الموضوع: سيارة ب 20.000 إستطلاع رأي في الأفضل وما هي إجراءات نقل الملكية ؟

المشاركة الأصلية كتبت بواسطة mahmoud naguib

msobhy رأيك يحترم بالتأكيد ولكن صعب يناسبني لسببين

أولا ضيقة وشكلها بقى مألوف جدا بمعنى ان أي حد بيستقل بيها دلوقت حتى لو أنا عامل فيها شغل نضيف جدا وده على المدى البعيد هيأثر عليا نفسيا (مع اني مبلتفتش لأي كلام من أي حد بس يهمني إن حاجتي تبقى شكلها حلو)

السبب التاني اني مش عايز أغيرها بعد سنة مثلا أو 2 أنا عايزها تفضل معايا فترة ولو ربنا كرمني بعد سنة أغيرها طبعا بس ممكن ميكونش متاح ليا أغير بسرعة فتستحملني شوية

سبب اني فكرت ف ال323 انها ناس كتير قالولي ناعمة ف سواقتها ومريحة وبتجري وبالنسبالي شايفها شيك جدا غير ان صالونها واسع وبيبان فيها اقل شغل وسعرها مناسب وإعادة بيعها سريعة جدا (المعروض قليل جدا والمطلوب كتيييييييييييييير)

كنت هفكر ف ال128 لو عامل حسابي اني هتعلم بس عليها أو ان معايا فلوس تانية هقدر بعد سنة مثلا أجيب بيهم عربية تانية
بس ف حالتي دلوقت التفكير ده مش مناسب !

أنا حابب أسأل بس حضرتك سؤال
لو رحت سوق الجمعة مثلا وعجبتني عربية المفروض إيه الخطوات اللي باخدها مع البائع في حالة التوكيلات ؟؟

شوف يا صديقى
كلامك كله على راسى من فوق - لكن هيه وجهات نظر
وانا باشترى ال 128 كنت هاجيب 323 وبعد ما اشترتها كنت متضايق جدا - احب اقولك ان أحب عربيه لقلبى هيه ال 128
السنه والسنتين والتلاته فى عمر العربيات ولا حاجه فى الفئه اللى انت بتتكلم فيها
احنا كان عندنا عربيتين 323 واحده عاديه وواحده هاتشباك - مش هانكر انهم كانوا احسن من ال 128 - ولكن نفس الفئه بمعنى ان الفارق مش كبير خااااااااااااااالص

حاول الفتره الاولى من حياتك فى العربيات تقضيها بأقل تكلفه وحاول تتغاضى شويه عن الشكل والراحه - انا بكلمك من نفس الوضع المادى اللى كنت فيه وانا باشترى ال 128

بخصوص الشراء من السوق طول عمرنا عايشين بمبدأ اننا نبيع فى السوق - لكن عمرنا ما نشترى منه - بنسبة 90% هايتنصب عليك الا اذا كان معاك حد محترف

ربنا يرزقك عربيه حلوه وتريحك وبسعر حلو ان شاء الله

المشاركة الأصلية كتبت بواسطة mahmoud naguib

ربنا يكرمك وشكرا لردك

بس طالما هشتري أشتري منين مثلا ؟؟
أنا معنديش حد من قرايبي ولآ اصحابي عنده حاجة زي كدة وعايز يبيعها
ومعرفش على مواقع التسويق غير دوبيزل والوسيط وكونتاكت كارز
فهل في طريقة غير كدة ؟؟

ولو افترضنا اني شفت عربية على موقع من دول وعجبتني إي اللي بعمله
هل بدفع عربون وبعدها نروح نسجل مثلا ولآ إيه الخطوات ؟

هاتشترى من اى مكان انت عايزه ما عدا السوق

الشراء يفضل يكون من صاحب السياره بدون اى وسيط

لازم يكون معاك واحد فاهم اوى علشان يقلب فى العربيه كويس

موضوع الشراء ليه مليون طريقه
بالنسبه ليه انا برفض نهائيا مبدأ المقدم او العربون
خطواتى كالتالى
1- باجيب حد يشوف العربيه
2- باجرب العربيه بنفسى
3-بارفع العربيه فى اى بنزينه موثوق فيها
4- باتفق مع البائع على انى بكره هاشترى منه فى الشهر العقارى وادفع كامل المبلغ وهو لازم يجيب لى رخصه ساريه وبطاقه شخصيه ساريه وشهادة مخالفات ميكونش عدى عليها ازيد من 3 أو 4 أيام
5- باتفق على ان كل اللى فى العربيه من قبل ما اشترى اصبح بتاعى -يعنى اكسسوار وكوريك و طفايه وما شابه ولو العربيه اتشال منها مسمار مش باشتريها الا لو اتنزل فى سعرها