حضرتك من اللى انت قلته أنا فهمت إن الموتور اللى راكب حالياً مش بتاعها - وبالبحث فى النت اعتقد إن موتورها الأصلى كان اقل مقاس فيه ٤١٠٠ سى سى بنزين ٦ سلندر لاين بقدرة ١٣٠ حصان وعزم ٢١٠ نيوتن.متر - نسب تخفيض الكورونة الأمامية والخلفية ٤,١١ - ويطلق على الموديل ده k10. وأنصح حضرتك بالأتى :
- لازم تتأكد هل الموتور ٣٥٠٠ زى ماصاحبها قالك ولا ده موتورها الأصلى الـ ٤١٠٠ وهما كاتبينه كده فى الرخصة - لو ده موتورها الأصلى يبقى كده حتقدر تعمل اى شغل فى العربية من غير مخاطرة لأن لو كان ده مش الموتور الاصلى يبقى اكيد فيه حاجات كتير اتعدلت فى العربية زى مثلاً أعمدة الكردان الأمامى والخلفى والفتيس والكوارين بالأكسات يعنى لو ده مش موتورها الاصلى يبقى معالم العربية الاصلية ضاعت و يبقى من الأسهل انك تعمل المستحيل علشان تصلح موتورها اللى راكب فيها علشان لو عملت اى حاجه تانية مش حاتضمن نتيجيتها.
- لازم كمان تتأكد من إن الكوارين اللى فيها الأصلى وده تعرفه بإنك تعمل علامة فى عمود الكردان وعلامة على طنبور عجلة وترفع العربية وتلفف عمود الكردان الخلفى مثلاً لفة واحدة وتشوف الطنبور بتاع العجلة إللى على الاكس بتاع الكردان الخلفى مثلاً حايلف كام لفة - لو طلع ٤,١١ لفة للطنبور فى مقابل لفة واحدة لعمود الكردان يبقى كده انت عندك الكوارين الاصلى - (طبعاً تتأكد إن عمود الكردان الأمامى موجود اصلاً مش مخلوع )
- تتأكد إن فتيس الغرز بتاعها الاصلى (إذا كان راكب اصلاً ) وده بيبقى طرازه np205
- لو الموتور كان أصلى يبقى كده بنسبة ٩٠٪ باقى الحاجات اصلية وتقدر بقى تبدأ تشوف الدنيا هل يمكن إصلاحه ولا لأ - مش شرط إنه بيدخن يكون الموتور بايظ ممكن يكون الكرابتير عاوز يتظبط أو يتغير أو حاجه فى الكهربا - هل لما بيدور فيه صوت وحش زى صوت البيلات مثلاً ولا صوته كويس - يعنى اكشف عليه كويس.
- لو الموتور مش بتاعها يبقى اكيد حصل فيها تعديلات كتير ومعالمها راحت ويبقى خيارك الوحيد هو إنك تصلح الموتور وتمشى بيها كده - يعنى فى كلتا الحالتين لازم تصلح الموتور سواء اصلى او مش بتاعها - بس الأصلى حيديك نقطة تبدأ منها بداية مضمونة لأن باقى الحاجات اصلى ومحصلش تعديلات يعنى معالم العربية ماراحتش - عاوز بقى تغير وتعدل حايبقى براحتك .
أرجو إنى أكون وصلتلك الفكرة وهى إنك لازم تتأكد من الموتور والجر اللى فى العربية - تغسل بقى الموتور تشوف كل اللى مكتوب عليه - تقيسه طول وعرض وارتفاع (حاأحاول اشوفلك مقاساته) - تعمل تجربة قياس نسبة تخفيض الكوارين - تشوف عمود الكردان الامامى موجود ولالأ - تتأكد من طراز فتيس الغرز وهو بيبقى متبرشم عليه دايرة حمرا الومنيوم قطرها حوالى ٣ او ٤ سم .
المفضلات