الموضوع: التحذير من ناشيونال موتورز وكيل سايبا وجلوري

السلام عليكم

أنا معايا عربية سايبا برايد 2006 ومن ساعة ما وديتها تتصلح عندهم يصلحوا مشكلة ترجع فيها مشكلة أكبر من اللي قبلها ... وبعد ما باظت منهم خالص مش راضيين يستلموا العربية
_____
- مقدمة المشكلة:
في شهر يناير الماضي رحت للتوكيل عشان العربية كان فيها جوان بيسرب مياة وسير دينامو مقطوع ...
قالولي هنغير وش السلندر وكام ماسورة وسير وخرطوم في العربية عشان دايبين.. تم التصليح فعلا ورحتلهم بعد أسبوع استلمت العربية وكانت شغالة عادي زي الأول
وأنا راجع حسيت إن استهلاك البنزين أزيد من العادي -من الورشة للبيت حوالي 70كم - بس قولت يمكن بيتهيألي واستنيت لحد ما فولت العربية عشان أحسب الاستهلاك مظبوط
العربية بتاخد حولي 30 لتر في التفويلة الواحدة وبتمشي بيها حوالي 350 كم في المتوسط ... بعد التفويلة لقيت استهلاك البنزين زاد أكتر من مرة ونص والتنك خلى العربية تمشي حوالى 220كم بس
رجعت للتوكيل تاني - في نص فبراير على ما أذكر - وقولتلهم على المشكلة قالي يمكن بس الرشاشات متوسخة ولا حاجة وحط بنزين 95 نص تفويلة عشان يفوق العربية ... سمعت الكلام وحطيت منظف إنجكشن لكن مفيش أي تأثير ... نفس مشكلة البنزين زي ما هي
كل دة ومشوار التوكيل بياكل وقت رهيب وفلوس محروقة في البنزين اللي بيطير في الهوا و طبعا بقيت بأستعملها أقل بكتير من الأول عشان البنزين غالي ومش غاوي أرمي فلوس في الأرض ... لغاية ما أعرف آخدهالهم تاني يشوفوا هما عملوا إيه خلى الاستهلاك يعلى كدة
_____
- المشكلة بقى:
بعد حوالي شهر ونص شهرين من الزيارة بتاعة فبراير العربية فتحت بقها تماما , تقطيع ودخان أسود من الشكمان وصوت عالى وسحب ضعيف وصوت تنفيس من جوة موتور العربية ...
المهم سيبتها مركونة وأنا وزوجتي بقينا بنستعمل العربية التانية مؤقتاً لغاية ما أفضى للمشوار وتصليح زقزوقة هانم
فضيت شوية في أواخر رمضان اللي فات فأخدت معاد منهم بالتليفون وأخدت العربية يوم السبت 11 يوليو إلى التوكيل وأنا عامل حسابي أسلمهم العربية وأسيبهالهم لغاية ما بعد العيد إن مكانش أكتر لغاية ما تتصلح
وصلت التوكيل حوالي الساعة 11:15 وقعدت في الاستقبال مستني دوري لغاية ما لقيت م/أحمد داخل فقمت سلمت عليه وقولتلة العربية لسة البنزين فيها عالى زي الأول ومتصلحش وفيها كذا حاجة باظت تاني وأنا شاكك إنها من التصليح الأخير اللي إنتم عملتهولي
قالي مش هينفع أستلم العربية عشان عندي أوردرات كتير وكدة .. قولتله أنا عايزك تستلمها وأنا همشي ومش عايز أستلمها النهاردة قالي طيب هجيلك كمان شوية
جت الساعة 12 قمت أصلي الظهر وخرجت من المصلى حوالى 12:15 مكنش فيه غير عربيتي بس اللي منطقة استلام العربيات وبقيت العربيات يا دخلت يا مستنية صاحبها يستلمها ...
رحت لـ م/ أحمد تاني , والراجل جه معايا وبص عالعربية وقالي في رشاش بايظ والعربية متلتة (فيها سلندر مش شغال) وهتتكف جامد ....
قولتله طيب مش مشكلة ,استلمها عشان عايز أمشي ومستعجل .. قالي اديني شوية أبص على حاجة
عشر دقايق وهو داخل خارج وأنا مستني ... روحتله تاي قالي أصل أنا مش متأكد إن عندي قطع الغيار وسابني ومشي
روحتله تاني بعد 10 دقايق يا بشمهندس استلم العربية خليها عندك لغاية ما تصلحها حتى لو قعدت عندن بعد العيد بأسبوعين .. أنا مستعجل ولازم أمشي دلوقتي
قالي إنت عايز تسلمهالي وترمي الكورة في ملعبي ... استنى هروح أجيب الـ م/روماني يص عليها ونشوف هيقول إيه
قولتله هي أصلاً خارجة من عندكوا فيها مشكلة البنزين والخراطيم بتاعة الهوا اللي غيرتوها بتنفّس ... يعني في التصليح بتاعكوا ومش بعيد تكون الرشاشات باظت بسبب وش السلندر الجديد ... قالي الرشاشات ملهاش دعوة وخليني أروح أجيب م/روماني يبص عالعربية
المهم قعدت مستني وهو داخل خارج وكل شوية أروحله يقولي أهو رايح أجيبه ... خمس دقايق .. دقيقة
لغاية ما الساعة كانت 1:15 وكنت جبت آخري من المناهدة والمحايلة ومماطلتهم معايا ومكنش ينفع أستنى أكتر من كدة ... روحت واخد العربية وماشي
وبعد أجازة العيد إن شاء الله هعمل شكوى في حماية المستهلك
___
الخلاصة (من وجهة نظري):
- وش السلندر اتركب غلط وتسبب في زيادة استهلاك البنزين
- الخراطيم والمواسير اللي اتغيرت بعضها ما تقفلش كويس وفك من مكانه وبدأ يسرب بعد فترة بسيطة ...
- رافضين يستلموا العربية
- الله أعلم إيه تاني في العربية
_____

العربية من ساعة القصة دي مركونة ومبتمشيش بقالها أكتر من 5 شهور ...
وحماية المستهلك قالي طالما العربية برة الضمان يبقى مالناش دعوة وروح حل مشاكلك مع الوكيل مباشرة...
باختصار الوكيل الهمام حول العربية لشوية خردة

المشاركة الأصلية كتبت بواسطة engineer05

السلام عليكم
تحديث سريع
الحمد لله تم إصلاح السيارة في الورشة اللي كنت بصلح فيها العربية من زمان قبل ما أفقد صوابي وأتوجه لناشيونال موتورز...
وزي ما كنت متوقع العربية كانت محتاجة شمبر ووش سليندر جديد مع بعض الإصلاحات التانية
ودة طبعا بيدل على إن الجوان اللي اتركب من كام شهر عند التوكيل تم عمله بأقصى درجات الحرفية والإتقان والأمانة, مش كدة ولا إيه؟
يعني أغير جوان وبعد أقل من ألف كم بالعربية تجيب شمبر يبقى أكيد العيب الجوان الجديد واللي ركبه وأخد مقاساته ... وحسبنا الله ونعم الوكيل
خلاصة القول :لو خايف على عربيتك يا جماعة ابعد عن ناشيونال موتورز

وشكراً لاهتمامكم ومتابعتكم
أخوكم / محمد