بوابة اوكتافيا a4 لbody throttle

السلام عليكم و رحمه الله
عندي مشكلة كبيرة
العربية موديل 2000
علي الidle بتاعتها العربية بتفصل لو هي باردة
اوقات كتير لو دوست بنزين مرة واحدة و هي ممورة و رفعت رجلي , مؤشر الـRPM ينزل لحد 2 و الموتور يفصل

لازه العربية تسخن علشان الحركة دي متحصلش
و مع ذلك ممكن و هي سخنة تحصل و انا بنقل مثلا
المهم ان اي كشف كمبيوتر بيطلع ان البوابة فيها مشكلة
غيرتها مرة قبل كده
و ظبطت شوية و بعدين رجعت باظت اكتر
خلال ما كنت بشتري البوابة كالعادة باخد معايا من عند البياع 4 او 5 بوابات , افضل اجرب لحد ما واحدة تضبط
بس من اللي انا شايفه ان اي كشف كمبيوتر مش بيطلع المشكلة فين بالتحديد
لذلك انا شاكك انها ممكن مش تكون بوابة
ممكن تكون حساس الـair mass مثلا

حابب قبل ما ابدأ افك بنفسي اخد اراء
فياريت اللي شايف حاجة يدلني عليها
سؤال تاني
لو حبيت اشتري بوابة اوريجينال اجيبها منين و بكم تقريبا
و شكرا

اقتباس:

---

بس من اللي انا شايفه ان اي كشف كمبيوتر مش بيطلع المشكلة فين بالتحديد

---

اجهزه كشف الاعطال ممكن تعطيك العطل مباشره .. او تعطيك اسم السيستم اللى فيه العطل

فى كشف الاعطال بيطلع كود عطل محدد او اكثر من كود

خذ الاكواد دى ( رقم الاكواد ) .. و شوف مجموعه الاسباب اللى ممكن تسبب الكود ده .. و بعدين يتم استبعاد بعضها .. اما منطقيا او ان القطعه تكون سليمه بعد فحص الميكانيكى

فيه مواقع محترمه جدا بتحصر لك الاسباب .. و اسبقيتها .. و كمان بتحدد لك السبب الاكثر احتماليه للبدء به

بكده المشكله ستتحدد اكثر و تنحصر فى سبب او اثنين ..

الافضل تعمل كده قبل ما تشترى بوابه جديده

اقتباس:

---

اجهزه كشف الاعطال ممكن تعطيك العطل مباشره .. او تعطيك اسم السيستم اللى فيه العطل

---

قصدى بالسيستم .. جزء ميكانيكى او مجموعه من الاجزاء .. موضوع عليها حساس او اكثر .. ليقيس عمل هذه المجموعه المتكامله

احصر البحث فى المجموعه التى اعطى حساسها كود الخطأ

و بعدين انا مستغرب .. البوابه لازم يكون عليها حساس طبعا بطريقه ما .. علشان الكمبيوتر يظبط نسبه الخلط

اقتباس:

---

ممكن تكون حساس الـair mass مثلا

---

حسب فهمى
اولا ..
ال air mass لو عطلان ( مبيشتغلشى خالص ) .. لازم يظهر كود خطأ مباشر لل air mass .. لان الكمبيوتر بيأخذ منه قراءه مباشره ليحدد على اساسها نسبه الخلط ( اعطاء امر للرشاشات بكميه البنزين المطلوبه و المناسبه لكميه الهواء الداخل )

ثانيا ..
لو انت قصدك انه شغال بس بيقرأ غلط .. فخلى بالك ال air mass .. ده صعب انه يعطل .. و بيقعد فى عربيات 100 و 150 الف كم

و ممكن يبوظ منك لو حاولت تنظفه ( لا يتم لمسه باليد حتى ) .. و حتى لو حبيت تنظفه .. ده ليه منظف خاص اسمه air mass cleaner .. و لا اعتقد انك حتلاقيه بسهوله لو لقيته اصلا .. فى اسكندريه مفيش

ال air massعليه طبقه خاصه ( يعنى موش حساس عادى ) .. استعمال اى منظف آخر ممكن يشيل الطبقه دى .. و هذه الطبقه لازمه ليؤدى وظيفته


ثالثا :
و بعدين لو حساس ال air mass بيخرف ( بيعطى الكمبيوتر كميات خاطئه للهواء الداخل ) .. ستصبح نسبه الخلط جوه اليساتم غلط ..

و حساس الشكمان حيبين ذلك لو نسبه التخريف كانت كبيره بكود خطأ ( يعنى لمبه Check engine بتنور على 25% مثلا لليابانى .. و قد تختلف النسبه المئويه باختلاف نوع السياره ) ..

و لو كانت نسبه صغيره ( مقيش كود ظهر ) .. فممكن برضه جهاز الاعطال يقرأ النسبه المئويه للزياده او النقص لحساس الشكمان ( العربيه تكون دايره ) .. مثلا قراءها 3% يبقى كل شيئ شيه طبيعى و مفيش مشكله .. اما لو قرأها مثلا 15% فى عربيه يابانى فيبقى عندنا بدايات مشكله ( برغم ان اللمبه موش منوره و مفيش كود خطأ ) ..

ففى حاله الزياده او النقص بنسبه مئويه صغيره لحساس الشكمان .. كده ممكن تتأكد ان الخلط سليم و بالتالى قراءه ال air mass سليمه .. و يبقى دى موش سبب تبطيل العربيه

شكرا علي المشاركة و الاهتمام
ان شاء الله هقرأ كلامك بتأني اكتر و هناقشك ان شاء الله