1 مرفق
المينيمم تشارج الاختراع المصرى العنصرى
عندنا فى مصر كافيهات ومطاعم بتسرقك بشكل شيك بس لو انت حتى مفتح مش هتعرف تاخد حق ... اقرو معايا القصة دى وشوفوا اد ايه فى حراميه فى البلد ومين بيتستر عليهم للاسف :( وحد يدينى حل للمشكله دى عشان لو حد وقع فيها
● اول يوم العيد رحت انا والأسرة كافيه " كارليتو " على السريع ركنت العربية ووقفت على الباب قالوا مفيش مكان وفي ويتينج استنيت حوالي نص ساعة وبعدين دخلنا الغريبة اني لقيت اكتر من ترابيزة فاضية ومع ذلك الناس واقفة ويتينج!!
طلبنا اوردر واللي بياخد الاوردر اما لقا الاوردر مش كبير قالي كدا في مينيمم تشارج 50 جنيه للفرد قلتله مبدفعش مينيمم ضحك وسابني ومشي الاوردر جه وخلصنا قلت اطلب بيتزا واخدها تيك اواي قالي هتاخد ساعة ونص!! قلتله لا خلاص هاتلي الشيك
الشيك جه وفيه حسابنا 56 جنيه دا اللي احنا طلبناه وفيه زيادة 100 جنيه خدمة ومينيمم تشارج!!
----------
معلومة للي ميعرفش مش من حق اي مكان يفرض مينيمم تشارج الا لو كان منشأة سياحية وعضو غرفة السياحة ودي بتبقى لوحة بارزة وواضحة في اي مكان سياحي وكمان لو كان سياحي عشان يفرض مينيمم لازم يوضح للعملاء كتابة فب مكان واضح انه فيه مينيمم تشارج عشان الناس تعرف قبل ما تدخل
----------
.
روحت للكاشير سألته المكان دا كام نجمة ؟ قالي لا مفيش نجوم قلتله يعني مش سياحي قالي لا اعتبرني ولا نجمة قلتله خلاص يبقى حضرتك انا مش هدفع غير اللي طلبته بس والخدمة بس مش هدفع مينيمم قالي ما كل الناس دافعة هو انت احسن منهم كلهم قلتله الناس بتتحرج او مش عارفة حقها دي مشكلتهم بس دا انا حقي ومش هدفع جابلي مدير والمدير قالي لا يا فندم احنا مكان سياحي قلتله طيب وريني حضرتك ترخيص السياحة قالي انت مش شرطة سياحة ومش من حقك تشوفه قلتله مع انه المفروض يبقى متعلق وواضح بس اوكي خلاص يا فندم انا هدفع ال 150 وهدفع الف جنيه كمان لو عايز بس بعد اذنك طلعلي فاتورة ضريبية عليها اسم وعنوان المكان ورقم السجل الضريبي بالمبلغ اللي عايزني ادفعه وانا هدفع على طول
---
معلومة بردو للي مش عارف اي مستهلك في اي مكان تجاري مهما كان من حقه يطلب فاتورة ضريبية وبيتم اصدارها عند الطلب ورفض اصدار الفاتورة يعتبر جريمة وتهرب ضريبي
---
رفض وقالي مش من حقك تاخد فاتورة انت مش شرطة قلتله يا فندم شرطة ايه اي زبون من حقه يطلب فاتورة قالي معندناش فواتير قلتله خلاص انا مش دافع حضرتك اطلبلي الشرطة تيجي تدفعني يا اما هدفع اللي طلبته بس وهمشي قالي لا مش هطلب حاجة
(( وادفع احسن انت معاك حريم عشان ميتبهدلوش!! ))
.
وبعدها قالي او متدفعش خالص وامشي ومش هدخلك هنا تاني وبعدين سلم الشبك لواحد من اللي شغالين وقاله حصل الشبك كامل
(( وابقى اجي والاقي الشيك متدفعش!! ))
.
