الموضوع: قصة شراء ( ازاى اشتريت اسبيرنزا)

بداية السلام عليكم ورحمة الله وبركاته

اول مشاركه ليا من ساعة ما دخلت المنتدى ، بس حبيت بعد حوالى شهرين من انضمامى للمنتدى احكى قصه لكل المهتمين بالاسبيرانزا A516 ،فيا ريت اللى مهتم اوى يقرا للاخر

من قبل رمضان يعنى من حوالى 3 شهور قررت اشترى فيرنا 1600 كامله

لان كنت عامل ميزانيه 70000 جنيه بس ، فقرارى النهائى الفيرنا وبس

ومكنش فى دماغى اى حاجه تانيه بصراحه لانى كان معايا اكسنت وقلت ابيعها واجيب زيرو بقى علشان بصراحه قرفت من المستعمل ودوشته

انا اولا مدير مشتريات فى احدى الجهات الرائده فى مجالها ( ولا داعى لذكرها )

يعنى مدير مشتريات بيشترى حاجه لنفسه .

البدايه عندى بدات لما رحت معرض صغير لقيت الـa516 معروضه واعجبت بيها جدا وبالاوبشن والكماليات وكده

وطلعت من المعرض بقول لنفسى يع صينى يا فرحتى بالاوبشن هيا الفيرنا وبس

المهم تعمقت اوى فى مزايا وعيوب الفيرنا ، وركبت الفيرنا وسقتها وكان ده انطباعى عنها :

- موتور قنبله تحفه ما شاء الله
- صالون ضيق ويخنق
- عربيه ميزتها انها زيرو

ساعتها قلت افكر فى غيرها ، وبرضه انا فى دماغى اجيب فيرنا

قلت اشوف الافيو اهى شيفروليه وحاجه مضمونه ، لقيت علشان اجيب الفول اوبشن بتعاها الكورى لقيته بـ 80000 والفول اوبشن بتعاها هو اتنين زجاج كهربا امامى فقط والابواب اللى ورا زجاج عادى غير ان صاجها ضعيف

ومعجبتنييش بصراحه لانى مدفعش 80000 فى عربيه فقيره زى ديه ، ومع ذلك احترم اراء الاخوه اللى بيقولوا عليها عربيه تحفه لان ديه مسألة اذواق

بس كان بالنسبالى الفيرنا ارحم ، قولت بعد كده اشوف الرينو برضه نفس النتيجه اللى وصلتلها للشيفروليه

المهم مبقاش فى دماغى دلوقتى الا الفيرنا ، قلت طب ابدا بقى البحث الميدانى

انا دلوقتى رسيت على الفيرنا وعرفت فيها ايه وبكام ، قلت انزل اسأل الناس عن الفيرنا وبالمره اسأل اللى راكبيين الاسبيرنزا.

كانت النتيجه عن الفيرنا ( على فكره ده مش رأى ده اراء الناس اللى سألتها ) من كل 5 لقيت واحد بيشتكى والخمسه كل اللى بيقولوه كويسه وبس .

انا لما بشترى حاجه وبتعجبنى بقول عليها تحفه .

طبعا مش هاقولك الناس قالت على الفيرنا ايه لان ديه أراء فرديه واذواق لان فيه واحد يقولى صاجها خفيف فى واحد تانى متفرقش الحكايه ديه عنده .

انما انا كشخص لسه بفضل الفيرنا

المهم حولت بقى على الاسبيرنزا

انا كنت سألت حوالى 5 عن الفيرنا ، انما الاسبيرنزا طوال شهر كامل سألت حوالى 10 او 13 حاجه بين الرقمين دول

مفيش حد فيهم قالى يعنى ، كله قالى تحفه

و سألت ناس تانيه اللى مش راكبيين الاسبيرنزا معظمهم قالولى اوعىىىىى الصينى

ولما سألت ليه ؟ قالوا صينى

وقلتلهم طب الفيرنا اه ليه ؟

قالوا غبورررررررررررررررررررررر ررررر

طب ماهى اسبيرنزا ابو الفتوح !!!

لا لا لا الموضوع كبر اوى

اصل انا مش هاشترى كاسيت

مسكت ورقه وقلم بعد بحثى على النت وبحثى الميدانى :

الاسبيرنزا ( لعلمكم انا بعد بحثى عن الاسبيرنزا ولما روحت اشتريها لقيت ناس بتسأل عن مواصفاتها انا كنت بجاوب احسن من البياع )

المهم الاسبيرنزا A516 :

موتور صينى بتكنولوجيا نمساوى من شركة AVL http://www.avl.com

عفشه مش رياضيه علشان محديش يضحك على حد هو بس نظام التعليق فيها كويس

صاج ممتاز واقوى من الفيرنا

كل ما تتخيله من الكماليات ( الكماليات والاوبشن كتير اوى مينفعش اقولها هنا ) ( يعنى تحس ان اللى عاملك العربيه ديه ابوك يعنى مهتم بأدق ادق التفاصيل )

صالون واسع وجميل وشيك وتابلوه اشيك ( خلى بالكوا انا بتكلم بالنسبه للعربيات اللى فى سعرها ، يعنى محديش يجى يقولى التويوتا احسن هاقوله طبعا احسن )

العربيه دهي اسمها فى بلدها شيرى ابو الفتوح غير اسمها لاسبيرنزا وكمان الكاسيت فى بلدها مش كلاريون انما ابو الفتوح شاله وحط كاسيت كلاريون .

