من غير ضرب ولا شتيمه ولا تريقه

من غير مقدمات عشان مطولش عليكوا
انا ابن ناس والله بس الزمن هو الي عمل فيا كدا
من الاخر انا عايز اشتري دبدوب لخطيبتي:worried:
هي نفسها في دبدوب كبييييير وانا سالت عندنا في طنطا ملقتش
او بمعني اصح لقيت بس اسعار هبله يعني كلها فوق ال1000 جنيه
وانا مشلاقي الفلوس ولا شغال حرامي عشان اشتري واحد بالملغ دا
دا حتي يبقي حرام
المهم عايز اجيبه من القاهره بمساعده اخواتنا القاهراويه يدلوني علي مكان كويس اجيبه منه
بس سكون حاجه عاديه مش ماركه عشان السعر ويكون من مكان اسعاره معقوله مش المحلات التقيله
وياريت لو حد من معانا في المنتدي يكون شغال او يعرف في الموضوع دا
او حد يكون تحت بيته او جامبه محل دباديب ويساعد اخوكوا الغلبان
:36_1_37[1]:
لتاني مره بقول من غير ضرب ولا شتيمه
وربنا يسامحني علي الجريمه الي هنعملها دي

ممكن تشترى من الموسكى فى حارة اليهود هناك تجار تبيعه بالجملة وهيكون سعرة معقول

اسمع نصيحتى من ااخوك وهنتقابل بعد سنين وهتقلى حقك عليا انت صح وانا غلطان

قل لخطيبتك انا معنيش الف جنية حق دبدوب لو قلتلك ولا يهمك وانتى عندى بدنيا اتجوزها لو قلتلك انت بخيل وكلام دة فابتعد عنها فورا لانها مش هتنفعك لما تزنق فى العيال بعد كدة

عارف انك هتكسف منها ومش هتسمع كلامى

بس نصيحتى بعد سنين هتعرف قيمتها

اقتباس:

---

المشاركة الأصلية كتبت بواسطة moh_faheem

ممكن تشترى من الموسكى فى حارة اليهود هناك تجار تبيعه بالجملة وهيكون سعرة معقول

---

الف شكر ياباشا لرد حضرتك

اقتباس:

---

المشاركة الأصلية كتبت بواسطة الفجر

اسمع نصيحتى من ااخوك وهنتقابل بعد سنين وهتقلى حقك عليا انت صح وانا غلطان

قل لخطيبتك انا معنيش الف جنية حق دبدوب لو قلتلك ولا يهمك وانتى عندى بدنيا اتجوزها لو قلتلك انت بخيل وكلام دة فابتعد عنها فورا لانها مش هتنفعك لما تزنق فى العيال بعد كدة

عارف انك هتكسف منها ومش هتسمع كلامى

بس نصيحتى بعد سنين هتعرف قيمتها

---

اولا شكرا لرد حضرتك
ثانيا انا هاخد بالنصيحه
وبكره وانا رايحلها هروح من غير الدبدوب ولا اي حاجه وهعمل الي حضرتك قولتلي عليه
ونشوف رد الفعل والباقي علي الله

دبدوب بألف جنيه لييييييييييييييه هو دب بحق و حقيقي؟
دا كيس قماش مليان اى حاجة

بصراحه حرام تشترى حاجه ملهاش لزمه بالسعر ده. لو هتجيبلها هديه فضه او اى حاجه فى الجهاز ماشى. انما لو عاوزه تجيبلها دبدوب هاتلها واحد باقل من 100 جنيه.

متحرمش الست من اى حاجه نفسها فيها هات دبدوب وهات دهب وهات اى حاجه مش مشكله
دول عالم زنانه ومخهم اصغر مما تتخيل

لكن
اختار التوقيت
ثانيا اختار السعر

يعنى مفيش مشكله لما يكون الدبوب بسعر 100 جنيه فقط لاغير
ويكون بمناسبه عيد ميلاد او عيد الخطوبه لكن مش بمناسبه اول مكلمه تليفون او مناسبه جلوس ملكه انجلترا على العرش

عشان خاطري انا وعن تجربة اسمع نصيحة العضو الفجر

اقتباس:

---

المشاركة الأصلية كتبت بواسطة a7medelfe2y

اولا شكرا لرد حضرتك
ثانيا انا هاخد بالنصيحه
وبكره وانا رايحلها هروح من غير الدبدوب ولا اي حاجه وهعمل الي حضرتك قولتلي عليه
ونشوف رد الفعل والباقي علي الله

---

لو حتعمل كدة شوف هدية حلوة و بوكيه ورد على قد ميزانيتك و جيبهالها و قول لها انك مقدرتش تجيب الدبدوب. أوعى أوعى أوعى تروح ايدك فاضية.

