تحذير من محمود بتاع العفشة

**honhon** · 31-12-2015 09:43 AM

احذروا يا جماعة محمود بتاع العفشة اللى جنب محمد ندا شغله وحش جدا و غالى على الفاضى واسلوبه فى التعامل سئ جدا اتعاملت معاه 4 مرات وكل مرة الشغل غلط واخر مرة روحتله وحصل الاتى
صوت ونه او تكتكة فى العربية من ورا و كنت لسة مركب عجل جديد(عربية 406) قالى عيب بلية وعايزة تتغير قولتله اتأكد عشان هاروح اشتريها عمل فيها دكتور وعيب يا بيه وانا مش عارف ايه اكدت عليه تانى اكيد قالى اكيد روحت مدينة نصر واشترتها ب950 جنية ولما رجعتله لاقيته سايب العربية من غير ما يفكها و يقولى هاعملها بكرة مع انى مأكد علية يفكها عشان لو مش البلية يكلمنى قبل ما اشترى و بعد خناق قام فكها ولقى البلية كويسة وقالى الجلبة هى اللى بايظة استنى هاغيرهالك من عندى ولطعنى نص ساعة تانى و بعدين قال اللى عندى مش هتركب اشترلى واحدة وروحت تانى الف على جلبة وخلص العربية على الساعة 10 يعنى اتلطعت عندة من 5 ل10 و انا مروح لاقيت الصوت زى ما هو تانى يوم ركنت العربية فى حتة واسعة وقعدت ادور لاقيت العيب ان الكرتيرة هى اللى متحركة وبتخبط فى العجلة ربطتها والصوت راح يعنى كلفنى وقت وفلوس ومشاوير عشان البية مكسل يفكر ويجرب ويشوف الصوت منين
وربنا شاهد ان دة اللى حصل بالظبط
ومرة قبلها كنت بركب كبل باور لبيجو 405 و طلب مصنعية 350 جنية مع ان الموضوع ميستهلش و مااخدش شفل و بالعافية اخد 250 و هو متضرر

**Mecha** · 31-12-2015 10:32 AM

يعني ايه كابل باور ؟؟

**Mohamed Desoky** · 31-12-2015 01:42 PM

للاسف كل الصنيعية كده فى كل المجلات ومفيش حد فيهم كامل يعنى حرفى وامين ونظيف المواصفات دى مش موجودة فى مصر نصيحة لكل الزملاء حاول تصلح اللى تقدر علية فى بيتك وفى عربيتك طول ماانتى عايش اتعلم وشكرا

**A.Saad** · 31-12-2015 03:23 PM

روح لعمرو الشرقاوى
امين وكشفه محترم
ش الهرم
تدخل قبل البنزينة اللى جنب كايرو مول
وبعدين شمال فى يمين
وقله انت من طرف احمد اللى معاه البيكانتو الزرقا
هو بييجى على 1 الضهر
الاحد اجازة

**تامر.محمد** · 31-12-2015 03:37 PM

و البلية ب950 جنيه ؟؟؟؟

**honhon** · 17-01-2016 09:02 AM

المشاركة الأصلية كتبت بواسطة م أحمد

مع تقديرنا الكامل كلامك ...بس لازم نسمع او نقرأ رد الطرف الآخر اللى انت بتحذرنا منه

العرض بالطريقة دى لازم تعرف انك بتخرب بيت الراجل

و لسا حاصل موقفين على جروب عربيات لناس فضحت بياعين و فى الآخر و بعد إتاحة الفرصة لهم طلع المشتكى هو الغلطان

بالمناسبة أنا لا أعرفك و لا أعرفه

م/احمد مع تقديرى الكامل لكلامك احب اوضح نقطتين
اولا الموضوع مش مشكلة بينى وبين الصنيعى وعايز حد يحلها عشان تقول نسمع من الطرف الاخر لكن انا حكيت اللى حصل معايا وربنا هو اللى شاهد على كلامى واللى مش مصدق وعايز يجرب بنفسه هو حر
ثانيا احنا فى المنتدى هنا بنعرض تجاربنا عشان نفيد ونستفيد وانا ماكتبتش ده غير لما الموضوع اتكرر مع الصنايعى ده لانى باكون هناك عند محمد ندا الميكانيكى وباقول بالمره يعمل لى شغل العفشة اللى فيها بس بجد كل مرة يحرق دمى ... غالى جدا - لازم ارجعله مره او اتنين علشان العيب مااتصلحش ... معاملته وحشة جدا
وانا ماكتبتش الموضوع بتاعى غير لما زودها اوى اخر مره لما بهدلنى طول النهار على الفاضى
انا معايا 405 + 406 والشغل كان فى 406 والبليه بتاعة العجله الخلفى رحت جبتها من مصطفى شوقى فى مدينة نصر 950 جنيه وبعدين رحت الحرفيين اجيب الجلبه لما طلعت البليه سليمه وتانى يوم رجعت البليه مدينة نصر وبعد ده كله لا طلعت بليه ولا جلبه
ده اللى حصل معايا .... وكل واحد يقدر الموضوع بنفسه.