ضمان 3 سنين او 100 الف كيلو ( فى ايه تانى يعنى )

الفرنا بقى :

عربيه خفيفه جدا ، صاج كويس بس ضعيف ، صالون ضيق ( خصوا فى الخلف ) ، مفيهاش اى كماليات ولا اى جنوط والتبلوه مش قد كده

الفيرنا تتميز عن الاسبرنزا فقط فى موتورها وعفشتها ناعمه شويه انما مش احسن مش معنى ان الاسبيرنزا عفشتها ناشفه حبه يبقى ده عيب .

المهم مطولش عليكوا ، بعد أراء الناس اللى جربوها وركبوها ، فضلت عندى مشكله واحده بس

اللى هيا اعادة البيع

وانا ببيع عربيتى القديمه وشوفت الاسعار ولقيتها بتتباع اطمنت ( بس خلى بالكوا الفيرنا هاتتباع اسرع الا ان الاسبيرنزا تتغير سمعتها او سمعة الصينى عاما )

انا كده شلت الفيرنا من دماغى وخلتنى فى الاسبيرنزا

قلت بقى اروح اشوف الصينى التانى زى ال byd لقيت لا سمعه للعربيه ولا للتوكيل .

كده انا عملت اللى عليا وسألت بضمير ( متتخيلوش انا كنت بوقف الناس بالنص ساعه اتكلم معاهم )

فاضل النقطه الاخيره ، وهيا الاستخاره وطلب العون من المولى عز وجل

وبالفعل ولله الحمد والشكر صليت واتسخرت ربنا اكتر من مره وتوكلت عليه

والنهارده استلمت عربيتى ومعندكومش فكره ولله الحمد والشكر قد ايه العربيه جميله جميله جميله بالنسبه لسعرها والعربيات اللى فى فئتها من السعر .

عاوز اقول حاجه

العربيات التانيه جميله وانا مبعبش فيهم ، واى حد هايقولى الفيرنا حلوه هاقوله فعلا حلوه واضمن شويه من الاسبيرنزا بس انا قارنت بينهم من وجههة نظرى انا وتحليلى انا ملقتش وجهه مقارنه وبعدت عن الفيرنا ولكن الا الان وبقول لو مكنش فيه اسبيرنزا A516 كنت جبت الفيرنا طوالى ...

نصيحه اخيره من الناس اللى بتدور على اى عربيه ، متصدقوش كل اللى بيتقال على النت ، ومتكدبوش كله ، اللى عاوز يشترى حاجه يكافح ويسأل عليها بموضوعيه ، استعمل النت فقط انك تاخد فكره وتجمع معلومات منه وبس وخد الكلام ده ونزل بيه الشارع وشوف .

وخلى بالك انك اهم من ده كله تعتمد على الله وتستخيره فى كل امورك

المهم خلى بالكوا من اللى عاوز يشترى الاسبيرنزا :

وانت بتسوقها لاول مره عصا الفتيس ناشفه بس ده مش عيببببببببب

وانا بجد بشكر كل الناس اللى فى المنتدى الجميل ده والقائمين عليه وبجد موقع يعتمد عليه من اداره واعضاء

وكلمة اخيره انا مبحبش اذم فى حد بس يا جماعه اوعى حد يصدق كلام الناس اللى فى منتدى speranzaclub لان بجد دول بيسؤا لسمعة العربيه ، يعنى ايه لازم اكون مالك للعربيه الاول علشان اقدر اشارك معاهم ؟ امال انا داخل عليه ليه ؟ علشان اعرف العربيه ديه ايه بامانه ملقتش اى فايده تذكر منه غير انى لازم اشترى العربيه الاول وانى اقابل صاحب المنتدى قال ايه علشان انول شرف الانضمام ليهم ، كلام ميدخلش دماغ عيل صغير .

ارجو انى مكونش طولت عليكوا

والسلام عليكم ورحمة الله

shankosi

طبعا انا مجربتش ال QQ ولا سألت عنها بس مرت عليا كده بالصدف

وكان انطباعى الظاهرى عنها ( خلى بالك من كلمة الظاهرى ) انها عربيه مستحملش خصوصا الاجواء المصريه

شوف انت امكانياتك كام واحتياجاتك ايه من العربيه ، ولو سعر البيكانتو قريب يبقى خليك فى البيكانتو افضل