الأخوة هنا حاطين في بالهم ان انت تتأكد انها مش من النوع الطماع او المتدلع اللي مبيقدرش الظروف و طبعا معاهم حق. بس للأسف هما مش فاهمين ان البنات من اهممممممممممممممم الحاجات اللي بتختبرها في فترة الخطوبة هي بخل العريس او كرمه و مينفعش يبان انك بتستخسر فيها. ده بجانب ان أنها بتبقى عايزة تختبر أهميتها عندك و انك عايز تسعدها و تنفذ لها طلباتها. و زي ما انت حتفكر انها كدة حتتعبك بعد الجواز هي كمان حتخاف انك تبهدلها و تستخسر فيها.

نصيحة عامة, اتصرف بطبيعتك و من غير تخطيط و حسابات كتير. لو انت شاريها و هي شارياك ممكن تختلفوا في حاجات انما ان شاء الله كله بيعدي. خليك مفتح و مركز في تصرفاتها هي و أهلها عشان تفهم طباعهم و أخلاقهم كويس, انما مش لدرجة الشك السخيف و انك تقعد تحلل في كل كلمة و حركة و حتى لو فيه حاجات بسيطة مش عاجباك عادي عديها مفيش أتنين متفصلين على بعض. الطباع و التصرفات بتختلف من عيلة للتانية و لو الفرق في حاجات ثانوية يبقى ميهمكش. ده جواز يعني مودة و رحمة و سكن مش حرب.

انا بأقولك الكلام ده عشان بصراحة ساعات الواحد بيقرا نصايح هنا تودي في داهية و تخرب بيوت ده بصفة عامة مش على الردود بتاعة الموضوع ده خالص. طبعا فيه نصايح تانية زي الدهب انما مش كل الكلام يتاخد بيه.

هتلها اكبر دبدوب تقدر على تمنه ^_^

دبدوب مش اي حاجه تانية

اقتباس:

---

المشاركة الأصلية كتبت بواسطة a7medelfe2y

اولا شكرا لرد حضرتك
ثانيا انا هاخد بالنصيحه
وبكره وانا رايحلها هروح من غير الدبدوب ولا اي حاجه وهعمل الي حضرتك قولتلي عليه
ونشوف رد الفعل والباقي علي الله

---

انا لسه شايفة الرد دا :(


روحلها بشخصيتك الطبيعية لان دا هيظهرلها بعدين حتى لو المرادي جبت هديه


ماتخدش حاجة


بالتوفيق

في انتظار باقي احداث الحكاية
لو صاحب الموضوع راح من غير الدبدوب ياتري هيكون ايه رد فعل البنت؟

انا اعتقد انها هتمثل دور المصدومة وهتقوله انا مش هقدر اكمل مع حد مش بيقدرني وبخيل زيك

وتبقي نهاية الحكاية..."انفصال" علشان خاطر دبدوب ملوش اي فايدة
وساعتها هتكون انت الكسبان لأن الحياة مش مستحملة سخافات وتافهات البنات

الموضوع بسيط يا جماعه مش عارف ليه كبرتوه
وليه يا اما تجيب دبدوب ب 1000 ج يا اما تخش بايدك فاضيه ما في حلول وسط كتير
اقلها ان تجيب دودوب برنج طبيعي مش 1000 والاسعار الغريبه دي

العتبه والموسكى كليانين ومعاك من 80 جنيه

اللهم لك الحمد
ربنا يباركلي فيها ويجمعني بيها في الحلال
انا بصراحه كنت خايف يطلع اختياري غلط
لان البنت دي انا خطبتها بعد حرب دامت لاكثر من 4 شهور
بس بردوه اخدت بنصيحه اخواتنا الكبار هنا وعملت بكلامهم
لان اكبر منك بيوم------------
دا غير ان دي ناس متجوزه وعلي درايه اكتر مني
مع العلم ان انا عارف شخصيت البنتت دي كويس
بس دا ميمنعش ان فضولي الح عليه اخوض التجربه دي
روحت وانا معايا شيكولاتايه من الي هي ب20 جنيهمن حلويات مصر في طنطا
وروحتلها علي معادنا واتغديت معاها عندها
واديتها الشيكولاته فرحت بيها جدا وباستها وادتني نصها
ويعدين قولتلها مش هينفع اجبلك الدبدوب عشان انتي عارفه ان كل فلوسي رايحه علي
المشروع الي بعمله دلوقتي
قالت كفايه عندي اني اشوفك قدامي دي عندي اكبر هديه
وبعدين هو انت كنت عايز تجيب الدبدوب بكام الي انا فهمته من كلامك ان الموضوع كبير
قولتلها انا سالت علي لقيته ب1200
اتصدمت ووشها جاب الوان وقالتلي هو انت كنت رايح تشتريه ب1200
هو انت مش تعبان في الفلوس
وخدتني ونزلنا وقالتلي تعالي اوريك الدبدوب الي انا عايزاك تجبلي زيه
موجود هنا علي اول الشارع في محل لونه احمر والدبدوب في اول رف يمين
انا فعمت منها انها عارفاه كويس لانها رايحه قاصداه مش رايحه بشكل عشوائي
ولقيت سعره متعلق عليه ودي كانت المفاجأه 45 جنيه(خمسه واربعون جنيها) ههههههههههه
هو محل بسيط في القريه بتاعتها
بقولها دا الي نفسك فيه قالت اه
هاتعولي في عيد ميلادي (يعني لسه في شهر 4)
دخلت جبتهولها وهي مصممه ان اخليه لعيد ميلادها
واخدت البرفيوم من العربيه ورشيت عليه ورجعت فرحانه بيه جدا جدا جدا جدا
واتصورت جمبه اكتر من 50 صوره (هبل بنات بقي)
وتاني مره شكرا لاخواتنا الي دايما يقدملولنا النصيحه
ويارب نفضل كدا منبخلش علي بعض بالنصيحه لوجه الله
واللهم صل وسلم وبارك عليك ياسيدي يارسول الله

