دليلك الشامل للشراء من الخارج
السلام عليكم اهل المنتدى
النهارده انا حابب انقل خبرتى وتجربتى فى موضوع الشراء من خارج مصر عبر الانترنت, لانى وجدت الاسئله كتير والناس بردوا بتبقى متلغبطه ومفيش اجوبه او طريقه سهله او مرجع الناس تقدر تدور فيه او تسأل فيه , فحبيت انى اعمل موضوع شامل الناس تستفيد منه.
انا بدأت اعرف انى ممكن اشترى من برة مصر لما شركة ادفعلى عملت موضوع هنا فى المنتدى كاعلان ليها, الكلام دا كان فى 2014 تقريبا, وقعدت فترة افكر ودماغى تجيب وتودى لحد اما قررت انى اخوض التجربه بحاجه بسيطه , ومن ساعتها وانا تقريبا مبجيبش حاجه الا من بره, وحقول ليه بالتفصيل, وبدأت ادور على انسب الطرق وانسب الاسعار, وعلشان مطولش عليكوا نخش فى الموضوع.
----------------------------------------------------------------------------------------------------------------
*****الهدف******
سؤال بيطرح نفسه .....ليه اشترى من بره ؟؟؟؟
اقولك ليه:
1-عدم توفر السلعه
لما تبدأ تبص فى مواقع التسوق العالميه ,حتعرف ان السوق المصرى فقير لابعد الحدود فى السلع اللى فيه, ناهيك على رداءة الجوده وعدم توفر العديد من الخيارات, يعنى مثلا لو عايز جراب للموبايل, تلاقى الموجود نوع او اتنين متكررين فى كل المحلات, ولو نوع موبايل مش منتشر حتلف وتدوخ لحد اما تلاقيله حاجه....فى حين ان الحاجه موجوده بره مصر ومتوفره ومن كترتها مش حتبقى عارف تجيب انه نوع....ودا على سبيل المثال لا الحصر....وقيس على ذلك كل حاجه بقى.
2-جوده المنتج
للاسف السوء المصرى بيجيب اردئ الخامات ....علشان دى اللى سوقها ماشى.....ولو انت عايز حاجه ذات جوده انت وحظك يا تلاقى يا متلاقيش...ولو لقيت حتلاقى السعر مبالغ فيه.
3-الاسعار
زى ما ذكرت فى النقط السابقه انك ممكن متلاقيش المنتج اللى انت عاوزة موجود فى السوق ولو لقيته ممكن تلاقى السعر مبالغ فيه....فى حين انك لو جبته من بره ممكن تلاقى نفس السعر لمنتج احسن او لو نفس المنتج سعرة يكون اقل.....ودا حصل معايا فعلا ولاقيت حاجات فى محل واما حسبتها لقيت التكلفه بتاعتها من بره تقريبا تلات اربع السعر اللى فى مصر...وهو هو المنتج بالظبط.
4-الخيارات
بتلاقى قدامك خيارات لا حصر لها ..... الغالى و الرخيص.... الجديد والمستعمل.....الاصلى والتقليد......تلاقى حاجات اصلا احنا فى مصر مسمعناش عنها.
------------------------------------------------------------------------------------------------------------------
*****المواقع******
حد حيقولى معقول الكلام اللى انت بتقوله دا .....طيب اثبتلى ان كلامك صح وورينى مواقع الاقى فيها المنتجات دى.
حاااااضر....خد عندك
مواقع امريكى
http://www.amazon.com/
Electronics, Cars, Fashion, Collectibles, Coupons and More | eBay
Best Buy: Expert Service. Unbeatable Price.
مواقع صينى
AliExpress.com - Online Shopping for Electronics, Fashion, Home & Garden, Toys & Sports, Automobiles from China.
GearBest: Online Shopping - Best Gear at Best Prices
China Wholesale Supplier - Online shopping for cheap electronics gadgets with free shipping - TinyDeal
دى اشهر المواقع على سبيل المثال لا الحصر......وفيه غيرها كل يوم الواحد بيكتشفها.
