده تكون وزعت المخاطرة

يعنى لو تقدر تقسم الفلوس تلت اجزاء جزء تشترى بيه عقار و جزء تشترى بيه شهادات و جزء تشترى بيه دولار يبقى احسن بكتير انك تضع كل الفلوس فى عقار او شهادات

لو انت مش محتاج العقار يبققى اشترى بجزء شهادات و بجزء دولار

لو كنت مكانك كنت هشترى دولار بكل المبلغ

.. الى يقتنع يقتنع لنفسه و الى مش حيقتنع ... برضوا لنفسه

انا مقدر ان احيانا الواحد بيوصل لدرجة من التحمل لا يستطيع بعدها الاستمرار على طبيعته ... ربنا يعينك و يعيننا جميعا على الضغوط اليومية الحياتية
ahmed_eng2001

فيه حكمة قديمة بتقولك ايه. . . من يزيد علما يزيد حزنا. . . لانه بيشوف الامور بشكل اعمق و بيدرك الفرق بين الواقع و المأمول لكى تتحسن حياتنا و هذا ما يحزنه فى النهاية
Imhotep