تيل الفرامل الخلفي قرفني !!

**koko616** · 19-01-2016 06:47 PM

معايا تيل لانسر بومة 2007
عايز اغير تيل الفرامل لاني لسه مرجلشه قريب و الهاند رجعت مبتمسكش خالص
التيل كنت جربت مليته قبل كده حوالي 3 مرات تقريبا و برضه مش بيعيش

روحت سألت عند كذا مكان في اسماعيلية عشان اشتريه و اغير اللي متركب دا
فلقيت النيوزلاندي ب 120
الكوري الجولد ب 125
التايواني ب 140 و قالي اسمه green live
التايلاندي ب 150
و واحد قالي عنده تايلاندي بتاع شركة ميتسوبيشي في تايلاند بس ب 200

و روحت عند بتوع الاستيراد لقيت الياباني الاستيراد اللي هناك سمكه حوالي 3 او 4 مم .. و سعره 150 جنيه

و بعدين قولت اروح اسأل بتاع الفرامل اللي بيركبلي انهي احسن ... فقالي اصلا مينفعش تركب اي تيل من دول لان تخانتهم ضعيفة و هتضطر تغير الطنبورة بتاعتك مع التيل .. الحل انك لازم تملا التيل عشان يتملي بسمك كبير

فأنا محتاااااار و مش عارف خالص اعمل ايه ولا اتصرف ازاي و بصراحة مش معايا فلوس اجيب الاصلي خالص :(

افيدوني

**ahmed_eng2001** · 19-01-2016 07:26 PM

للأسف ... الى حضرتك ذكرته فى الاخر هو التصرف الصحيح ( من وجهة نظرى ) .... تركيب تيل الفرامل الاصلى ... هو ثمنه 600 جنيه تقريبا .. و بيتغير كل 240 الف كم ... فعمره طويل

الحلول الاخرى ... غير ذات جدوى و بتأثر على الطنبورة ... و الكلام ده برضوا للتيل الامامى

ممكن حضرتك تنقل الموضوع لقسم الميتسوبيشى ... و ان شاء الله نجد ردود اكثر افادة ليا انا كمان

**koko616** · 19-01-2016 07:41 PM

مش معايا خالص و الله ... طب كلام بتاع الفرامل صحيح ؟

**ahmed_eng2001** · 19-01-2016 08:01 PM

انا مش بحب موضوع ملو التيل ... علشان الخامة بتكون مش زى الخامة الاصلية ... و كنت عملتها قبل كدة فى عربيتى القديمة .. بس دى قديمة و مش مشكلة
اما عن موضوع فرق التخانات ... مقدرش افيدك علشان انا مشفتش التخانات الى بيتكلم عليها بتاع الفرامل

**hilal** · 19-01-2016 09:14 PM

انا جربت الكوري "جولد" في لانسر مكواة كان كويس

**koko616** · 19-01-2016 10:16 PM

طيب هل الكوري الجولد لو اتركب على الطنابير القديمة فيها مشكلة ؟

**Mecha** · 20-01-2016 12:52 AM

الطمبوره عندك معديه , لازم تغيرهم , وجرب النيوزلندي

**pepo2011** · 20-01-2016 10:40 AM

واضح ان حضرتك خلصت علي الطنابير ياراجل يا محترم حد في الدنيا يملا تيل 4 مرات

من غير ماشوف حاجة طبعا الطنابير انتهت ومهما مليت التيل هاياكل في الطنابير زيادة ولو جبت حتي الاصلي ابو 600 برضو مش هايعمل حاجة لانك للاسف دمرت الطنابير
للاسف مفيش قدامك حل غير انك تغير تيل وطنابير وتجيبهم جديييييييييد تايواني او تايلاني كويس

اللهم بلغت

**Moe_Adel** · 20-01-2016 01:45 PM

موضوع تخانة الطنابير بيفرق طبعا لان في حاجة للطنبورة اسمها max diameter و ده بيقدر عن خلاله بتاع الفرامل يعرف التخانة المناسبة للتيل بطرقة نسبة وتناسب و في الغالب مع مسح الطنابير بتشتغل كويس جدا عن تجربة لان ده مجال عملي.

**Mecha** · 20-01-2016 04:19 PM

المشاركة الأصلية كتبت بواسطة moe_adel

موضوع تخانة الطنابير بيفرق طبعا لان في حاجة للطنبورة اسمها max diameter و ده بيقدر عن خلاله بتاع الفرامل يعرف التخانة المناسبة للتيل بطرقة نسبة وتناسب و في الغالب مع مسح الطنابير بتشتغل كويس جدا عن تجربة لان ده مجال عملي.

مفيش حضرتك حاجه اسمها تخانة تيل المناسبه- دا اختراع مصري - التيل بينزل استندرد ، وزي ما قلت لو جابت ماكس ديامتر يترمي الطنبور . لا يمكن تعوض الحديد بتيل