مش عايز اتغرب طول عمري .. بس مش عارف اعيش في مصر

السلام عليكم ..اكيد ناس مرت بنفس ظروفي
انا دفعة 2007 اسنان
بقالي في السعوديه 7 سنين من ساعة مااتخرجت ..ونزلت نهائي لاني جي بي ممارس عام
وكل زمايلي اللي بقوا بييجوا بقي معاهم شهاده اعلي ومرتب اضعافي
وكنت محتاج احضر دراسه وارقي نفسي
ولظروف خاصة باسرتي في مصر.. برده ولاني عازب وعندي 32 سنه وضغط اهلي والجواز
ونازل نهائي بنية الاستقرار التام في مصر ..
انا بقالي حوالي شهر في مصر ... بس حاسس بصدمة حضارية .. مش قاصد اقلل من البلد ولا اتكلم في السياسه .. انا قرفان من كل حاجه .. وعندي سخط عام
كنت نازل بطموح كبير ومقبل عالحياة جامد ومتشوق للنزول
.. اتجوز واحضر وافتح عياده ووكده
انا فعلا حاسس بزهق ورحت استلم شغلي .. لقيت الموظفين والروتين وحاجات كنت ناسيتها من زمان
ومرضتش استلم قلت اخد اسبوع ولا حاجه كمان
الواسطه .. واخلاق الناس وقلة الاحترام العام وغلاء الاسعار وحاجات كنت ناسيتها من زمان ..
لدرجة مبقاش عندي نفس اصد او ازق مع حد
بقيت مستسلم
يعني لو عطيت لسواق تاكسي الفلوس مجمده ونزلتومرجعش الباقي مبتكلمش بدل ما اتعارك
لو موظف طلب رشوه يا اما يوقفلي مصلحتي مش ححارب برضه حعمل اللي هو عايزه عشان ما اخشش في صراع مع حد
حتي المبلغ اللي معايا طار في الشقه... اشتريت شقه وخدت حوالي 450 الف جنيه
وحتي العربيه والعياده والجواز طلعوا حساباتهم اعلي من ما كنت عامل حسابي او يا دوب
لان الدنيا زادت في مصر جدا ...
.. الحمد لله علي كل حال
المشكله اني مينفعش اسافر تاني حاليا لظروف عائليه ولاني برده لسه جي بي ومحتاج اتطور او احضر ..
ولو اتجوزت علي مرتبك ده وانت هناك ومعاك مراتك مش حتحوش حاجه وعمرك حيعدي ومش حتعرف تدرس تاني
فعامل زي اللي واقف في النص ..
لا عارف اتاقلم .. ولا عايز اسافر تاني
يا ريت اللي مر بظروفي ونزل نهائي يقولي
.. اتخطي المرحله النفسيه دي ازاي
من غير تقليل من المشكله
او اعمل ايه عشان اندمج في مصر ؟؟
نصائح من اللي مر بحالتي
يا ريت نصائح عمليه حقيقيه بعيد عن المثاليه اوالسياسه
______يعني انا في حيره نفسيه رهيبه

Considering your age .. it's time to get married , but don't rush things

Start your master degree .. meanwhile start looking for a wife .. but don't rush it

after that .. leave and never come back

حضرتك نازل متشوق للحياة في مصر و متفاؤل ؟؟!!
حضرتك كنت بتسمع عن مصر ايه بالظبط و من المصريين اللي بيجولك مش فاهم !!!
لكن الحل البسيط متستعجلش في الجواز ظبط نفسك و دنيتك و شغلك ، عشان متعش في مصر زي الموظف الغلبان
لو عاوز تعيش في مصر يعني فلوس كتير
مفيش فلوس متعش في مصر
و ربنا يكرمك ...

