الموضوع: طالع الغردقة بعد بكرة مطلوب مساعدة عاجلة

السلام عليكم انا كنت مشغول شوية و حاليا فى اجازة قصيرة و طالع الغردقة بعد بكرة ان شاء الرحمن و راجعت ارشيف دليل الطرق للاسف المعلومات الهامة من تالريخ 2008 و 2010 .....انا عارف ان المشاركات قليلة اليومين دول بس يا ريت حد يفدنى بمعلومة عن طريق الغردقة من القاهرة تحديدا محطات البنزين المضمونة و السرعة المناسبة للطريق ...... و انا ارفقت المعلومات اللى الاخوة الافاضل كتبوها مشكورين بس من 2008 و 2010 ........ السلام عليكم ورحمة الله وبركاته
بمناسبة دخول الصيف و إحتمال ذهاب الكثير منا الى الغردقة
اليكم بعض المعلومات الهامة من واقع الخبرة العملية حيث اني اسافر على هذا الطريق بصفة شهرية تقريبا
1- السرعة من بداية الزعفرانة - راس غارب - وصولا إلى بوابة الغردقة هي 110 كم/س و العكس صحيح
2- الرادار متواجد 24 ساعة على الطريق
3- بشكل كبير ممكن تواجه على الأقل 2 رادار في الطريق الى الغردقة
4- بدايةتوقع وجود الرادار 20-30 كيلو قبل رأس غارب ثم بعد راس غارب ب 10-20 كيلو ثم في الكيلو 100 ثم في الكيلو 80 (منطقة جبل الزيت) ثم في الكيلو 50
5- السرعة بعد بوابة الغردقة الأولي (نطاق الجونه) تصبح 90 كيلو/س و هناك رادار شبه دائم على الطريق الدائري الداخلي قبل مخرج المطار و أحيانا على الطريق الدائري الخارجي المؤدي الى سفاجا
6- السرعة داخل الغردقة 60 كم/س و هناك رادارات كثيرة منتشرة داخل الغردقة و يتم تغيير أماكنها بصفة مستمرة (الحذر الكامل في طريق المطار) حيث يوجد شبه تغطية كاملة للأتجاهين
7- بعد قضاء الأجازة للأخوة المغادرين يجب الحذر ايضا في طريق العودة (على الأقل 2 رادار) الأول في الكيلو 40 و الأخر قبل رأس غارب بحوالي 30 كيلو ثم بعد الزعفرانة ب 30-50 كيلو

__________________
Mshamy كتبت بالمنتدى فى 2010

هبتدى بمدينة الغردقة:

1- الطريق : احسن طريق هو طريق القطامية - العين السخنه و مدخله من الطريق الدائرى بعد كارفور بحوالى 5 كيلو و تقسيمة الطريق من القاهرة للغردقة كالأتى (القطامية - العين السخنه المسافة حوالى 120 كم و السرعة القصوى 120 و توجد بنزينة وطنية فى أول و منتصف و أخر الطريق) ثم (العين السخنه - الزعفرانة المسافة حوالى 70 كم و السرعة القصوى 90 و توجد بنزينة مصر للبترول فى أول الطريق و بنزينة التعاون فى الزعفرانة) ثم (الزعفرانة - رأس غارب المسافة حوالى 120 كم و السرعة القصوى 90 و توجد بنزينة موبيل فى رأس غارب) و أخيرا (رأس غارب - الغردقة المسافة حوالى 100 كم و السرعة القصوى 90) و مدخل الجونة قبل الغردقة بحوالى 23 كيلو، كل الطريق حلو و اتجاه واحد و العجل مش كتير ما عدا المسافة من العين السخنه - الزعفرانة اتجاهين و ياريت محدش يستعجل فيها لأنها خطر.