------------------------------------------------------------------------------------------------------------------
*****الطريقه******
حد حيقولى .....يا عم انا اقتنعت وبصمت بالعشرة ان كلامك صح....حجيب الحاجه دى ازااااااااااى ؟؟؟!!!
هنا بقى نبدأ الكلام المفيد.....بص يا سيدى ......عندك كذا طريقه وانت اختار الانسب ليك:
1-التعامل المباشر مع الموقع والشحن من خلال الموقع.
2-التعامل المباشر مع الموقع والشحن عن طريق شركة شحن.
3-التعامل عن طريق وسيط.
------------------------------------------------------------------------------------------------------------------
*****التفاصيل*****
حقولك بقى كل طريقه وتفاصيلها علشان تبقى فاهم الدنيا ماشيه ازاى.
بس حتحتاج حاجه مهمه علشان نقدر نتابع ....وهى وسيله الدفع .....حدفع ازاااااى.
فيه كذا طريقه للدفع ....وعلى حسب طريقة الشراء اللى حتستخدمها حتحدد طريقة الدفع.
طرق الدفع:
1-فيزا
2-ماستر كارد
3-حساب Paypal
3-فورى
4-الدفع لدى الشركه
5-طلب محصل لاخد الفلوس
انا عن نفسى باستخدم الفيزا ....حد حيقولى ..طيب ودى امان انى استخدم الفيزا.....هو امن فى مواقع زى امازون مثلا, ولكن الاحتياط واجب .....ولهذا انا بستخدم ما يسمى فيزا انترنت (دا مسمها فى البنك اللى انا تبعه QNB) .
ميزة الفيزا انترنت دى انها ملهاش علاقه بالحساب بتاعك ....لانك بتشحنها بالمبلغ اللى انت عاوزة بس....ولهذا انا بعد اما بعمل الحسبه بتاعتى واشوف انا حشترى ايه والتكلفه كام, باقوم شاحنها او حاطط فيها فلوس بالمبلغ اللى انا محتاجه ...ولهذا انا مطمن من استخدام الفيزا....مش عايز اقولكوا ان انا دلوقتى بقيت استخدمها فى كل حاجه وبدفع تقريبا كل فواتيرى عن طريق النت بعيدا خالص عن الشراء....ولا زحمه ولا ركنة عربيه ولا طوابير ..... وانا فى البيت ادفع فى دقيقتين وخلاص.
وعلى حد علمى يوجد حاجه شبيها فى البنك الاهلى وال CIB فيهم حاجه مشابهه ومن غير ما تفتح حساب اصلا فى البنك, انك بتروح تطلع فيزا نت تشحنها وتستخدمها.
نيجى بقى لطرق الشراء اللى ذكرنها:
الطريقه الاولى : التعامل المباشر مع الموقع والشحن من خلال الموقع
ودى حضرتك بتخش فيها على الموقع وتعمل Account تحط فيه بياناتك ومن ضمنها العنوان اللى حتشحن ليه....وتبدأ تتسوق من الموقع عادى وفى الاخر حيحسبلك اجمالى التكلفه بالشحن.
*ميزة هذه الطريقه:
1-التعامل مع الموقع نفسه بيديك امكانيه انك تعمل Tracking للمنتج من الاول للاخر.
2-لو فيه مشكله فى المنتج بعد ما استلمته ممكن تكلم الموقع ويحدد طريقة تعويضك او استبدال المنتج.
3-احيانا بيكون فيه تخفيض لو اشتريت منتجين مع بعض....طبعا بتقدر تستفيد بالعروض دى.
4-احيانا بيكون فى عروض لمده ساعات قليله ....والموضوع زى ما تقول كدا للى يلحق يشترى....بالطريقه دى تقدر تلحق السعر المخفض.
*عيوب هذه الطريقه:
1-مش كل المواقع للاسف بتشحن لمصر....واحيانا مش كل المنتجات بتتشحن لمصر ....زى مثلا موقع Amazon حتلاقى حاجات بتتشحن لمصر وحاجات لا.
