الموضوع: تنضيف الموتور من الداخل من بقايا الزيت المحترق تجربه عملية

كتب Mohammed Saadi



الأمس كان يوم صعب جداً.
اللي في الصورة ده راس بستم الموتور بتاع عربيتي بعد فكه ، قبل وبعد التنضيف..
العربية دي كانت تقيلة في طلعتها الصبح ، وكمان في طلوع الطرق الصاعدة كانت تقيلة شوية وبتاخد وقت.
للاسف اللي بيحصل لما أي حد بيشتري عربية مستعملة قبل عملية الشراء بيكشف علي الصاج والعافشة وبيشوف الكهرباء و ممكن يقيس كبس الموتور ، أكتر من كده مش بيحصل..
بعد عملية الشراء الطبيعي المعتاد بيغير سيور ، فلاتر ، زيت، بوجيهات ، وممكن يركب كاوتش و كسوة جديدة وأكتر من كده بردوا مش بيتم حاجة زيادة .
المصيبة بقي في اللي جوة ، اللي مش باين أصلاً غير بعد الفك ، وده بسبب أن في ناس يوم ما بتقرر تبيع عربيتها بيهمل فيها بشكل مستفز وبيستخسر يصرف عليها جنيه وطبعا بتأخر في غيار الزيت ومش بيتم تغيره غير بعد معاده بفترات طويلة فبيسبب تراكم دهون بشكل بشع فوق راس البستم زي اللي في الصورة الاولي وده بيكتف حركة الموتور جدا وخاصة في الصباح الباكر مع الجو البرد ده وتجمد الزيت حواليه وبيقلل من العزم جامد في سحب العربية. ومهما غيرت بوجيهات جديدة أو فلاتر فمش هتحس بفرق قوي أو يذكر.






الموضوع ده عشان يتم صح لازم أول حاجة تنزل زيت الموتور القديم كله علي الارض و بعد كده يتفك كارتيرة الزيت من تحت وتغسل ببنزين من فوق وتحت جامد ويفضل يكون الغسيل بمسدس هوا وبعد كده تغير جوان الزيت بتاع الموتور من فوق قبل التركيب والتقفيل وبعدين تركب الكارتيرة تاني وتسقط زيت جديد وتركب فلتر..
النتيجة النهائية : بسم الله ماشاء الله فوق الممتازززززززة و السحب رووووووووعة والعربية بقت ناعمة جداااااااااااا وبتجري أكتر من الاول بسرعة جدااااااا وسلاسة كانها حصان كان مربوط واتفك


الموضوع ده أنا كتبته للايضاح عشان الناس تفهم أن الصيانة مش من برة فقط ولكن من داخل الموتور أيضاً
وده شكل الموتور من تحت بعد التنضيف.