إيه معنى أرقام اللزوجة اللي مكتوبة على علبة الزيت؟؟؟
الأول لازم نعرف إن زيوت محركات السيارات بتتقسم إلى قسمين من ناحية اللزوجة..
زيوت أحادية اللزوجة.. وزيوت متعددة اللزوجة..
الزيوت أحادية اللزوجة هي زيوت عادية جدا.. بتبقى لزجة في الجو البارد وسايلة في الجو الساخن... وفيه منها كذا درجة لزوجة..
جمعية مهندسي السيارات الأمريكية (SAE) عملت مواصفة من زمان بتحدد درجات لزوجة الزيت علشان تسهل على المستخدمين والمصانع اللي بتعملها..
ليه.. هو الموضوع صعب للدرجة دي؟؟
زي ما قلنا هو نوع من التسهيل.. لإن اللزوجة عادة بتتقاس بطريقتين...
1- اللزوجة الديناميكية ...
ودي بتعبر عن مقدار حركة المائع مقارنة بالقوة الواقعة عليه لتغيير شكله..
وبتتقاس بوحدة إسمها "بواز" Poise .. ورمزها (P)
1 بواز = 0.1 باسكال.ثانية
والوحدة دي تعتبر كبيرة جدا.. فعادة بتتقسم على 100 ويسموها سنتيبواز (cP)
1 سنتيبواز = 1 ملليباسكال.ثانية
علشان كده.. الوحدة دي مهمة جدا مع العربيات علشان الزيت بيتضخ في الموتور تحت ضغط بمضخة (طلمبة) الزيت... ولازم نعرف الزيت هيتصرف إزاي أثناء الضخ... (خصوصا في بداية تشغيل العربية).
2- اللزوجة الكينماتيكية...
ودي بتعبر عن مقدار حركة المائع بدون ارتباط بأي قوى أخرى...
وببتتقاس بوحدة إسمها "ستوكس" Stokes أو ستوك" Stoke .. ورمزها (St)
1 ستوك = 1 سم مربع/ثانية
وبردو... الوحدة دي تعتبر كبيرة جدا.. فعادة بتتقسم على 100 ويسموها سنتيستوك (cSt)
1 سنتيستوك = 1 مم مربع/ثانية
ودي مهمة بردو في العربيات خاصة في الأجزاء اللي بتتزيت بالانسياب الطبيعي للزيت (زي حالات رجوع الزيت من أجزاء الموتور إلى الكارتيرة).
لو حضرتك مهتم بالتفاصيل العلمية والهندسية للموضوع تقدر تدخل على الويكيبيديا في الوصلات دي:
https://en.wikipedia.org/wiki/Viscosity
Motor oil - Wikipedia, the free encyclopedia
https://en.wikipedia.org/wiki/Dynamics
https://en.wikipedia.org/wiki/Kinematics
ولأن الكلام ده مكلكع وصعب على الناس العادية... فالـSAE عملت أرقام كودية لدرجات اللزوجة دي تكافئ درجات لزوجة ديناميكية وكينماتيكية معينة .. وحاولوا يقللوا الاختلافات بقدر الإمكان علشان الموضوع ما يبقاش سايح وكل واحد يعمل اللي في مزاجه...
المهم.. الـSAE حددت الأرقام الكودية بحيث إن كل ما الرقم ده زاد.. يبقى الزيت أثقل.. والأكواد دي بتبدأ من الرقم صفر وبتزيد خمسة خمسة... يعني 0 ، 5 ، 10 ، 15 .. وهكذا..
طبعا.. الـSAE سمت أكواد درجات اللزوحة دي باسمها ... فحضرتك هتلاقي زيت مكتوب عليه SAE 40 مثلا... ده معناه إن الزيت ده أحادي اللزوجة بدرجة 40 حسب مواصفة الـSAE.
الزيوت دي ليها مشكلتين
المشكلة الأولانية .. إن كل درجة لزوجة ليها مدى تشغيل معين.. وبالتالي بقى استخدامها موسمي.. يعني الزيوت التقيلة تستخدمها في الصيف بس.. والزيوت الخفيفة تستخدمها في الشتا بس.
