مشكلة شيك بدون رصيد

**moatz** · 28-01-2016 04:42 AM

بعد اذنكم يا اخواني محتاج مشورتكم و يا ريت اللي عنده خبرة بالموضوع ده ما يبخلش عليا بالنصيحة

دلوقتي انا معايا شيك بنكي علي شخص و كان ميعاد استحقاقه من شهرين تقريبا ، و روحت البنك كذا مرة و كل مرة الاقي مفيش رصيد في الحساب ، و اكلم صاحب الشيك يتحجج بالظروف و حاسه كده بيماطلني و بقالي علي الحال ده شهرين.

ايه التصرف القانوني الصح اللي اعمله دلوقتي عشان اضمن رجوع حقي ، و يا ريت لو حد يدلني علي محامي كويس و كنت عايز اعرف اتعاب المحامي بتبقي كام في الحالة ديه لو حد عنده سابق تجربة في الموضوع ده ، و جزاكم الله كل خير.

**MOUSTAFA_SAAD** · 28-01-2016 08:40 AM

خد رفض من البنك اهم حاجه وبعد كده بتقدم بلاغ للنيابه

**HeMa_LanCeR** · 28-01-2016 02:20 PM

بالظبط خد رفض من البنك
والبنك هيبلغة لو في نية للدفع هيدفع
مافيش يبقي المحامي هيرفع قضية وعموما عمولتة 2% من الشيك وبتختلف من محامي للتاني

**moatz** · 28-01-2016 05:29 PM

اشكرك ا/ مصطفي سعد علي نصيحتك ، جزاك الله خيرا

**moatz** · 28-01-2016 05:32 PM

اشكرك ا/ ابراهيم علي نصيحتك ، معلش هتقل عليك هل حضرتك تعرف محامي كويس للموضوع ده اتعامل معاه .. انا اصلي عمري ما اتعاملت مع محامي قبل كده ، و جزاك الله كل خير.

**طارق _عبد السلام** · 28-01-2016 06:59 PM

عرفه انك ضهرت الشيك لواحد تانى والتانى جاب رفض على الشيك وبيطالبك بسداد المبلغ...دى طريقه علشان يحس لو عنده دم انك هتدفع الشيك من جيبك تانى ..يمكن ضميره يتحرك

وطبعا هتجيب رفض على الشيك وتشوف محامى هيظبطهولك لو مماطل

لكن لو متعثر فعلا رجاء تحاول معاه حتى لو تجدول الدين...بس تتيقن الاول انه متعثر وليس مماطل

**moatz** · 28-01-2016 08:53 PM

اشكرك ا/ طارق علي نصيحتك ، والله لسه قافل المكالمة معاه اهوه و بسمع برضه نفس الكلام و طلب مهلة شهر تاني لعل الأمور تتحسن ، المشكلة إن انا سمعت اني لو ما اخدتش إجراء قانوني في خلال 3 أشهر هيروح عليه حقي في المطالبة بعقوبة الحبس من خلال رفع جنحة عليه ، و ساعتها هتبقي مجرد مطالبة مدنية عادية بدين فلوس ، و ساعتها ولا ها يهمه مني اي حاجة ، عشان كده انا كنت بسألكم لأني خايف انه يكون بيلعب معايا اللعبة دي علي جهل مني لحد لما تعدي المدة القانونية لإمكانية رفع جنحة شيك بدون رصيد.

**moatz** · 28-01-2016 08:56 PM

ا/ محمد سليم ... للأسف المبلغ كبير 350 الف جنيه عشان كده انا عايز اعرف الصح اللي المفروض يتعمل عشان ما اغلطش غلطة تضيع حقي علي جهل مني

**svneleven** · 29-01-2016 05:12 AM

حضرتك الحل الوحيد ترفع قضية و تاخد حكم لكن يكون ليك حد يعرف ينفذ الحكم لان معظمهم بيدفع ل بتوع تنفيذ الاحكاك او هم مش يبنزلو ينفذة من اصله. و ممكن لو محامي صايع هو يزق عليه بتوع تنفيذ الاحكام. اعتقد ما فيش في ايدك غير انك تشوف محامي صايع بمعني كلمة صايع و تعشمه بمبلغ حلو او نسبة من المبلغ الاجمالي علي شرط ينفذ. مش هيعرف ينفذ يبقي شكرا.