2-المدينة : الغردقة مدينة جميلة و اسعارها معتدلة، يعنى ماتفرقش حاجة عن القاهرة، تنقسم الى جزئيين أساسيين (الدهار) و دى منطقة سكن أغلب سكان الغردقة من عائلات و موظفين و عاملين بالفنادق و هناك تحس انك فى احد الأحياء الشعبية و شوارعها نظيفة و متسفلتة و بها بعض الفنادق المتوسطة من 2 - 3 نجوم و لو عاوز اقامة نضيفة بسعر معقول فى فندق أو شقة يبقى هتلاقى طلبك هناك و فيها كمان شارع الحجاز اللى فيه ورش الميكانيكا و كل ما يتعلق بالسيارات بس مش هتلاقى غير 5% صنايعية كويسين علشان أغلب العربيات فى البلد جديدة. الجزء التانى من المدينة هى منطقة (السقالة) و بتمتد من ميدان السقالة حتى مطلع الهضبة مرورا بالشارع الرئيسى بالمنطقة و هو شارع شيراتون اللى بيضم مجموعة كبيرة من البازارات و المطاعم و الفنادق و هو بالأضافة للشوارع المتفرعة منه يعتبر المقر الرئيسى لمكاتب شركات السياحة و المكان المفضل لسكن الأجانب العاملين بشركات السياحة و الفنادق، و على فكرة الغردقة فيها ميزة جامدة وهى ان اللى مامعاهوش عربية يقدر يتنقل بسهولة بالميكروباصات بس هى مش زى ميكروباصات القاهرة بتبقى انضف و اجدد و اسعارها كويسة، يعنى بجنيه تجيب البلد من أولها لأخرها.

3-الأقامة: الغردقة مدينة شتوية، يعنى لا انصح اى حد يروحها فى الصيف لأن الجو بيبقى ناااااااااااااااااااار، لو بتنزل فى فنادق هتلاقى تنوع كبير و اسعار كويسة (مقارنة بشرم الشيخ) و على قد ميزانيتك هتلاقى طلبك بس ماتسافرش من غير حجز ولو تحب تأجر شقة برضوا هتلاقى طلبك باسعار مقاربة للأسكندرية و الغردقة فيها 8 شواطىء عامة كويسة جدا كمواقع و نضافة.


4-الأكل و الفسح: أحلى حاجة فى الغردقة ان كل واحد بيلاقى الفسحة اللى تناسبه و على حسب امكانياته و ده علشان التنوع اللى فيها و علشان فيها عائلات مقيمة هناك مش زى شرم الشيخ اللى كل حاجة فيها معمولة على مقاس الأجانب، المهم انصحكم تقضوا يوم كامل للصيد فى البحر و مش لازم عن طريق شركة أو فندق، روح الميناء السياحى و رتب مع ريس مركب قبلها بيومين و ممكن يضمك على مجموعة، أما بالنسبة للأكل فمتفوتوش المطاعم دى

- بيتا سفينكس: أكل على كل زوق جميل و نضيف قوى، متفرع من شارع شيراتون/ الشارع اللى على ناصيته مكدونالدز.
- أسماك الميناء أو الجوكر: الأتنين قريبين من بعض فى ميدان السقالة و أسعارهم زى بعض بس الميناء قعدته و خدمته احسن.
- بولز: مطعم امريكى و ايطالى بعد منزل الهضبة قبل الماريوت، زى تشيليز و البيتزا هناك ايطالى اصلى
- فول أبو أية: شارع شيراتون قبل ميدان عروسة البحر، كل و ادعيلى انا و ابو اية :D :D :D


يا ريت أكون قدمت معلومات مفيدة و لو حد عنده أى أسئلة أنا فى الخدمة.
-------------------------------------------

__________________
كيميائى / محمد طهكتبت فى المنتدى فى 2008

المشاركة الأصلية كتبت بواسطة mankindforce

من اول طريق القطاميه - السخنة هتلاقي محطات بنزين وطنيه، و في واحده في نص الطريق و اعتقد واحده في اخره بس مش متأكد.
في وطنية فالزعفرانة علي الشمال و انت رايح الغردقه، فول التانك فيها و ان شاء الله مش هتحتاج تاني و انت رايح.
السرعات:
القطامية - العين السخنة 120 كم/ساعه
السخنه - الزعفرانة مش فاكر الصراحه.
الزعفرانة - الغردقة 110 كم/ساعه

جزاكم الله خيرا و الف شكر