هو حضرتك مكنتش بتنزل اجازات فى ال٧ سنيين يعنى مخلصتش اوراق من مصر فى الاجازات مسمعتش اخواتك واقاربك عن الاحوال الا لما نزلت انا فى راي انك ساخط علشان عليك ضغط انك لازم تنزل علشان تتجوز وتحضر لدراستك وصعبان عليك العيشه الهاديه من غير مشاكل فى السعوديه لانك اتعودت انك تكون بعيد عن المشاكل بكل انواعها سواء المهنيه او العائليه واحساسك انك هتدخل فى دائره المسئوليه بعد الراحه عامله ضغط عليك اولا لازم تقتنع ان قرارك ده فى خير لك لان ربنا مبيعملش غير الخير ثانيا بص للجانب الايجابى فى مصر زى وجودك مع اسرتك وانك بجانب اهلك لان محدش ضامن عمره ثالثا لازم تقعد مع نفسك وشوف انت عايز ايه تعمله فى حياتك يعنى تتجوز ولا تذاكر ولا تسافر وتضحى بالاتنيين اما عن ظروفك الاسريه فكل الناس فى كل الدنيا عندها ظروف وربنا بيعطى القوه على قد قدرتك على الاحتمال من الاخر سيب السخط وارضى باللى انت فيه وتذكر ان فى ناس تعابنيين اكتر منك بكتير وعندهم ظروف بس راضيين وصدقنى الرضا هو اللى بيجيب السعاده والهدوء النفسى بعد رضا ربنا

و الله ما عارف اقولك ايه

عموما انت قدامك فرص عمل كتير كطبيب ذو خبره كويسه

في دول افريقيه كتير تقدر تشتغل فيها كويس و تعمل فلوس

طالما معاك قرشين حلوين و اعزب فممكن تخوض التجربه

اقتباس:

---

المشاركة الأصلية كتبت بواسطة melouk1

حضرتك نازل متشوق للحياة في مصر و متفاؤل ؟؟!!
حضرتك كنت بتسمع عن مصر ايه بالظبط و من المصريين اللي بيجولك مش فاهم !!!
لكن الحل البسيط متستعجلش في الجواز ظبط نفسك و دنيتك و شغلك ، عشان متعش في مصر زي الموظف الغلبان
لو عاوز تعيش في مصر يعني فلوس كتير
مفيش فلوس متعش في مصر
و ربنا يكرمك ...

---

فعلا انا كنت نازل بطموح وشغل ونجاح وكده
قلت تتجوز وتحضر حاجه وتفتح عياده وكده
انا زمايلي الي مسافروش منهم نجحوا برده .. بس ظروفهم غيري في الاول
والحاجه فعلا اللي مش عايزها اني اعيش موظف بس كده
لان كل حاجه بتغلي والموظف الوحيد المظلوم
مثال بسيط
سائق التاكسي بيقلي لو البنزين زاد ربع جنيه انا حزود جنيه .. وكزلك كل صاحب سلعه
الخاسر الوحيد هو العامل والموظف اللي ملوش دخل تاني

اقتباس:

---

المشاركة الأصلية كتبت بواسطة ست الدار

هو حضرتك مكنتش بتنزل اجازات فى ال٧ سنيين يعنى مخلصتش اوراق من مصر فى الاجازات مسمعتش اخواتك واقاربك عن الاحوال الا لما نزلت انا فى راي انك ساخط علشان عليك ضغط انك لازم تنزل علشان تتجوز وتحضر لدراستك وصعبان عليك العيشه الهاديه من غير مشاكل فى السعوديه لانك اتعودت انك تكون بعيد عن المشاكل بكل انواعها سواء المهنيه او العائليه واحساسك انك هتدخل فى دائره المسئوليه بعد الراحه عامله ضغط عليك اولا لازم تقتنع ان قرارك ده فى خير لك لان ربنا مبيعملش غير الخير ثانيا بص للجانب الايجابى فى مصر زى وجودك مع اسرتك وانك بجانب اهلك لان محدش ضامن عمره ثالثا لازم تقعد مع نفسك وشوف انت عايز ايه تعمله فى حياتك يعنى تتجوز ولا تذاكر ولا تسافر وتضحى بالاتنيين اما عن ظروفك الاسريه فكل الناس فى كل الدنيا عندها ظروف وربنا بيعطى القوه على قد قدرتك على الاحتمال من الاخر سيب السخط وارضى باللى انت فيه وتذكر ان فى ناس تعابنيين اكتر منك بكتير وعندهم ظروف بس راضيين وصدقنى الرضا هو اللى بيجيب السعاده والهدوء النفسى بعد رضا ربنا

---

انا مش ساخط بمعني السخط

انا نازل فعلا بمزاجي
اما مكنتش عارف احوال البلد .. فانا بقرا اللي الناس بتكتبه عالفيس والاخبار عادي
بس الفيد باك كنت باخده من اسرتي.. لان انا اكبر اخواتي ولسه متجوزتش ومعظمهم اتجوزو وخلفوا
فدايما يقولو الدنيا حلوه وكده
كمان المغترب في الاجازات بيكون بيتفسح وبيصرف ويقضيها ومش شاغل باله اوي لانه كده كده ماشي
عكس اللي نزل نهائي فبيبقي موسوس من كل حاجه وشايف السلبيات

