-
bad and mad
امبارح كنت فى زيارة عائلية لاحد اقربائى، وجمعتنى الزيارة مع احدى قربياتى اراها من فترة لفترة، قربيتى هذة ميسورة الحال ، تقطن فى منطقة راقية وتعمل باحدى الشركات العملاقة فى مصر فى منصب لا بأس به، وزوجها لديه عمل خاص محترم، يركبان سيارات انيقة ويعلمان اطفالهما فى المدارس التى يخشى امثالى من الدهماء المرور بجوارها، واطفالها هؤلاء من هذا النوع اللامع البراق الذى يظهر فى اعلانات البطاطس المقلية وجبن المثلثات، لم اقصد بهذة المقدمة طبعا ان اعبر عن اى نوع من انواع الحقد الطبقى :devil:بقدر ما قصدت ان اضعكم فى الحالة النفسية التى كنت فيها علكم تتعجبون مما تعجبت منه
اثناء زيارة الأمس، حضرت قريبتى هذة ومعها طفليها اللامعين، وكان اكبرهما يرتدى سترةsweat shirt من نوع لا بأس به ابدا، لكن الغريب انه كان مكتوب على واجهتها وخلفيتها بخط يمكن قرائتة من على بعد 20 متر
"BAD AND MAD"
بصراحة حاولت افهم ما الذى يمكن ان يدفع هذة السيدة المتعلمة المثقفة التى تمارس حياتها بالكامل بالشوكة والسكينة الى ان تدفع ابنها (6 سنوات-يعرف كلمات كثيرة جدا من اللغة الانجليزية) لارتداء مثل هذة الكلمات العجيبة، وهل كون الكلمات باللغة الانجليزية يجعل منها شئ متحضر ينفى معناها العجيب، يعنى انا سالت نفسى، ليه لو مثلا الولد كان لابس تيشرت مكتوب شئ مماثل باللغة العربية ، مثلا تخيلوا تيشيرت مكتوب عليه "غشيم ومتعافى" أو حتى كان مكتوب عليه كلمات رقيقة باللغة العربية فاننا نعتبر من يرتديه "واد بيئة" ، لكن مجرد ان الكلمات اصبحت باللغة الانجليزية فهذا اعطاها رونقا وجمالا يجعلنا نقبل ان يرتديها طفل فى عمر الزهور ونحن فى منتهى الزهو بما غرسنا فيه من قيم ومعانى
بالمناسبة فان قريبى الذى كنا جميعا نزوره(وهو قريب مشترك بينى وبين القريبة صاحبة الحكاية) عائد لتوه فى اجازة سنوية من استراليا حيث يقيم ، وعندما قمت بلفت نظره الى ما يرتديه الطفل الأمور قال لى بالحرف"ايه القرف ده، الحاجات دى هناك بيلبسها العالم الشبيحة والعصبجية"
ما خرجت منه من الموقف ببساطة ان كل ما يقذفه علينا الخواجة هو "كوول" و "مودرن" و"ستايل" ، حتى لو كان هذا الذى قذفه علينا الخواجة هو صرفه الصحى ، لكن كل اللى بيطلع من عندنا لازم يكون "بيئة" و"بلدى" و"يع" من غير ما نتعب نفسنا ونفكر فيه
يمكن الموقف ده خلانى الى حد كبير افهم ليه ناس كتير جدا بتعيب فى سيارات التجميع المحلى -ومثلها طبعا كثير من الانتاج المحلى، سواء كان ملابس او اجهزة كهربائية او حتى افلام سينيمائية-من غير ما يكونوا شافوها ولا استعملوها اصلا
-
أصل احنا بجد عندنا عقدة الخواجة .
أنا أختى عاشت فترة كبيرة من حياتها فى أمريكا و فى نيويورك بالذات و كانت أما بتيجى مصر بتشوف الناس زحمة على المحلات الأكل الأمريكانى زى MaCdonald'sأو Kentuckyكانت بتقول الحتت ديه فيه أمريكا بيدخلها الناس الفقيرة ، انتم فرحانين بيها أوى كدة ليه.
و مكن الأمر ده يكون راجع للاستعمار الانجليزى اللى حاول يغرب الشعب المصرى عن بيئته العربية و حاول يوجد المدارس الأجنبية و بما انى واحدة من خريجى هذه المدارس الأجنبية مأقدرش أنكر أد ايه اللغة فادتنى و لكن أوجدت بداخلى شعور بالميل الشديد للثقافة الغربية اللى قعدت سنين كتير من عمرى بأدرسها و ده شئ مفروض نتنبه ليه و نخلى عيالنا ينجذبوا لتراثنا العربى و متهيألى ده واجب على كل أب و أم لعيالهم.
-
يا حاج سبعاوى ده نوع من انواع الغزو الثقافى
دايما ما تمارسه الامم المنتصرة على الامم المنهزمة فتجد ان الرقى و الحضارة و التقدم هم عندها فقط ويجب على المنهزمين اتباع المنتصر فى كل شئ حتى و ان كان فاسدا
-
و الله يا باشمهندس لقد لمست وتر حساس جدا من الحياة الاجتماعية الموجودة بالبلد
اليومين دوووووووول.