بعد ساعة الا ربع الشرطة مجتش كلمتهم تاني وقلتلهم اني محجوز في المكان ومانعني امشي قالولي هنستعجلهم وبعدها ب 5 دقايق جات 3 عربيات شرطة وعساكر بآلي وسرينة ووقفوا قدام الكافيه وكل الناس بدأت تاخد بالها مدير المطعم طلب من الشرطة تقف بعيد عن باب المطعم وومشيوا من قدام الباب جه الظابط حكيتله الموضوع وقعد يقنعني انه موضوع تافه مع اني شرحتله انه مش موضوع فلوس وان دا حقي غير اني اتهنت واتحبست جوا واتهددت باهلي وهو بردو مصر انه تافه اصريت اني احرر محضر وهنا بقا بدأ موضوع تاني
.
بغض النظر عن الحرس اللي حاطهم فوق دماغنا كل ما اقوم من مكان يقف في قفايا عشان مهربش بالحساب
قام مشي طلعت انا حساب اللي طلبته عشان ادفع وامشي رفضوا يمشوني من المكان طلبت واحد صاحبي يجي يروح اهلي بعربيته بعد ما قالي انت معاك حريم والكلام دا لحد ما اشوف اخرتها معاهم وطلبت النجدة وبلغتهم بالموضوع وقالولي هنبعت دورية
.
صاحبي جه وهو ماشي مع اهلي العاملين في المكان كلهم اتلموا عليهم وقالوله مش هتمشوا الا ما تدفعوا الحساب قلهم ان انا مش همشي وانا هحاسبهم
.
الظابط قالي انت شكلك فاضي قلتله ايوة انا فاضي!!
الشرطة قعدت مش اقل من ساعتين كاملين واقفين في الشارع بيقنعوني معملش محضر قلتله مش هعمل محضر بس غايز فاتورة مدير المطعم المالي كان واقف ورفض يطلع فاتورة وكمان قطع الشيط قدام الظابط بس انا صورته قبلها لحد في الاخر الظابط قالي هخليك متدفعش حساب خالص وهجبلك اللي شغالين كلهم يعتذرولك وهتيجي تقعد بعد كدا براحتك وهديك رقمي ولو اي حد ضايقك كلمني وانا هاجيلك!!! كل دا عشان بس معملش محضر!!! بكل اللي اتعرض عليا دا اصريت اكتر اني اعمل محضر لاني عرفت اني على حق والا مكانوش يعملو كدا
.
نشفت دماغي وقلت للظابط انه ميضيعش وقته ويلا عالثسم في الوقت دا في كام امين شرطة كلموني على جنب وقالولي دا حقك ولازم تعمل محضر وهما عايزين ينيموا الموضوع
حتى لو وقتي هيضيع بس على الاقل هحاول اخد حقي ولو مجاش هبقى عملت اللي عليا
- رحت قسم تاني طنطا مع الدورية وعملت محضر بكل التفاصيل دي وبحبسي وتهديدي في المكان وبتوع كارليتو رفضو يجوا القسم عشان يقولو اقوالهم وهيتبعتلهم المحضر نقطة شرطة قحافة رقم المحضر 8 ح 25/9/2015
وبعت شكوى لحماية المستهلك بخصوص المينيمم تشارج وسوء المعاملة ورفض اصظار فاتورة
- هبعت شكوى لمصلحة الضرايب بخصوص رفض اصدار فاتورة ضريبية
- هبعت شكوى للغرفة السياحية بخصوص فرض مينيمم تشارج لغير منشأة سياحية
- هاخد رقم قضائي للمحضر وهطلب تحقيق نيابة
● ياريت محدش يسيب حقه حتى لو شايف ان دا مبلغ صغير وعادي بس انت وغيرك بتتسرق خليك ايجابي وحارب الاستغلال واطلب حقك ودي صورة الشيك
#منقول
https://www.facebook.com/photo.php?f...type=3&theater