تاني حاجه هو احساس بالضغط النفسي اكتر منه سخط
لان اتعودت علي مستوي معين وحتي تعاملات مع الاصحاب والجيران هناك لفتره طويله

الناس هنا في مصر بعيدا عن السياسه .. فعلا مش عايزه تنضف
شوفو موضوع تاكسيات اوبر مثلا
الناس صعبان عليها يبقي في حاجه نضيفه في البلد
سواق التاكس الجشع .. بيبقي عايز ياخد اللي في جيبك وكمان ينزلك في اول الشارع اللي علي مزاجه .. وبيدخن وبيشغل مهرجانات ... ويقرفك طول السكه

اقتباس:

---

المشاركة الأصلية كتبت بواسطة bassem youssef

و الله ما عارف اقولك ايه

عموما انت قدامك فرص عمل كتير كطبيب ذو خبره كويسه

في دول افريقيه كتير تقدر تشتغل فيها كويس و تعمل فلوس

طالما معاك قرشين حلوين و اعزب فممكن تخوض التجربه

---

انا لو عايز اسافر تاني مكنت استنيت في الخليج وخلاص
بس انا لظروفي لازم اعيش في مصر بقي

والتفائل ده جالك من ايه؟ ههههه

الجواز مهم بس تخير كويس
لما يبقى عندك ٤٠ سنة ومعندكش اولاد بتبقى حاجه وحشة

اقتباس:

---

المشاركة الأصلية كتبت بواسطة tasaka

considering your age .. It's time to get married , but don't rush things

start your master degree .. Meanwhile start looking for a wife .. but don't rush it

after that .. Leave and never come back

---

حلوة الجملة الاخيرة
غادر ولا تعود ابدا
والله كانت حلم في يوم من الايام وحالت بيني و بينه الظروف الماليه
وانتهي بسبب الاستسلام للواقع الاسري

اهرب بجلدك

خبطتين في الراس توجع، وحضرتك شغلت وهتشغل نفسك بكذا خبطة: النزول - العمل الحكومي - شراء شقة وتجهيزها - البحث عن عروسة - إتمام الزواج - دراسة الماجستير - البحث عن وتأسيس عيادة

رأيي مفيش داعي يبقى كله كدا مع أو ورا بعضه، لإن كل خطوة من دي هي مرحلة كاملة للناس اللي أصلا عايشة هنا ومتعايشة وعارفة سكك الحاجات

لو ناوي تفضل في مصر يبقى تبدأ الدراسة بسرعة وممكن معاها تبدأ في تكوين عيادتك مع التأقلم مع ظروف العمل الحكومي، وتأجل الزواج مثلا ما أمور حضرتك تستقر والعيادة تبدأ تدر عائد وتكون تقدمت في الدراسة شوية وتكون كمان خياراتك المستقبلية بقت أكثر وضوحا

لو ناوي تسيب مصر بعد فترة يبقى دراستك أولا وأخيرا وفقط لإن أي حاجة تانية اكيد هتعطلك

كونك طبيب ديه ميزة كويسه لانك ممكن تفتح عياده فى اى مكان. يعنى تقدر تفتح عياده فى مكان شعبى وساعتها هتبقى مصاريف فتحها اقل من لو فتحتها فى مكان راقى. تقدر تاخد شقه ايجار جديد وتجيب اجهزة فيها وان شاء الله العياده تجيب التانيه اهم حاجه تراعى ربنا فى شغلك ثم تعمل سمعه كويسه بين المرضى كأسعار وأهتمام ومتابعه وبالتوفيق

اقتباس:

---

المشاركة الأصلية كتبت بواسطة tasaka

Considering your age .. it's time to get married , but don't rush things

Start your master degree .. meanwhile start looking for a wife .. but don't rush it

after that .. leave and never come back

---

Thanks for the advice

لولا انك وضحت ان مفيش مجال للسفر تاني لظروف عائلية كانت السبب فنزولك نهائي. كانت نصيحتي الوحيدة الاخيرة انك تتجوز وتسافر وتعيش برا حتي لو مش هتعرف تحوش حاجة. يكفي تعيش باسرتك فمكان نضيف. لكل شيء سعر.