مشكلتنا اننا اصبحنا "ليس بقصد التعميم" نعيش بلا هوية
نعيش فى بحر متلاطم المواج و للأسف لا نتعلق الا بأشياء تغرقنا اكثر مما تنقذنا
ما رئيته نراه كل يوم فى حياتنا كلها
من اول اسماء المحلات الاجنبية التى بلا معنى و اكثرها به غلطات تودى فى داهية
الى فرحتنا باولادنا لما يعرفوا يضربوا كام كلمة انجليزى من عينة yesss
و اذا قال لى قائل ان هذا بسبب تشبة مستويات دنيا بما يرونه من مستويات هاى كلاس كما يرونها يعنى تقليد اعمى
طب دوول بيقلدوا و مش فاهمين طب الفاهمين بيعملوا كده ليه
برضه تقليد و لكن ليس اعمى انما تقليد اعور
-
اولا بهنيك على اسلوبك الراقى فى الكتابة
و ثانيا : موضوعك دا جه على الجرح بحكم عملى فى مصنع لتصنيع منتج صناعى محلى و فعلا لما بنتحط فى مقارنات كتير مع منتجات مستوردة ( مع العلم اننا وكيل معتمد لمنتج اجنبى و التصنيع المحلى بمواصفات قياسية عالمية و لا يمكن التلاعب بالمواصفات القياسية لان التلاعب يؤدى الى كوارث ) و التقفيل جيد جدا بالمقارنه بالمنتج المستورد و طبعا السعر ارخص بكتير و مع كل هذا المخ المصرى هو المخ المصرى يقولك المحلى لاااااااااااااااااا من غير اصلا ما يشوف و لا يجرب
و شكرا على الموضوع
-
استاذ سبعاوى
اللي حضرتك بتقول عليه ده ارحم بكتير من التي شيرت الي عليه ترتر :K15:
والبنطلون الي يقال انه رجالى :k20:
لا تتعجب على كلمة .. فهناك المزييييييييييييييييييييي ييييييييييييييييييييييييي ييييييييييييد
-
تصدق عمري ما اشتريت هدوم عليها كتابة وركزت مكتوب ايه
وعمري ما شفت حد لابس حاجة عليها كتابة وركزت مكتوب عليها ايه
انا هقوم اطمن
-
استاذ سبعاوي ؟
هو حضرتك مقرتش اي يافطة في مصر ؟ اعلانية كانت او ارشادية ?
انا رحت اليابان مرة .. ماكدونالدز مكتوبة بالياباني :) معرفتوش :)
-
الصين .. جميع انواع الماركات بتكتتب بالصيني .. علي السيارات من وراء كتابة صيني ( كورولا مثلا بالصيني ) ..
دي ثقافة مجتمع .. او يمكن اقول " جهل " مجتمع .
طب اقولك حاجة ؟؟
خطبيتي بتشتغل في مدرسة من المدارس الي انت بقتول عليها دي ( مع انها مهندسة معمارية زي بس ربنا يهدي :) ) المهم .. بتدرس 2 و 3 ابتدائي .. عارف ان الكلام باللغة العربية ممنوع منعا باتا الا في حصة اللغة العربية فقط , حتى لو عايز تروح الحمام .. تقولها بالانجليزي ياما مش حتروح ..
لدرجة اني لما بكلمها علي الموبايل بين الحصص بنتكلم انجليزي علشان مفيش حد من الطلاب يعدي يلاقي مدرسته بتتكلم عربي .. وتبقى نكتة الموسم .. ( ميسس فلانة بتتكلم عربي !! )
الذ حاجة في الموضوع ان المديرة بتاعة المدرسة واحد ست محجبة :)
--
سيبك من المدارس دي .. انا درست سنة واحدة في مصر - كان مدرس الدين و اللغة العربية اسمه " مستر عصام "
Mister Essam XD
شكرا يعني ..
-
عندك حق والله يابشمهندس.
فعلا بقت حاجة تكسف موضوع الكلمات البذيئة اللي بتتكتب علي التيشيرتات دي.
انا بشوف كلام العن من كده بكتير ومعانيه بجد تكسف ده غير طبعا الاستراس اللي بقي على تيشرتات الشباب (ترتر) :ANSmile23:
بجد لازم ننتبه للموضوع ده اوي ونحاول نفهم ترجمة الكلام المكتوب على التيشرتات ده قبل مانلبسه لانه هناك بيرمز لحاجات تانية كمان :K15: وفي بعض الأرقام بتكتتب علي التيشرتات بيبقي ليها معاني وبترمز لجماعات معينة عندهم ميصحش ذكرها :005: فياريت نخلى بالنا شوية من الموضوع ده لإنه بجد خطير وبيخليهم يسخروا مننا اوي وعندهم حق الصراحة لان العيب فينا احنا :k41:
-
شكركم على ردودكم جميعا، هو انا طبعا مش فايتة عليا فكرة ان كل حاجة فى بلدنا مكتوبة بالانظليجى بس انا كان وجه اندهاشى مش ان الكلام مكتوب بالانجليزى-لأن ده العادى- بقدر ما هو من الآتى:
اسرة مثقفة من الطبقة المتوسطة العليا+كلمات سوقية على ملابس الطفل الذى تبذل امه كل مجهود ممكن لتربيته تربية تفخر بها+منطق الاسرة العجيب فى انه طالما كانت هذة الكلمات بالانجليزية فهى قد تطهرت من سوقيتها وصارت راقية
ده اللى انا مستغرب منه ، ان ازاى الناس دى تقبل على ابنها انه يلبس ما يلبسه حثالة المجتعمات الأخرى برغم انهم مثقفين ولا يرون فى هذا ما يقلل من شان ابنهم البراق اللامع برغم وجودهم في وسط يجيد كل افراده قراءة وفهم الكلمات السوقية المكتوبة على الملابس الطفل ، تلك هى معضلتى
Content Relevant URLs by
vBSEO 3.6.0 PL2