الموضوع ده متجدد
هو عن دكتور مصرى شاب عايش فى المانيا وبيحكى موقف حصل معاه هناك
بالمناسبه ده موقف واحد بس من مواقف كتيره جدا
لما اشتريت العجلة طبعا كانت كلها متتفككة .. ومكنش معاها أى عدة أركبها بيها .. فقلت ف نفسي كمصرى أصيل : وأنا أشترى عدة بحالها ليه ومش هستعملها الا مرة واحدة .. منا ممكن أستلف من أى حد ألمانى العدة بتاعته وخلاص ..
وانا نازل من السكن قابلت واحدة ست طالعة وغاليا كده مقيمة هنا هى كمان فسألتها عادى .. لقيتها معاها عربية بس قالتلى هشوفلك مع أى حد من أصحابي وهبقى أرد عليك .. أنا طبعا محطيتش ف دماغي لان طبيعى ما دام مش عندها يبقي هتوجع دماغها عشان واحد متعرفوش ليه ..
تانى يوم بفتح صندوق البريد بتاعى لقيت فيه الورقة دى ودا اسمها .. واللى مكتوب فيها : عزيزى السيد خليفة .. للأسف مقدرتش أتصرف فى عدة للعجلة بتاعتك .. ممكن تشترى واحدة ممكن محل * أوبي* .. أتمنى لك التوفيق .. مع تحياتى .. شتيفانى بروست .
الست دى أنا مقابلتهاش تانى عشان أشكرها أنها فعلا سألت واهتمت ولما معرفتش تتصرف كتبت الجواب ده ونزلت حطته فى البريد بتاعى ..
أنا بتخيل نفسي لو كنت مكانها مكنتش هعمل كده للأسف ..
احنا للأسف عاملين نفسنا حكام على خلق الله : أفريقيا جعانين .. والخلايجة جهلة واحنا اللى علمناهم .. والألمان عنصريين .. والانجليز باردين .. واحنا اللى متدينين ..
لكن للأسف أنا بكتشف كل يوم ان احنا اللى فينا العبر ..
وده بقى لما اشترى العجله وده موقف تانى
الحمد لله اشتريت عجلة متواضعة كده من على النت .. لما وصل الطرد للسكن بتاعى اكتشفت انها بتيجى متفككة , ولازم الواحد هو اللى يركبها بنفسه او يوديها لحد متخصص يجمعهاله..
المهم ركزت مع نفسي كده كام يوم وجمعتها ..بس نظام الفرامل لقيته صعب عليا ومعرفتش اظبطها ومعنديش منفاخ للعجل ..
رحت لعجلاتى هنا ف المدينة وسألته على السعر ..قالى فحص العجلة كلها والتأكيد من تانى على كل الصواميل ونفخ الكاوتشات وتظبيط الفرامل هيكلفك 20 يورو .. اتفقت معاه واخدت معاد النهارده الصبح الساعة 11 ..
سيبت العجلة عنده ورجعت بعد ساعة زى ما اتفقنا شفت العجلة لقيتها متظبطة والفرامل تمام .. طلعت ال 20 يورو واديتهاله لقيته بيرجعلى 10 يورو .. قالى انا لقيتك مظبط الصواميل كلها وبالتالى انا مبذلتش جهد يستحق ال 20 يورو دول كلهم .. أنا بذلت جهد يستحق 10 يورو بس ..
أنا كنت متفق معاه ع المبلغ ده وراضى بيه .. وماشوفتهوش وهو شغال .. كان ممكن بكل بساطة يقول انا ظبطلك الدنيا و عملت وسويت والدنيا كانت خربانة وانا صلحتها .. بس ضميره منعه انه يعمل كده ..
منقول
http://www.nilemotors.net/Nile/attac...1&d=1449356495