آسعار السيارات و سعر الدولار..

**ahmedwagdy03** · 05-12-2015 10:21 AM

المشاركة الأصلية كتبت بواسطة hero

السادة الآفاضل وكلاء السيارات في مصر اول ما الدولة رسميا زودت سعر صرف الدولار 3%.. قاموا هم مزودين آسعار العربيات بما لا يقل عن 10% و تعدت النسبة الـ20% في بعض الموديلات....

طيب حاليا الدولار رجع تاني لسعرة قبل الزيادة.....آسعار العربيات وضعها اية....

و اية الحلول ايلي ممكن يعملها المستهلكين في سوق زي السوق المصري....لحماية نفسهم من جشع الوكلاء و التجار و اصحاب المعارض.... ؟؟

أنت فعلا مصدق إن الدولار رخص و إن سعر البنك المركزى هو السعر اللى بتتعامل بيه وكالات السيارات !

الجشع موجود فعلا بس مش عند التجار بس . إسأل السؤال بطريقة مختلفة : إذا كان الدولار زاد 3% ليه الحكومة ما تخفضش الجمارك على السيارات 5% مع إلزام التجار ( متقدرش تلزمهم طبعا ) بتثبيت السعر .مش الجمارك 40% دي عبارة عن الرسوم اللى بتحصلها الدولة على المنتج الأجنبى ( السيارة المستوردة ) لحماية المنتج المحلى ( السيارة المحلية اللى مش عارفين هي إيه بالضبط) .و بتاخد ضرايب 22% على الجمارك اللى بتاخدها .

و بتحصل الكلام ده علشان تعملنا بيها الطرق الجميلة الناعمة اللى كلها حنية و مؤمنة أحسن من اللى فى دبي علشان نمشى عليها . طيب ليه الحكومة ما تتنازلش شوية و تقلل من مواصفات الطرق بمعنى إنها تلغي الواي فاى المجانى اللى على الطرق أو تقلل من عدد تليفونات الطوارىء المنتشرة فى أنحاء البلاد و تخفض الجمارك و الضرايب.

حد فهم حاجة ؟

**م/مصطفى محمود** · 05-12-2015 12:49 PM

ليس دفاعا عن التجار ، بس فعلا طبيعي يحصل زيادة كبيرة لعدة أسباب

1 - صعوبة توفير الدولار من خلال البنوك للشركات (بالسعر الرسمي) وبالتالي البنك بيقولة وفر أنت الدولار بمعرفتك.

2- إرتفاع سعر الدولار الكبير فى السوق السوداء.

3 - صعوبة إيداع الدولارات الموفرة من السوق السوداء فى البنك بسبب قرار الحد الأقصى للإيداع اللى البنك المركزي حطة ب 10 آلاف دولار يوميا و 50 ألف دولار شهريا بحد أقصى، وبالتالي بعض التجار بيلجأ انه يعمل إيداع فى اكتر من بنك ويحولهم لبنك واحد وطبعا بيبقى فية تكلفة للتحويل من بنك لبنك.

4 - (ودي أهم نقطة) أغلب التجار بتتعامل مع الخارج بتسهيلات ، يعني بيدفع آجل 3 شهور مثلا ، وبالتالي بيعمل حسابة لما هييجي يدفع هيشتري الدولار بكام ( على فكرة شركات كتيرة فى مصر خسرت السنة اللى فاتت بسبب النقطة دي تحديدا )

5 - من المنطقي لو عندي عربية اشتريتها من الخارج ب 50 ألف مثلا وكنت عامل حسابي ابيعها ب 80 مثلا بحيث اجيب بال 50 التانيين عربية تانية وال30 دول مرتبات ومصاريف ثابتة ودعاية ومكسب ، وفجأة لقيت ان انا هشتري العربية التانية ب 60 الف بدل من 50 ، طبيعي اني هعلي سعر البيع ل 90 بدل من 80 (على الأقل) علشان احافظ على المرتبات والمكسب (ده لو المرتبات مزادتش والمصاريف الثابتة مزادتش)

6 - للأسف السوق المصري بقى كلة مخاطر ، وطبيعي اللي بيشتغل فى سوق كلة مخاطر بيبقى عايز يكسب كتير نتيجة تحملة للخطر ده