الموضوع: تعمل ايه لو و انت في لجنه الضابط ضربك القلم

المشاركة الأصلية كتبت بواسطة Hossam_Hassan

مش هقول ممكن يحصل، هو حصل فعلا من كام يوم

أحد زملائى فى الشغل، بيشتغل كمان فى مصر للطيران و ابن ناس جدا و مؤدب و محترم، من كام يوم فى لجنة عند ميدان روكسى، تقريبا الساعة 12 مساء و كان معاه مراته و ابنه و أخوه و مراته فى عربية وراهم، اخد مخالفة علشان الحزام، هو بيقول انه كان رابطه و أمين الشرطة بيقول انه ربطه و هو داخل على اللجنة، عن نفسى مصدقه لأنى بشوفه كل يوم تقريبا و بيبقى رابط الحزام و مرتين قابلته صدفة و بيبقى مقعد مراته و ابنه ورا، المهم عمل محضر تصالح فى ساعتها و دفع، أثناء عمل المحضر حصل نقاش بينه و بين أمين الشرطة تانى، و هوب راح ظابط اسمه "حسام" جاى من ورا الأمين و رزعه بالقلم، الولد بيقولى انه جالوا زى صدمة لأنه مش متخيل اللى حصل، بعد كام ثانية تمالك نفسه و حاول يرد القلم بس الأمين منعه، و مراته و أخوه نزلوا و حاولوا يهدوه.

ابتدت الموبايلات و جت الدورية الراكبة و المفاجأة الأولى ان العقيد الكبير اللى ماسك الكمين، يعنى رئيس الظابط اللى ضرب، أدعى ان زميلى اقتحم الكمين، الموضوع كبر و قرايبه جم من كل حتة و كمان راجل محترم جدا عضو مجلس شورى كان شايف الواقعة بالصدفة و فضل مع زميلى فى كل الخطوات، المهم طلعوا على القسم، فى القسم معملوش محضر و حاولوا ينهوا الموضوع، راحوا سايبينهم و راحوا مديرية الأمن و هناك الوضع اختلف و اتعمل محضر و راح عمل تقرير طبى لأن شفته اتعورت و ازرقت جامد.

تانى يوم استكملوا التحقيق و المفاجأة التانية ان العقيد اصر على ان زميلى اقتحم الكمين ، راح زميلى ارفق محضر التصالح بتاع الحزام فى المحضر كأثبات على كذب العميد علشان مش منطقى ان واحد يقتحم كمين و بعدين يتعملوا محضر حزام.

الموضوع اتصعد للتفتيش و الضابط موقوف عن العمل، و اتفتح تحقيق تانى مع العميد و تحقيق تالت مع ضباط القسم اللى معملوش محضر.

نصيحتى بقى لأى حد يتحط فى الموقف ده انه يمسك اعصابه و مايمدش ايده و يحاول يخلى اى حد حضر الموقف انه يشهد معاه و يروح على وزارة الداخلية عدل و يقدم شكوى فى التفتيش و هناك هيقوموا بالواجب و اكتر علشان نفسهم فعلا يوروا الناس ان الشرطة كويسة و يحسنوا سمعتها اللى بقت زى الزفت.

للاسف مفيش كلام يتقال
هل مات الشرف و الرجوله تماما في البلد المنيله دي؟
خلاص مفيش حد بيتعامل الا بالقوه و الارهاب؟
يا تري هل لو كنا مكان الفلسطينين ولا العراقيين كان حصلنا كده؟
علي الاقل معاهم سلاح و بيردو بيه
لنا الله
هو الوحيد اللي ممكن ينتشلنا من مستنقع الفساد الاداري المالي التنفيذي القانوني اللي وصلناله
البلد منهاره تماما
و الاوضاع فعلا ملتهبه و مش عارف ناقص ايه تاني يحصل علشان البهوات يطلعو علينا في التلفزيون و يعترفو بالاوضاع الحاليه المنيله بستين نيله اللي اتسببو فيها من اول يوم اغتصبو فيه البلد لحد النهارده
ربنا يبتليهم كلهم و من علي شاكلتهم بالامراض المستعصيه و الخبيثه علشان يذوقو عقاب الدنيا و في الاخره ربنا يعاقبهم في جهنم
اخص و الف اخص علي ده حال وصلناله
ربنا يرحمنا و يجحمهم جميعا