عندى أحساس دايما أننا تعبان !

**EgyArmy** · 16-11-2015 05:42 PM

بقالى فتره طويلة جدا بشكل يومى يمكن دخلنا فى سنتين أو أكتر حاسس دايما أننا تعبان و التعب بيتلخص فى تعب فى الجسم بشكل عام و الأكتر صداع أول ما أصحى من النوم

من كام شهر كدة كانوا شكوا فى حاجة فى الدم عندى
عملت تحليل لكرات الدم البيضه و سرعة ترسيب و صورة دم كامله
التحليل طلع كويس جدا لدرجة أن الهموجلوبين عندى كويس جدا لدرجة أن الدكتور أستغرب

أمبارح أول ما صحيت من النوم حسيت أننا عندى صداع بشكل رهيب لدرجة أننا كنت فاكر أن فيه نزيف فى مخى و ساعات ببص لنفسى من عينى و مناخيرى و ودانى عشان أشوف فيه دم نزل من دماغى ولا لأ من قوة الصداع

نزلت قعدت شربت قهوة و شاى و بعد كدة عملت تحليل للسكر و الضغط
السكر طلع 82
الضغط طلع 115 / 80 أو حاجة زى كدة مش فاكر
بس التحليلين الدكتور قالى يعتبر كويس

المشكلة أننا و أنا بعمل التحاليل دى ببقى عايز أطلع تعبان
لسبب واحد بس
عشان ألاقى المشكلة و ابدأ أحلها عشان أرجع بنى أدم طبيعى تانى
لكن طول مانا مش عارف حاسس أن فيه كارثة أكبر

الحاله عمتا هتستغربوا منها لو عرفتوا بالتحديد السن و هو منتصف العشرينات
بلبس نضارة و ممكن تكون دى السبب بس أزاى هيا السبب و أنا لما بصحى بحس بصداع يعنى بكون مغمض عينى مش مفتح عينى

الكارثة بقى أول ما بصحى بحس بصداع رهيب لو فضلت قاعد الصداع بيزيد لما بعمل مجهود الصداع بيقل يعنى لو نزلت و لفيت و مشيت كتير الصداع بيروح و أول ما أقعد تانى الصداع بيرجع زيادة عن الأول و هكذا

هل دة بسبب ضغط الشغل أو التفكير ؟
و ساعات بحس أن مفيش بنى أدم طبيعى كدة فهل كل الناس تعبانه للدرجة دى ؟
و لو فيه تحاليل أعمل أيه بالظبط عشان أفهم ده أيه ده ؟
لدرجة أننا أمبارح فكرت أعمل رسم مخ أو اى حاجة قريبه من كدة

**volociximab** · 16-11-2015 06:21 PM

اكشف انف و اذن ثم مخ و اعصاب

**monamize4** · 16-11-2015 07:39 PM

صداع بيزيد بالنوم او بمعنى انه بيكون شديد اول ماتصحى ,, دا ماشى مشاكل مع الجيوب الانفيه
لو مفيش عندك مشاكل جيوب انفيه يبقى لازم حد مخ و اعصاب يبص عليك

**man1974** · 17-11-2015 10:54 AM

السلام عليكم
شفاك الله ووعفاك من كل سوء
رجاء اذكر وزنك ووظيفتك، وهل تميل دائما إلى تناول وجبات غنية بالدهون والزيوت، وهل تشعر بالصداع قبل النوم مباشرة أو أثنائه أو بعده. وهل تحب دائما تناول الطعام والنوم بعد ذلك مباشرة؟ هل تشعر بحرقة الفؤاد (ألم مزعج في فم المعدة) أو تشعر بطعم الشطة الخفيف جدا في طرف لسانك أو ظهور متكرر للقرح الصغيرة في الفم واللسان؟

وشكرا

**ALYSALIM** · 17-11-2015 12:29 PM

خد اجازة شهر وحاول تغير من طبيعة شغلك مارس الرياضة خارج المنزل وتكون رياضة جماعية متشتغلش كتير كفاية 8 ساعت يوميا وعلي الاقل يوم في الاسبوع اجازة
معظم اللي عندك ده ضغط نفسي وارهاق في الشغل
صدقني في ناس بتشتغل كتير اكتر من اللزوم بدون فايده
وناس بتشتغل من 4- 6 ساعات بس ومحصلين كل الفايده
العبرة مش بكتر ساعات العمل اللي غصب عنك هترهقك نفسيا وجسديا والنتيجة انك هتنهار
وتصبح سجين لعملك
شفاك الله وعافاك

