جناب البيه السباك مصنعيته كام ؟

**EgyArmy** · 26-01-2016 08:29 PM

كلمت واحد صاحبى عشان يجيبلى واحد سباك عشان يعمل التالى
أنا ساكن فى الدور التالت و الدور الأول معمول فيه السباكة تمام التمام , فكان المطلوب أنه يمد المواسير للدور التانى و ميشتغلش جواها حاليا , و يمد المواسير للدور التالت بتاعى و يشتغل جواها

طبعا الحمام هيكون فيه بانيو و حوض و مصفى فى الأرض و لمؤاخذه
المطبخ هيكون فيه الحوض و مصفى فى الأرض

طبعا صاحبى دة مقالش للسباك على قصة الدور التانى و قالة أننا عايز أعمل سباكة الشقة بتاعتى لأنه مكانش عارف قصه الدور التانى دة
و فجأة و بدون مقدمات السباك قاله أنه عايز حوالى 6 ألاف جنيه مصنعيه !
أمال لو كان قالة على الدورين كان قال 10 ألاف بقى !

أيه رأيكم فى السعر دة و المفروض المصنعية تكون فى حدود كام لو لشقتى لوحدها و يكون كام لو هيمد المواسير للدور الى تحتى و يشتغل فى شقتى ؟ طبعا أنا من أسكندريه عشان كل محافظة ليها أسعار معينه و المواسير ان شاء الله هتكون بننجر

**HeMa_LanCeR** · 26-01-2016 09:15 PM

انا عامل شقتي حمامين ومطبخ بالفنش ب 1250 :)

**amr011111** · 26-01-2016 09:18 PM

ده سباك حرامى. قوله هعمل جمعيه وهبقى اتصل بيك لما اقبضها

**acura** · 26-01-2016 09:26 PM

متوسط مصنعية المطبخ والحمام من 1500 الى 2000 جنيه حسب الصنايعي والمنطقة انما الصنايعي ده يا اما بيستهبل يا اما بيستهبل. سيبك منه واسأل عن صنايعي واتنين وشوف حد مجرب من قرايبك او اصدقاءك واتفق معاه قبل الشغل هيعمل كذا وكذا بادق ادق التفاصيل عشان ميجيش بعد كدة يقولك عايز زيادة .. وكمان تديله المبلغ على دفعات في نهاية كل يوم شغل وحاول تجيب الادوات والمواسير من محل قريب منك عشان لو حبيت تشتري او تبدل او ترجع حاجة بعد نهاية الشغل يبقى المشوار قريب. وباننجر مواسير ممتازة وبيدوا ضمان مدى الحياة بعد المعاينة واختبار الكبس بس اسعارها زادت 10% من اسبوعين فقط. بالتوفيق لحضرتك.

**EgyArmy** · 26-01-2016 09:33 PM

المشاركة الأصلية كتبت بواسطة hema_lancer

انا عامل شقتي حمامين ومطبخ بالفنش ب 1250 :)

طب ده أنا عندى حمام واحد و مطبخ واحد
ده غير أنه من العمومى بس هيوصل المواسير و الصرف لدور كمان

**EgyArmy** · 26-01-2016 09:35 PM

المشاركة الأصلية كتبت بواسطة amr011111

ده سباك حرامى. قوله هعمل جمعيه وهبقى اتصل بيك لما اقبضها

هههههههههههههه والله هقولهاله ههههههههههههههههه

المشاركة الأصلية كتبت بواسطة acura

متوسط مصنعية المطبخ والحمام من 1500 الى 2000 جنيه حسب الصنايعي والمنطقة انما الصنايعي ده يا اما بيستهبل يا اما بيستهبل. سيبك منه واسأل عن صنايعي واتنين وشوف حد مجرب من قرايبك او اصدقاءك واتفق معاه قبل الشغل هيعمل كذا وكذا بادق ادق التفاصيل عشان ميجيش بعد كدة يقولك عايز زيادة .. وكمان تديله المبلغ على دفعات في نهاية كل يوم شغل وحاول تجيب الادوات والمواسير من محل قريب منك عشان لو حبيت تشتري او تبدل او ترجع حاجة بعد نهاية الشغل يبقى المشوار قريب. وباننجر مواسير ممتازة وبيدوا ضمان مدى الحياة بعد المعاينة واختبار الكبس بس اسعارها زادت 10% من اسبوعين فقط. بالتوفيق لحضرتك.

ربنا يكرمك على ردك يا باشا و حتى لو زادت هنعمل أيه بس المهم حاجة تعيش و تستحمل و تكون مضمونه و فى نفس الوقت نلاقى الى بيراجع على الصنايعى و ربنا يكرمك ان شاء الله

**A7medelfe2y** · 27-01-2016 01:41 AM

اممممممممم ريحت دماغي وجبت الحاجه بنفسي وركبت كل حاجه انا واخويا
بس السعر كدا فوق العادي بكتييييييييييييير

**ahmedwagdy03** · 27-01-2016 10:13 AM

ليه 6 آلاف . ده لو حيجيب الحاجة مش حيتكلف كدة
بص إحسبها تقريبا كالآتي

1- الحوض بالخلاط 150 جنية
2-القاعدة بتوصيلاتها 150 جنية
3-البانيو بالخلاط 600 جنية
4-وصلة غسالة 50 جنية
5-حوض مطبخ 150 جنية
6- مواسير داخلية تغذية و صرف للحمام و المطبخ مع تركيب سيفونات الأرضية 700 جنية و لازم يكبس مياة فى المواسير .
7- 200 جنية خامات أسمنت أبيض و أسود و تيفلون و خلافه .

غير كدة يبقى حرامي . و أنت ممكن تتفاهم معاه على كدة و إما يوافق أو يرفض و تشوف غيرة .

للأسف النوعية الوسخة من الصنايعية الجهله لما بيلاقوا قدامهم واحد مش فاهم بيدوا أسعار عالية .

من الآخر ممكن تحسبها بعدد الأيام اللى حيشتغلها و إضربها فى يومية 150 للسباك و 50 للمساعد و بكدة تبقى عامل معاه أحلى واجب علما إن مافيش سباك بيحصل 4000 جنية فى الشهر و لا مساعد بياخد 1500 .