الموضوع: صوت غريب فى موتور الفيرنا

السلام عليكم

انا عربيتى فيرنا موديل 2014 عامله 21000 كيلو .. المشكله انى بدأت اسمع صوت فى الموتور بدأت اسمعه لما كانت العربيه عامله 18000 كيلو تقريبا .. المشكله انى مش عارف اوصف الصوت اوى للاسف بس هو صوت جاى من ناحيه السيور كأنه صوت ونه مستمره طول ما العربيه دايره .. ومبيظهرش غير لما العربيه تسخن وتمشى شويه عشر دقايق مثلا .. هو الصوت مش عالى خالص بس انا سامعه من جوه العربيه بوضوح وخاصه لو قافل الزجاج او لو راجع باليل متأخر والدنيا هاديه .. ولما فتحت الكبوت وقربت ودانى حسيت انه جاى من الموتور نفسه اللى هو الجزء اللى فى النص اللى لونه سيلفر مش من السيور وانا اصلا لسه عامل صيانه ال 20000 ومغير زيت وبوجيهات وفلتر هواء وفلتر زيت وفلتر بنزين ولما قولتلهم هناك على الصوت قاللى انا مش سامع حاجه وبصلى باستغراب طبعا كانى مجنون .
رجاءا افيدونى عشان انا قلقان من الصوت ده غير انى بقيت مركز معاه وسامعه على طول ومش قادر اصرف تركيزى بعيد عنه

ولو حد يقدر يقولى على ميكانيكى كويس وثقه يكون فى مدينه نصر .. وهل فى فرق كبير بين انى اوى العربيه للتوكيل نفسه بتاع غبور وانى اوديها لوكيل معتمد ولا اخدها من قاصرها واشوف ميكانيكى