2-شحن الاوردر فى شحنه واحده مش دايما موجوده....يعنى حضرتك ممكن تعمل اوردر وتيجى حتحاسب تلاقيه مقسملك المنتجات على اكتر من شحنه, طيب ليه بيعمل كدا, لان المنتجات بتكون من اكتر من بائع وليها تواريخ تجهيز وشحن مختلفه.
طيب دا حيفرق معايا.....حيفرق فى حاجه واحده اللى هى الوزن ....لان كل شحنه انت بتشحنها حتتحاسب على الوزن فيها مستقل بدلا ما تكون الشحنه مجمعه.
3-طرق الدفع بتكون محدوده.....يعنى فيزا او كريدت او Paypal .....متعتبرش عيب اوى لو معاك فيزا ولكن لو ممعكش حتبقى مشكله.
-----------------------------------------------------------------
الطريقه التانيه: التعامل المباشر مع الموقع والشحن عن طريق شركة شحن
اشهر شركات الشحن:
1-Shop & Ship من ارامكس.....ودى انا شخصيا اتعملت معاها
2-DHL ودى واحد صديقى اتعامل معاهم بس حقيقة معرفش عنها تفاصيل
طريقة العمل مع Shop & Ship:
بمنتها البساطه حضرتك حتدخل موقع https://www.shopandship.com/
حتعمل معاهم Account ودا بيفتحلك زى صندوق بريد باسمك .....ليه مصاريف فتح بتكون حوالى 40 دولار (مش عارف المبلغ اتغيير ولا لا) بيدفع مرة واحده فى العمر......واللى عرفته انك لو حبيت تقفله بعد كدا وتسترد فلوسك عادى...
دلوقتى بعد ما فتحت الحساب بقى عندك عنواين فى حوالى 15 دوله تقدر تشحنلهم ....طبعا من ضمن العنواين دى عنوان فى امريكا والصين.
بس يا سيدى كدا انت جاهز ....حتخش على الموقع وتشترى اللى انت عايزة ولكن حتغيير عنوان الشحن من عنوانك فى مصر الى عنوان الدوله اللى انت عايزه.....يعنى لو بتشترى من امازون مثلا حتغيير العنوان لعنوان Shop & Ship اللى معاك بتاع امريكا.
دلوقتى المنتجات اللى انت اشترتها بتتشحن داخل امريكا ...فغالبا الشحن بيكون مجانى .....ولما توصل مكتب Shop & Ship بيبدأ يبعتها على مصر...وتقدر تتابع مكان الشحنه من ساعه ما توصلهم لحد ما تستلمها.
*ميزتة هذة الطريقه:
1-زى ما قولنا قبل كدا ان مش كل المنتجات بيمكن شحنها علطول لمصر...فبالطريقه دى تقدر تشترى اى منتج من غير ما تتقيد بانه لازم يكون بيتشحن لمصر
2-بيتيح ليك انك تستخدمه مع المواقع اللى بتشحن لدوله واحده بس ....يعنى لو موقع بيشحن لامريكا بس مثلا....ودا بيتيح ليك انك تلاقى افضل عرض سعر للمنتج اللى انت عايزه فى اكتر من موقع
3-احيانه بيكون فيه تخفيض لو اشتريت منتجين مع بعض....طبعا بتقدر تستفيد بالعروض دى
4-احيانا بيكون فى عروض لمده ساعات قليله ....والموضوع زى ما تقول كدا للى يلحق يشترى....بالطريقه دى تقدر تلحق السعر المخفض
5-خدمه سريعه جدا ....يعنى انا طلبت حاجات من Amazon بعدها ب10 ايام لقيته بيكلمنى علشان استلم....فى حين ان الشحن من امازون نفسه خد حوالى 5 ايام.
*عيوب هذه الطريقه:
1-انك بتابع عملية الشراء على جزئين....الجزء الاول لحد ما المنتج يوصل عنوانك بتاع Shop & Ship وبعد كدا بتابع مع موقع Shop & Ship نفسه لحد ما المنتج يوصلك
2-اسعار الشحن والجمارك بتكون عاليه شويه عن بعض الطرق الاخرى.
