مشكلة في التنفس وإعتقاد بوجود التهاب في الجيوب الأنفية مين أفضل طبيب أروحله ؟

أنا من صغري وأنا مش بعرف أتنفس كويس والنفس اللي بيدخل من أنفي بسيط جدا
لما بركز بقفل فمي وبتنفس من الأنف بس لو سرحت بتنفس من الفم مرة تانية !
وأنا نايم برضه بتنفس من الفم واللي أكدلي ده اني قفلت فمي بشئ زي اللزق كدة ونمت وطبعا صحيت بعدها بشوية مفزوع وشيلته وكملت نوم !
وفي دكتور كنت رحتله برضه وحط ايده أمام أنفي وقالي خد شهيق وأخدته وبعدين كرر الأمر قلتله أنا أخدته فعلا بس هو محسش بيه !!

المهم من فترة عملت آشعة مقطعية ووريتها لأكتر من دكتور في دكاترة منهم كانوا قالوا في التهاب جيوب أنفية ودكاترة قالوا مفيش أي التهابات والآشعىة دي كنت عاملها من حوالي 3 سنين !

اللحمية كانت عندي ورحت لدكتور قالي السبب منها وشالها بس محسيتش بأي تغيير بعدها ولآ بأي تحسن والكلام ده برضه كان من 4 سنين !

دلوقت أنا محتاج أعرف خبراتكم لو حد مر بالموضوع ده وإيه اللي المفروض أعمله دلوقتي .؟
ولو حد يعرف دكتور كويس ياريت يدلني عليه برضه وتكون أسعاره حلوة ويكون في مدينة نصر أو مصر الجديدة
ولو حد جرب عملية الجيوب الأنفية يقولنا أعراضها وهل فرقت معاه ولا لأ وفترة النقاهة أد اي وسعرها .؟

أنا سني 23 سنة

د احمد سليم... وحاليا عميد طب الازهر

وسط البلد

شفاك الله

شفاك الله وعفاك - اكيد عندك ضيق في مجاري التنفس من الانف ودي عايزة حد شاطر ممكن تكون جيبوب انفيه او عيوب تركيبي للجهاز التنفسي العلوي
طبعا بتشخر وبتقوم من النوم حلقك جاف وطعمه مره بالاضافة لتعرضك التهاب في الانف كتير زي البرد والرشح والحساسيه والصداع والتهاي الاذن الوسطي والتهاب اللوزتين انصحك تتابع مع حد كويس لحد متلاقي السبب وبلاش تتنقل بين الدكاتره

انصحك بالخربوطلى بالمنيل
مجرب لللاسره ولصحابى

متشكر ليكم على ردودكم الجميلة دي وأسأل الله أن ينفع بكم

بس في نقطة محتاج اوضحها
انا مش بتجيلي اي اعراض زي الرشح او جفاف الفم او الطعم المر او الشخير او البرد حتى
يعني حتى البرد مش بيجيلي كتير وبيروح بسرعة الحمد لله
فأنا عايش حياتي طبيعي جدا بس مش عارف هل ده بسبب التعود ولا ايه ؟
الحاجة الوحيدة اللي مضايقاني هي اني محتاج اتنفس من الأنف خصوصا وقت ما ببزل مجهود بنهج جامد ومش بعرف اظبط نفسي وده العرض الوحيد اللي بيحصلي بعيدا عن اي اعراض بتحصل لمريض التهاب الجيوب الأنفية واللي الأستاذ علي مشكور وضحها

فإيه الإجراء اللي المفروض اعمله دلوقت ؟

الف سلامه ومتابع معاك خاصة موضوع عملية الجيوب الانفيه

amr إن شاء الله هنقل تجربتي هنا أكيد بس ربنا يسهل وميكونش فيها عملية يعني لأن في ناس كتير ظهرتلهم أعراض صعبة بعدها وفي منهم فقد حاسة الشم !

الف سلامه عليك يا كبير وان شاء الله تكون بسيطه ونتطمن عليك قريب
حاول تكشف عند حد موثوق وتابع معاه ومتروحش لاكتر من واحد فى نفس الوقت علشان حتحس ان محدش فاهم حاجه تابع مع دكتور واحد فتره ولما تيأس منه شوف حد تانى .
تمنياتى بالشفاء العاجل .

جرب كونجستال
وان شاء الله تكون بخير
كل ماخبرته كان عندى والحمد لله الان

أطلع على دكتور نبيل لاشين فى مصر الجديده
لف لفه على جوجل هتعرف عنوانه