الشكل ده بيورينا مدى التشغيل للزيوت أحادية اللزوجة...
المشكلة التانية.. إن الموتور بيشتغل على درجة حرارة عالية (100 °م).. وبالتالي فالزيوت الخفيفة بتبقى سايلة زيادة عن اللزوم لما الموتور يسخن وما بتديش الحماية الكافية..
حل المشاكل دي ظهر سنة 1950... لما اخترعوا الزيوت متعددة اللزوجة..
الزيوت متعددة اللزوجة عبارة عن زيوت خفيفة أحادية اللزوجة بس عليها إضافات إسمها (محسنات مؤشر اللزوجة) .. بتخلي الزيت يتخن لما يسخن!!!
وبالتالي الزيت يبقى خفيف أول ما تدور العربية.. ويتقل لما العربية تسخن وبالتالي يحمي الموتور من التآكل.. وبكده تقدر تستخدمه طول السنة.
الزيوت متعددة اللزوجة دايما بيوصفوا اللزوجة بتاعتها برقمين.. الأولاني بيبقى صغير وبعديه حرف W - وده اختصار لكلمة Winter - والتاني بيبقى كبير..
زي كده مثلا . . 15W-40
ده معناه إنه زيت خفيف درجة لزوجته 15 (زيت شتوي) ... بس لما بيسخن مع حرارة الموتور بيبقى عامل كإنه زيت سخن لزوجته 40 (زيت صيفي)
طبعا.. أول ما الزيوت دي ظهرت في الخمسينات كان اختراع عبقري لإنك ما بقتش محتاج تجيب زيت شتوي وزيت صيفي... هو زيت واحد يشتغل صيف شتا.
حاليا.. درجتين لزوجة الزيت المكتوبين على العلبة بيتقاسوا في درجتين حرارة محددين...
الأولانية هي لزوجة الزيت في أقل درجة حرارة مسموح للزوجة دي بالتشغيل فيها.. والدرجات دي كالتالي:
(-35 °م) للزوجة 0W
(-30 °م) للزوجة 5W
(-25 °م) للزوجة 10W
(-20 °م) للزوجة 15W
(-15 °م) للزوجة 20W
(-10 °م) للزوجة 25W
وده بيبقى مهم جدا علشان نعرف قدرة طلمبة الزيت على توصيله لكل أجزاء الموتور ... خصوصا في حالة التشغيل في الصبح بدري بعد ركنة طول الليل.
والتانية دايما هي درجة حرارة التشغيل عند 100 °م... وده مهم علشان نعرف قدرة الزيت على الانسياب والرجوع مرة أخرى لخزان الزيت (الكارتيرة) علشان يتضخ مرة أخرى لأجزاء الموتور
ده جدول بيبين الفرق بين مستويات اللزوجة حسب مواصفة SAE J300 (ده اسم مواصفة منظمة الـSAE لدرجات لزوجة زيوت محركات السيارات)
الرسمة دي كده بتوضح الفرق بين الزيوت أحادية اللزوجة ومتعددة اللزوجة..
خلي بالك....
الكلام ده بيدينا فكرة على الفروق بين درجات اللزوجة... بس مفيش درجة لزوجة مناسبة لحرارة جو على الإطلاق.
إنما فيه درجة لزوجة مناسبة لحرارة جو في موتور معيّن
لازم التلاتة مع بعض
يعني لما تيجي تختار لزوجة الزيت.. اختار من الموجود في الكتالوج بس .
طيب... يهمنا إيه من كل الكلام والدش اللي فوق ده؟؟
أنا كمستخدم... يهمني إن الزيت يكون بمواصفات مناسبة حسب ما مصمم الموتور بنى موتوره عليها.. لإنه اختار قيم الخلوص ونوع المعادن المناسبة بناء على افتراضات.. منها نوع الزيت المستخدم..
...
المفضلات