الموضوع: مشكله فى طنابير كارينز 2014 والتوكيل رافض يحلها

الساده اعضاء منتدى كيا الكرام

من حوالى سنه ونص اشتريت عربيه كيا كارينز موديل 2014 علشان ساعتها التوكيل كان منزل عليها عرض ومنزل فى سعرها وبصراحه العربيه كانت مناسبه لامكانياتى الماديه ساعتها ومناسبه كمان كسياره عائليه مع امكانيات محترمه خاصه انى مش بتاع جرى ولا شد على الطريق ولا حاجه من الكلام ده بالاضافه انى سمعت عن توكيل كيا انه توكيل محترم وده احد الاسباب برضه انى ما فكرتش اشترى خليجى مع ان العربيه كان موجود منها خليجى وبسعر افضل بس من الحاجات اللى تهمنى جدا فى العربيه خدمات ما بعد البيع فاستبعدت الموضوع ده خالص واصريت انى اشترى وكيل مع العلم ان دى خامس عربيه ليا منهم عربيه تويوتا 2009 والوكيل بصراحه كان فى منتهى الاحترام.
بعد ماجبت العربيه رحت عملت صيانه الخمس تلاف كيلو فى مركز صيانه ابو رواش وبعدها عملت صيانه 10000 و 20000 كم فى مركز صيانه القطاميه علشان قريب من بيتى بس رغم انى لاحظت من اول زياره عندهم افتقادهم لابسط قواعد النظام اللى لمسته فى مركز ابو رواش ده بالاضافه لانهم مش زحمه قوى زى ابو رواش وده حسسنى انهم ممكن يكونوا هيدوا اهتمام احسن بالعربيه لانهم مش مضغوطين قوى زى ابو رواش بس طبعا دى احلام يقظه.
المهم قبل ما اعمل صيانه ال 30000 كم بحوالى الفين كيلو ابتديت احس برعشه فى الفرمله الجامده ومع التسارع بالعربيه من 40 الى 60 كم / سا عه وعرفت على طول ان دى مشكله فى الطنابير الاماميه وقلت هقولهم عليها فى الصيانه بس المشكله ابتدت تتفاقم وبقيت احس بيها يوم بعد يوم بتزيد المهم حاولت احجز ميعاد للصيانه يوم سبت نظرا لظروف شغلى واثناء الحجز قلتلهم عليها فقالولى ما ينفعش السبت لازم يوم تانى لان يوم السبت للصيانات الروتينيه فحجزت يوم الخميس اللى فات واخدت اجازه ورحتلهم وقلت المشكله لمهندس الاستقبال انا وبسلمه العربيه وكتب فى ورقه الاستلام فحص نظام الفرامل بعد تلات ساعات كلمونى علشان استلم العربيه رحت ادفع لقيت الفاتوره معاها ورقه تعبانه مكتوب فيها (تغيير الطنابير الاماميه ) فى سطر والسطر التانى ( تغيير الطنابير الخلفيه) بقوللهم ايه ده قلولو روح لمهندس الاستقبال وهو هيقوللك.
اخدت الورقه ورحت لمهندس الاستقبال بقوله ايه ده قاللى مطلوب تغيير الطنابير امامى وخلفى قوللتله بمنتهى البرأه هو انتوا مش هتغيروها فى الضمان . المهندس ابتسم ابتسامه خفيفه كده وقاللى تعال حضرت ده مكتب المهندس مديرالصيانه خش قوله على موضوعك وهو هيرد على حضرتك .دخلت للبشمهندس مدير الصيانه للمركز بوريلله الورقه قاللى العربيه اللى عامله 30000 كم قولتله اه وطبعا واضح ا ن الموضوع اتناقش قبل كده بعيد عنى وعملوا فيها هبل وقلوا نطنش.
المهم قاللى تعال حضرتك دقيقه واحده واخدن لواحد تالت واضح بقى ان ده الهادى اللى فيهم اللى عنده القدره انه ياخد اللى فيه القسمه من غير ما يتعصب ولا يتنرفز وقد كان بمنتهى الهدوء مع ابتسامه واسعه حضرتك الطنابير دى قطع استهلاكيه ولو حضرتك فتحت دليل الصيانه اللى معاك هتلاقى مكتوب فى اول صفحه ان الاجزاء الاستهلاكيه اللى زى التيل والطنابير ما بتتغيرش فى الضمان بس احنا علشان منزعلش الناس بنمد الضمان للطنابير لل20000 كم بس وعربيه حضرتك عامله 30000 كم ساعتها كنت لسه هادى ساعتها فقولت له بهدؤ برضه انا معاك فى موضوع التيل بس مين يقول ان طنابير عربيه تمنها فوق المتين الف جنيه طنابيرها تبوظ بعد30000 كيلو وما يبقاش عيب صناعه امال عيب الصناعه يبقى ايه فرد على بمنتهى الهدؤ برضه اصل اليومين اللى فاتوا دول كانوا مطر شديد ولما بتسوق وتفرمل الطنابير بتسخن وبعدين تيجى فى الميه ويحصل... بس المره دى بقى ما أستحملتش وقاطعته قولتله حضرتك انا مهندس ميكانيكا وفاهم الكلام ده كويس بس انت برضه لازم تعرف ان عربيات كيا بتمشى فى اوروبا وامريكا اللى المطره عنده اضعاف عندنا وما بييحصلش كده ولو بيحصل كده ما كانش حد اشترى عربياتهم وبعدين لما المطره تنزل ومااركنش عربيتى على جمب واستنى ان الشوارع تنشف ابقى انا الغلطان وابقى مطالب انى اشترى قطع الغيار على حسابى . رد عليا فيما معناه ان ده اللى عنده وانه مش هيقدر يعمل حاجه قولتله خلاص انا هتصرف وهاعرف الناس كلها ان توكيل كيا سمعه عالفاضى وانكم بتتهربوا من مسئولياتكم وقولتله حقى انا هاعرف اجيبه كويس.
دلوقتى بعد اذن حضراتك عايز اعرف ازاى اقدر اجيب حقى وايه المطلوب اعمله مع الناس دى
[/size][/size][/size][/font]

مبروك :)