الموضوع: بيجو 508 من التفكير الي القرار وشهرين من التجربه

انا من مالكي شيفورليه اوبترا سابقا ...سياره اعتماديه ممتازه بلامشاكل تقربيا لو شاريها من الزيرو ومحافظ عليها ..طلعتها جباره وتسارعهاحتي 100 كيلو رهيب ....كان قرار تغييرها مش لعيب معين لكن للتحديث وتعليه الموديل
المهم ...بعد البحث و التدوير و برضه كنت محكوم بالمبلغ اللي معايا كان نفسي في مرسيدس او بي ام موديل معقول وحاله كويسه لكن للاسف من 180 الي 200 الف مش هتلاقي موديل حديث وعداد قليل في الفئات اللي تنفعني
المهم لقيت بيجو 508 عداد 40 الف اول فئه سوداء حالتها كويسه وسعرها كويس والقرار كان صعب رغم ان مالكي السياره مبسوطين بيها لكن برضه بيجو في السنوات الاخيره سمعتها مش تمام ...و كمان معايا 301 وواجهني مشكلتين فيها صحيح مشاكل بسيطه بس الاوبترا كانت بلا عيوب خالص ....بس في الاخر البيجو كانت احسن قيمه بالفلوس اللي معايا

المهم ..اشتريت وعدي شهرين و عملت حوالي 3500 كيلو فيهم سفر لدمياط الجديده واعتقد اني استطيع ان اقدم تقرير عن السياره بكل وضوح وحياديه
العيوب ....توكيل السياره من نقاط الضعف خاصه فرع ابو رواش وان كانت الفروع الاخري خاصه فرع اوتو سيرقس ومؤخرا غمره في تحسن مستمر
ماكنه الزجاج بالنسبه للشكل القديم بتتكسر ودي ممكن تحلها عند اي حد بتاع ابواب بمبلغ لا يزيد عن 200 جنيه
الصاج في الجزء السفلي من الابواب ضعيف سنه
االكاسيت صوته اقل من المطلوب
لبلوتوث بيعلق احيانا

المميزات ...استجابه السياره ممتازه رغم وزنها اللي بيتعدي طن ونصف مع موتور 1600 سي سي 156 حصان للشكل القديم وعزم 240 نيوتن و لما شخص كان بيسوق الاوبترا يقول ان عربيه استجابتها كويسه لازم تعرف ان استجابتها جباره لان الاوبترا طلعتها طياره
االتسارع ممتاز جدا و وصلت بها لسرعه 205 والعربيه لسه فيها وثباتها ممتاز وكمان المناوره ممكنه وسهله
الثبات حكايه و مهما شعرت بالخوف لان في حاجات لاول مره بتعملها بالسرعه دي الا ان انظمه الثبات ومنع الانزلاق المزوده بها السياره تخليك واثق جدا منها
التكييف مش بياثر علي السحب نهائيا و التكييف ممتاز اقل شئ بسيط من الاوبترا مع العلم ان تكييف الاوبترا تلاجه
تقفيل السياره ممتاز وجميل
زراير كنترول الطاره مترتبين كويس بتوصل للي انت عايزه بسهوله
الشنطه واسعه جدا
المرايات الجانبيه كاشفه الطريق كويس جدا
الشكل الخارجي جميل بيدي شعور بالشراسه والقوه
عفشه السياره ناعمه جدا جدا مش ماشيه مع ثبات العربيه خالص
الفتيس من انتاج شركه ايسين اليابانيه اللي بتعمل لتويوتا ومازدا واللي عامله فتيس الاوبترا كمان ..الفتيس 6 سرعات واستجابته ممتازه والكيك دون خطير جدا لانه بيحول العربيه من الرزانه والهدوء الي شراسه واندفاع جبار
السياره بها 6 ايرباج و ضوء نهاري و فوانيس شبوره تضئ حسب اتجاه الدريكسسون كاسيت سي دي و usbو aux وفتحتين 12 فولت امامي وخلفي و مثبت ومحدد سرعه وجنط 16 ومرايات ضم و ABSوEBDو ESR و TCS بور هيرولكي كهربي حساسات خلفيه تظهر علي الشاشه بصوت تنبيه و بلوتوث و شفتات طاره و درج ثلاجه وتكييف خلفي
النتيجه النهائيه ان السياره فعلا من اجمل ما انتجت بيجو ولو استمر السعر كما هو عليه واستمر التوكيل في التحسن لاستطاعت ال 508 ان تعيد امجاد بيجو السابقه ..وشكرا

شكرا للاخوه اللي شاركوا في الموضوع
بالنسبه للبطاريه فلها مقاس معين ويمكن تغييرها باي نوع طالما نفس المقاس ولكن لها طريقه في التغيير لضمان عدم تاثر وظائف السياره الالكترونيه
بالنسبه لعيوب ال 301 فهي حساسيه للبنزين السئ و تكييف متوسط و تسارع سئ مع التكييف
بالنسبه للسعر فالسعر السوقي للمواصفات السابقه من 180 الي 190ولكن السعر الخاص بي كان مختلف لظروف خاصه افضل عدم ذكرها