**EgyArmy** · 19-11-2015 12:44 AM

كل يوم منتدى نايل موتورز بيثبتلى انهم اعضاء قمه فى الاحترام و خايفين على الاعضاء و كأنهم عيله
بمناسبه الجديد فمفيش جديد حاليا غير صداع برضه و اليومين الجايين هحاول افضى نفسى عشان اكشف

المشاركة الأصلية كتبت بواسطة volociximab

اكشف انف و اذن ثم مخ و اعصاب

ان شاء الله و ده الى ناوى اعمله فعلا

المشاركة الأصلية كتبت بواسطة monamize4

صداع بيزيد بالنوم او بمعنى انه بيكون شديد اول ماتصحى ,, دا ماشى مشاكل مع الجيوب الانفيه
لو مفيش عندك مشاكل جيوب انفيه يبقى لازم حد مخ و اعصاب يبص عليك

فعلا زمان كان عندى مشاكل فى الجيوب الانفيه و نزيف بسبب سيولة الدم بس بدأت تقل جدا لما كبرت

المشاركة الأصلية كتبت بواسطة kazamodia

الصداع بيزيد بليل تاني ؟

يعنى من الساعة 9 كدة و ساعات بحس بصوت تنميل فى الدماغ كأنه وش بتاع التليفزيون

المشاركة الأصلية كتبت بواسطة man1974

السلام عليكم
شفاك الله ووعفاك من كل سوء
رجاء اذكر وزنك ووظيفتك، وهل تميل دائما إلى تناول وجبات غنية بالدهون والزيوت، وهل تشعر بالصداع قبل النوم مباشرة أو أثنائه أو بعده. وهل تحب دائما تناول الطعام والنوم بعد ذلك مباشرة؟ هل تشعر بحرقة الفؤاد (ألم مزعج في فم المعدة) أو تشعر بطعم الشطة الخفيف جدا في طرف لسانك أو ظهور متكرر للقرح الصغيرة في الفم واللسان؟

وشكرا

الله يكرمك يا باشا . الطول حوالى 170 و الوزن حوالى 80 و الوظيفه مبرمج مواعيد النوم للاسف فى اى وقت يعنى ممكن انام 9 الصبح و اشتغل الساعة 2 العصر ده اغلب الايام بنام حوالى 5 ساعات و بييجى يوم فى الاسبوع ممكن انام 10 ساعات و بالنسبه للاكل حاليا مش باكل كتير لانى بكسل اعمل اكل لانى عايش لوحدى و بقيت باكل فى منتصف اليوم و مش بنام بعد الاكل و بالنسبه للدهون تكاد تكون قليله جدا و الحمد لله معنديش قرح بس عندى قولون عصبى

المشاركة الأصلية كتبت بواسطة alysalim

خد اجازة شهر وحاول تغير من طبيعة شغلك مارس الرياضة خارج المنزل وتكون رياضة جماعية متشتغلش كتير كفاية 8 ساعت يوميا وعلي الاقل يوم في الاسبوع اجازة
معظم اللي عندك ده ضغط نفسي وارهاق في الشغل
صدقني في ناس بتشتغل كتير اكتر من اللزوم بدون فايده
وناس بتشتغل من 4- 6 ساعات بس ومحصلين كل الفايده
العبرة مش بكتر ساعات العمل اللي غصب عنك هترهقك نفسيا وجسديا والنتيجة انك هتنهار
وتصبح سجين لعملك
شفاك الله وعافاك

يسمع منك ربنا هههههههههه شهر ازاى بس انا خاطب
و فعلا عندك حق انا مبقتش مركز خالص بقالى فترة طويله لدرجه اننا حياتى بقيت كأنها حلم و نادرا جدا لما بحس اننا فايق حتى الايام الى كنت بريح من الشغل كنت بسافر من اسكندرية للقاهره و العكس و بيحصل فيه مشاكل للركب و المشكله اننا مفيش اعشاب مهدئة بتعمل نتيجه معايا زى الينسون و الحاجات دى و مش عايز الجأ حاليا لاى حاجه من دماغى عشان انا متأكد ان اى حاجه كيماوية او مهدئة اضرارها اكتر من فوائدها

و لما اكشف هقولكم الاخبار بس ابقى فاضى ان شاء الله

**إنسانة** · 19-11-2015 11:04 AM

حلل فيتامين د

وممكن يكون الهيموجلوبين تمام عادي

والferritin ناقص

حللت فيريتين ؟

دا الحديد الحر في الدم

ولما تروح للدكتور تاكد ان توجيه العلاج بإيدك

وصفك للمشكلة بدقة مهم جدا

حدد للدكتور مدة الصداع واوقات ظهوره ومكانه