استفسار ..Fiat Doblo Classic ..فيات دوبلو كلاسيك

لما قريت استفسار حضرتك دورت على صورها
وشفتها على كونتاكت كارز وسعرها
هى فان 7 راكب وب 133 الف جنيه
وشكلها جميل
لكن عمرى ما شفتها ماشية فى الشارع
من رأيى:
ان فيه عربيات كتيرة جدا قوية وجميلة وبأمكانيات مهولة دخلت مصر وخرجت من غير ما يتحققلها النجاح بسبب عدم انتشارها
ده بيخليك لو اشتريتها مجبر طول الوقت للتوكيل (اللى حتى لو كويس): هيفضل خيار وحيد وغالى
ويحصل اعراض الاحتكار: السعر كده والخدمة كده ومفيش بديل.
المشكلة التانية:
سعر اعادة البيع..
العربية الغير منتشرة: رغم انها كويسة بطبيعة الحال اول خمس سنين لكن لازم هيبقى فيها شوية حاجات بتتابع وتتغير بعد كده..ممكن حضرتك ما تتعرضلهاش لكن اللى هيشتريها منك هيتعرضلها بسبب الاستهلاك الطبيعى وانتهاء العمر الافتراضى لبعض القطع..
ده اللى بييجى فى دماغ اللى هيشترى منك
هيشترى ليه هو ساعتها عربية راحت بهجة الزيرو منها..واتبقى المشكلة الاكبر ليها وهى الاصلاح وقطع الغيار؟
ده يخلى سعر اعادة البيع فى الارض وطول فترة العرض لحد ما تبيع..
ودى ارزاق طبعا ومفيش قانون نهائى.
بالمبلغ ده معاك دايرة اختيار واسعة.. اتمنى تشوف الانسب والاحسن
وربنا يوفقك فى الاختيار الامثل اولا واخيرا.