^^

لفت نظري حاجه


هل الهدية عندكم بتتطلب عادي ؟


تصوري ان مفهوم الهدية و جمالها في انها تكون مفاجأة

الهدية مش ان نفسها في الدبدوب لانها ممكن تشتريه


ولكن بيكون جمالها ان الشخص اللي بتحبه يكون فاهم هي بتحب ايه ويجبلها اللي بتحبه بدون ماتتوقع

طب استخبى بقى واداري اليومين دول عشان العين حق ههههههههه
ربنا يباركلك فيها

هى ممكن نفسها فعلا فى حاجه رمزيه زى دى قال ايه تمسكها وتفكرها بيك وكده واحلام البنات والايام الجميله للبنت فى خطوبتها

لاتنتظر عيد ميلادها وهات لها الدبدوب وبعدين الحمد لله طلع سعره بسيط جدا ........... فرحها... وافرح انت كمان..وربنا يقدرك على سعادتها ويقدرها على سعادتك انت كمان. هو فيه احلى من ايام الخطوبه ...وبعدين ربنا معاك التقيل جى ورا: )

اقتباس:

---

المشاركة الأصلية كتبت بواسطة إنسانة

^^

لفت نظري حاجه


هل الهدية عندكم بتتطلب عادي ؟


تصوري ان مفهوم الهدية و جمالها في انها تكون مفاجأة

الهدية مش ان نفسها في الدبدوب لانها ممكن تشتريه


ولكن بيكون جمالها ان الشخص اللي بتحبه يكون فاهم هي بتحب ايه ويجبلها اللي بتحبه بدون ماتتوقع

---

مفيش حد بيطلب هديه ولا هو دا العادي
بس انا وهي واخدين علي بعض جدا
حتي اما جيت اجبلها هديه بعد الخطوبه خيرتها بين سمارت فون ولاب توب لان طبيعه كليتها لازم لاب
وهي بتاخد لاب اخوها فقررت اجبلها لاب وبعدين قولت اسالها بردوه
وبعد محايلات واصرار مني علي الهديه قالتلي انها اخدت لاب اخوها واخوها جاب واحد تاني
اصبح هي كدا في حاجه للفون اكتر
انا رأيي هو دا التفكير العملي الي يأسس اسره ناجحه

اقتباس:

---

المشاركة الأصلية كتبت بواسطة subhimust

طب استخبى بقى واداري اليومين دول عشان العين حق ههههههههه
ربنا يباركلك فيها

---

ربنا يخليك يارب
قل لن يصيبنا الا ماكتب الله لنا
صدق اللع العظيم

اقتباس:

---

المشاركة الأصلية كتبت بواسطة طارق _عبد السلام

هى ممكن نفسها فعلا فى حاجه رمزيه زى دى قال ايه تمسكها وتفكرها بيك وكده واحلام البنات والايام الجميله للبنت فى خطوبتها

لاتنتظر عيد ميلادها وهات لها الدبدوب وبعدين الحمد لله طلع سعره بسيط جدا ........... فرحها... وافرح انت كمان..وربنا يقدرك على سعادتها ويقدرها على سعادتك انت كمان. هو فيه احلى من ايام الخطوبه ...وبعدين ربنا معاك التقيل جى ورا: )

---

ربنا يخليك يا استاذ طارق
وربنا يقدرنا علي الي جاي

انت بصيت عند kitty وفـ حسان؟
بتبقي في حاجات حلوة ومش هتعدي 200 ج

اقتباس:

---

المشاركة الأصلية كتبت بواسطة graffittiii

انت بصيت عند kitty وفـ حسان؟
بتبقي في حاجات حلوة ومش هتعدي 200 ج

---

كيتي الي في عمر وحسان والنادي وكل دول اسعارهم هبله
دا بيبيع العلبه بتاع الهدايا الي يادوب اخرها 15 جنيه متسعره عنده 60 جنيه