الموضوع: تجربتى فى رحلة العمرة

السلام عليكم ورحمة الله
حبيت انقل لكم تجربتى فى العمرة علشان تستفيدوا منها زى مانا استفدت من تجاربكم
- السفر كان من مطار برج العرب الدولى فى اواخر ديسمبر . المطار جميل وحديث لكن المشكلة اننا بنفسد كل حاجة حلوة فمثلا عند السفر كانت مرحلة وزن الحقائب مأساة بسبب تأخر موظفى شركة الطيران فى فتح الكاونتر مما تسبب فى حالة زحام رهيب ادى الى خناقات وتدافع وكذلك عند الرجوع كنا طيارتين راجعين مع بعض ومفيش غير شباكين فقط لختم الجوازات
- شركة الطيران كانت اير كايرو ورغم انى عمرى ماسمعت عنها قبل كده الاانها كانت كويسة والطائرة نظيفة جدا عيبها الوحيد ان المسافة بين المقاعد ضيقة الى حد ما يعنى لو واحد مليان ممكن يتضايق
- مطار جدة طبعا واسع جدا ومنظم ودورات المياه فى كل مكان . ظابط الجوازات بياخد بصمات الاصابع وبصمة العين
- لما بتخرج من المطار بتلاقى الباص مستنيك او احيانا بيبقى لسه مجاش بتستنى شوية
- بالنسبة طبعا لشرا خط الموبايل كنا قبل كده اول مانطلع من المطار نشترى الخط من الناس اللى واقفين بره . الكلام ده خلاص لان لازم جواز السفر دلوقتى وفى مكاتب تبع لشركات المحمول خارج المطار فياريت تبقى مصور صورة جواز السفر لان طبعا الجواز هيتاخد منك وانت بتركب الباص
- بالنسبة لتشغيل خدمة الانترنت على خط الموبايل غالية اوى انا كان معايا خط زين لقيت باقة 1 جيجا لمدة اسبوع 50 ريال ولو عاوزها لمدة شهر يبقى 70 ريال
- بعد كده بتروح على الفندق احنا كنا رايحين على مكة الاول المسافة من المطار لمكة حوالى ساعة او ساعة ونص
- طبعا مناسك العمرة مش هقولها لانها متوفرة على مواقع كتير هنتكلم عن الحرم . الحرم طبعا فيه تجديدات علشان كده لازم تخلى بالك هتدخل منين وتخرج منين بالنسبة للنا اللى فى شارع اجياد وشارع الهجرة والخليل ابراهيم دول هيدخلوا من باب الملك فهد ولما تخرج حاول تخرج من نفس الباب ليه بقى لان حصل معايا انى خرجت من باب السلام وقلت الف من بره لقيت الطريق مقفول واضطريت ادخل الحرم واخرج تانى من باب 74
- ملحوظة مهمة جدا حاول تخلى معاك كارت التعريف اللى شركة السياحة بتديهولك لانه مفيد فى حالة التوهان خصوصا الستات والناس الكبيرة لان الكارت بيبقى فيه اسم الفندق ورقم تلفون المشرف لكن فى برضه ملاحظة مهمة مش كفاية اسم الفندق ياريت عنوان الفندق يبقى معاك فى ورقة والكلام ده عن تجربة
- بالنسبة للمطاف المؤقت لو عاوز تطلع فوق يبقى باب 79
- بالنسبة للاكل . الاكل كتير وفى محلات اول ماتخرج من الحرم وموجود فيها كل حاجة لكن طبعا كنت بخاف اجيب منها خشية النظافة عموما للفطار لقيت محل مصرى بيعمل فول وفلافل وبالنسبة للغدا عندك الطازج داخل ابراج مكة الوجبة ب 20 ريال وكبيرة الصراحة
- ملحوظة مهمة تبقى عارف ان الفندق ممكن يتغير فى اى لحظة وده راجع للوكيل السعودى
- بعض اسعار الاكل الخيار ب 10 ريال والطماطم 6 ريال والموز ب 6 والتفاح ب 10 ريال سندوتش الفلافل او الفول ب 2 ريال زجاجة المياه اللتر ب 2 ريال
- المسافة بين مكة والمدينة بتاخدها فى حوالى 7 ساعات وبتقف مرة واحدة فى استراحة على الطريق
- المدينة المنورة اغلب الفنادق قريبة من الحرم لكن المحلات والمطاعم مش كتير زى مكة وبتبقى حسب مكانك من الحرم وعموما كل حاجة هتلاقيها فى شارع الستين
- دخول الروضة الشريفة عاوز فرقة 999 لكن عموما حاول تروح بعد الظهر بشوية وتقف فى الطابور حاول تظبط معادك انك تدخل الروضة على العصر بحيث لما يأذن للعصر هيسيبك تقعد لحد العشا
- حاول يبقى معاك مصلية وانت رايح الحرم خصوصا فى مكة ولو اليومين دول خد معاك شراب تقيل وحاول تلبس حاجة تقيلة بليل
- ملحوظة اخيرة ضايقتنى نفسيا . اغلب المسافرين للعمرة بيبقوا من الارياف وناس بسيطة اوى لكن للاسف بيفتقدوا النظام وسايقين فى الاستعباط يعنى فى اى طابور تقف فيه تلاقى واحد داخل مستعبط وواقف فى الاول تروح حاصلة خناقة وترتفع الاصوات فتلاقى السعودى واقف يبص لنا بصة مش هيا تخيلوا ان حصل خناقة على الطيارة والله كانها ميكروباص عشان كده نصيحة لو تعرف تسافر على رحلة عادية مش معتمرين يبقى تمام

حمدا لله على السلامة
وعمرة مقبولة ان شاء الله