رقم العضوية : 111732
تاريخ التسجيل : 29Aug2011
المشاركات : 2
النوع : ذكر
الاقامة : Egypt
السيارة: POLSKA
السيارة[2]: POLSKA
دراجة بخارية: no
الحالة :
السلام عليكم أخوتي الأحباء
أحياناً بنتفاجئ إنه نور المارشدير مش بينور مع تعشيق الفتيس، المشكلة دي ليها أكتر من سبب نقولها كده بالترتيب:
الأول: ممكن تكون لمبات الفرامل محروقة واحدة منهم او هم الاتنين مع بعض، وحصلت معايا قبل كده الاتنين في ضربه واحده
الثاني: ممكن يكون الفيوز المسؤول عن نور المارشدير محروق
الثالث: مكنة المارشدير نفسها فيها مشكلة وغالباً بيكون بسبب نتيجة دخول زيت ليها ، ودي حلها يا إما تنظيف يا إما تغيير
في أنواع كتير منها الكويس ومنها التجاري، الاختلافي فقط في الجودة والعمر الافتراضي عشان كده أنصحك بشراء نوع جيد ويفضل الأصلي بشرط يكون من موزع معتمد لقطع غيار منصور شيفروليه
** وللعلم ليها أكتر من إسم .. زي : سويتش مارشدير ، مكنة المارشدير ، ساعة المارشدير
وده شكلها ، سعرها حسب تاريخ كتابة الموضوع حوالي من 40 لـ 45
الأدوات والمعدات اللي هتحتاجها تكون معاك هي:
1- مفتاح بلدي رقم 19
2- سبراي WD40 أو أي نوع سبراي منظف ومزيل صدأ هيؤدي نفس الغرض ، غالباً هتحتاج تستخدمه خصوصاً لو عربيتك قديمة شوية عشان تسهيل عملية الفك
3- أفوميتر (لو كان عندك معرفة بالتعامل معاه) وده علشان نقيس بيه الفيوزات مين السليم ومين المحروق
* وبنصح أي حد عنده عربية انه يكون عنده واحد هو سهل في الاستخدام وفي شروح كتيييير جداً لطريقة استخدامه على يوتيوب ، وسعره مش غالي يبدأ من 30 ج لحد 3000 جنيه ... ده حقيقي !!
من ضمن استخداماته: قياس قوة شحن البطارية ، قياس شحن الدينامو ، معرفة إذا كان في تسريب للشحن ، معرفة الفيوزات السليمة والمحروقة ، وغيرها من استخدامات في الإلكترونيات.
بإذن الله لو في وقت هعمل موضوع مخصص ليه
نيجي للحلول بقى :
الحل الاول: هو اسهل حل ، وهو تغيير لمبة المارشدير إذا كانت محروقة
الحل الثاني: هو الكشف على الفيوز في علبة الفيوزات الداخلية وبتكون على الشمال تحت التابلوة في القايم الأمامي لباب السواق
ودي قائمة الفيوزات حسب كتالوج لانوس علشان تكون مرجع ليك، واضح من نفس الترتيب الفيوز رقم 12 المحدد في الصورة مصباح الرجوع للخلف
الحل الثالث وهو إصلاح أو تغيير سويتش الريفيرس (مكنة المارشدير) نفسها
أنصح في البداية بتنظيفها خصوصا لو كانت الأصلية اللي جاية مع العربية، لأن في بعض ميكانيكية يقولك دي بايظة عشان يغيرهالك بواحدة من نوع ردئ وياخد القديمة منك ينظفها ويركبها لغيرك أو يبيعها على انها استيراد لزبون تاني .... ما علينا بقى
ودي بيكون مكانها بالظبط تحت بطارية العربية
دي باختصار الخطوات طبقاً للتدرج في الاختبار من الأسهل للأصعب ... ده للي عنده فكرة عن العربية وبيشتغل بإيده
واللي لسه جديد وحابب يتعلم ازاي يعملها بنفسه ده شرح بالتفصيل الممل في الفيديو التالي:
https://youtu.be/cWkCS-HbB70
ومتخافش أبداً انك تشتغل بإيدك في عربيتك الموضوع مفيش أسهل منه ومش هياخد من وقتك أكتر من 20 لـ 30 دقيقة
بالتوفيق للجميع وأتمنى أن يكون الشرح سهل ومفيد للجميع ، ولو في أي تعليق أو استفسار أنا في الخدمة
أخوكم/ هشام
رقم العضوية : 97583
تاريخ التسجيل : 04May2011
المشاركات : 126
النوع : ذكر
الاقامة : القاهره
السيارة: لايوجد
السيارة[2]: دايو لانوس
الحالة :
شكرا لمجهودك انا كانت مش شغاله عندى ولقيت الفيشه مهزوزه
سبحان الله بحمده سبحان الله العظيم
المفضلات