يعني ايه موتور ذاتي التحضير؟

**acura** · 01-12-2015 01:30 AM

كنت بدور على موتور مياه وقابلت مصطلح (ذاتي التحضير) عايز اعرف معناه ووظيفته بالتحديد، وليه المواتير النص حصان مفيهاش الخاصية دي؟ وياريت تنصحوني بالموتور الافضل لشقتين فوق بعض في بيت من دورين، الموتور في الحالة دي هيركب في الدور الارضي ولا الدور التاني؟

**cameeron** · 01-12-2015 11:22 AM

التحضير الذاتى بيرفع الميه اول ما تفتح الحنفيه اما العادى فالازم تشغله من الزرار الاول وبعدين تفتح الميه
الذاتى ليه بالونه والعادى لا

**Elawany13** · 01-12-2015 03:18 PM

المشاركة الأصلية كتبت بواسطة cameeron

التحضير الذاتى بيرفع الميه اول ما تفتح الحنفيه اما العادى فالازم تشغله من الزرار الاول وبعدين تفتح الميه
الذاتى ليه بالونه والعادى لا

كل مواتير التحضير الذاتى عليها بالونه

Sent from my GT-S6500D using Forum Runner

**Elawany13** · 01-12-2015 10:41 PM

المشاركة الأصلية كتبت بواسطة acura

طيب اسمع ان مشاكل البالونة كتير وفي بديل اسمه اوتوماتيك معنى كدة لو موتور بخاصية التحضير الذاتي لازم بالونة؟ ياريت بس توضيح للنقطة دي

أنا عندى ماتور كالبيدا 3/4 حصان راكب بقاله بتاع 20 سنة تقريبا بس مفيهوش تحضير ذاتى وعليه الاتوماتيك والبالونة وبقالى كام سنة فى عذاب من موضوع المياه
المياه عندنا ضعيفة والماتور لما بيشتغل مش بيفصل خالص لا من بعد العشاء كده بساعه ولا اتنين يشتغل ويفصل طبيعى جدا ومن الساعه 8 الصبح يعلق تانى
ياعنى بيشتغل كويس لما المياه تكون قوية فقط
وغالبا يوم الجمعة المياه بتفضل قاطعه عندنا من بعد الصلاة لحد الواحدة فجرا
والغريب ان الجيران مركبين مواتير صينى من الرخيصه جدا ومعندهمش المشاكل ديه

جبت سباك علشان يشوف فيه ايه اول ما شاف الماتور قالى الماتور ده مفيهوش تحضير ذاتى غيره علشان ترتاح
جبت أعلى ماتور صينى 1 حصان اسمه الجندى بتحضير ذاتى تقليد الكالبيدا بـ 480 جنيه
وكان نفسى اجيب الفلوماك بس كله نصحنى بلاشة علشان محدش فى الصنايعيه فاهم فيه
وركبت الماتور على البالونة والاتوماتيك القديم وبسم الله ما شاء الله المياه عندى فى البيت بقت تمام

**Mecha** · 02-12-2015 03:26 AM

الاول نعرف يعني ايه تحضير
التحضير يعني الميه تملا فارغة الطرمبة وبعدها
تكون جاهزه للضخ
لو الميه موصلتش بتحصل ظاهرة التكهف
الميه تتحول لبخار وتتلف الطرمبه ومش هيوصلك ميه سايله
الطرمبه العاديه مجرد مروحه في جسم ومحسوب الخلوص بينهم
الطرمبه تحضير ذاتي فيها جسم ممتد اكبر ووصلة فنشوري
بتمكن الطرمبه تملا اي تحضر نفسها بصعوبات اقل
وعشان كدا سعرها اغلي
نوع التحضير مالوش علاقه بالبالونه، اللي هي
خزان ميه صغير للتصريفات الصغيره زي براد شاي او كسروله
والتصريفات الصغيره دي ممكن تجهد المتور بالتشغيل والفصل المتكرر
والطرمبه كل ماتقرب للارض افضل

**lonedoctor** · 02-12-2015 05:20 AM

موضوع البالونة ده خلاص راحت عليه والان فيه جهاز اوتوماتيك جديد بيسموه فى مصر فلوماك لانه البالونة والاوتوماتيك القديم اصلا سيستم فاشل وغالبا لازم يعطل ويتغير كل سنة اما الاخر بيعتمد على فتح واغلاق الحنفية لفتح واغلاق الموتور
افضل المواتير كالبيدا بلا منازع صوت منعدم تماما وعمر افتراضى طويل والغالى تمنه فيه
انا لسة شاريه للفيلا عندى واحد حصان بالاوتوماتيك بتاعه 2200 جنيه من شركة الشرق اللى فى وسط البلد
مع العلم الضمان 6 شهور بس وتناكة ابوهم مالهاش حد كانك رايح تشحت منهم
افضل سيستم تضمن بيه ماية بشدة محترمة جدا تجيب تانك (خزان)بولى ايثيلين 1000 لتر ب 800 ج وتحطه فوق السطح وتجيب موتور نص حصان بس يرفع على الخزان والخزان يغذى الشقة هتضمن اشياء ممتازة جدا
مياة مندفعة بشدة اقوى من اى موتور اساسا فى اى وقت تفتح الحنفية
ماية تكفى 6 افراد 3 ايام لو حصل انقطاع مياه
توفير كهربا تشغيل الموتور بشكل كبير لانك ممكن تشغله مرتين فى اليوم ب يعبى الخزان كل مرة لن تتعدى نص ساعة
ده افضل حلول المياه عن تجربة واقعية فى شقة وفيلا
تقبل تحياتى

**Elawany13** · 02-12-2015 08:16 AM

المشاركة الأصلية كتبت بواسطة acura

متشكر جدا استاذ علواني على المعلومات المفصلة دي ومبروك على الموتور الجديد انا بحثت على اسعار الكالبيدا تقريبا 3/4 حصان 1500 جنيه وفيه خاصية التحضير الذاتي الي فهمت انها مهمة لقوة سحب المياه ومتردد بين الكالبيدا وبين المواتير الصيني خصوصا ان فرق السعر كبير جدا بس مايل ناحية الكالبيدا عشان اكبر دماغي من الاعطال وربنا يسهل واشتري اليومين دول ان شاء الله

انا كنت زيك كده وبقول مستحيل اغير الكالبيدا اللى عندى بصينى
بس اعرف ناس كتير حواليا كلهم مركبين مواتير صينى من الل بـ 150 و 200 جنيه وبسم الله ما شاء الله بقالها معاهم سنين طويلة ومفيش اى مشاكل منها
ومعتقدتش ان المواتير فى تقنيات عالية يتخاف منها
تقليد الكالبيدا الصينى فيه منه كذا نوع وبيبدأ سعره من 370 جنيه الى 510 جنيه وبعد الفصال جبته ب 480 جنيه
بصراحة الكالبيدا سعره بقى أوفر جدا جدا