3- مفيش تجميع شحنات....يعنى لو عندهم اكتر من شحنه ليك بيحسب كل واحده كشحنه مستقله ودا بيفرق معاك فى الوزن والى بدورة بيأثر على سعر الشحن.
-----------------------------------------------------
الطريقه الثالثه: التعامل عن طريق وسيط
وهو انك بتتعامل مع موقع وفى بعض الاوقات اشخاص .....تقوله الحاجه اللى انت عايز تشتريها وهو يمشى الموضوع من الاول للاخر لحد ما يسلمك المنتج.
اشهر مقدمين هذه الخدمه:
ادفعلى https://www.edfa3ly.co/
اشتريلى ESHTEREELY
ديل جامد https://www.dealgamed.com/
وفى صفاحات كتير على الفيس زى Hatoolna & MYUS وفى صفحات لاشخاص تشتريلك اللى انت عايزه
انا عن نفسى استخدمت Edfa3ly ولكن فى الاونه الاخيرة اداؤهم مبقاش قد كدا وفى مشاكل مع خدمه العملاء وتاخر فى الاوردرات.
بردوا لازم اوضح ان الطريقه دى بيكون الاساسى عندها هو التسوق من امريكا بس.....تقريبا ادفعلى ممكن تتسوق من امريكا والامارات.....ولهذا هو بيحصرك فى المواقع الامريكيه بس.
*ميزة هذه الطريقه:
1-بتتعامل مع موقع واحد بس منذ البدايه حتى النهايه....كل اللى عليك انك تختار المنتج وتحط ال URL بتاعه فى الموقع الوسيط وهو يشترى ويشحن ويوصلك لحد البيت كمان.
2-يوجد اله حاسبه داخل المواقع دى بتديك تقريبا المبلغ الاجمالى للاوردر.
3- اسعار الشحن بتكون اقل شويه من Shop & Ship
4-بتقدر تعمل اكتر من Item فى الاوردر الواحد , وممكن كمان من مواقع مختلفه....ودى انا شايفها اهم ميزه فى الطريقه دى , لانها بتفرق جامد فى حساب الوزن واللى بيفرق فى سعر الشحن.
5-طريقه سهله لاى مبتدئ فى مجال التسوق من الخارج .
6- كل وسائل الدفع اللى ذكرنها متاحه لهذه الطريقه....ودا حيوفر عليك عمل فيزا .
*عيوب هذه الطريقه:
1-لو فيه عروض محدده بوقت غالبا مش حتلحقها ....لان المواقع دى بتعمل تقييم للاوردر علشان التكلفه والجمارك ....ودى طبعا بتاخد وقت.
2-طبعا كلهم شركات و مواقع مصريه ....وطبعا خدمة عملاء زفت
3-طول المده من ساعة عمل الاوردر لحين استلامه....حتلاقيه بيقولك 21 يوم ...ولكن الموضوع بيطول عن كدا....يمكن كان زمان بتاخد فعلا 21 يوم بس وممكن اقل ...دلوقتى انت بتتكلم فى شهر مستريح.
4-المفروض انه بيديك ضمان ان لو الحاجه فيها مشكله حيعوضك بفلوسها تانى ....ولكن كله بلح....ولو الشحنه اتاخرت اوى وطلبت فلوسك كتعويض ان المنتج مجاش ....يقعدوا يماطلوا ويسوفوا .
------------------------------------------------------------------------------------------------------------------
****نصائح عامه*****
بس يا سيدى انت كدا جاهز تشترى من بره ولكن فيه بعض المعلومات والنصائح من خلال خبرتى فى الموضوع دا عايز اقولها:
**لازم تعرف ايه المصاريف اللى ممكن تقابلها:
1-تكلفه السلعه: ودا سعر السلعه الاساسى اللى بيكون موجود على الموقع اللى بتشترى منه
2-مصاريف الشحن الداخلى: ودا مصاريف الشحن داخل الولايه, ودى بتظهر معاك فى الطريقه التانيه والتالته للشراء, وفى اغلب الاحوال كانت بتبقى free shipping
3-مصاريف الشحن الدولى: ودى مصاريف الشحن من الدوله اللى اشتريت منها لحد مصر,ودى بتعتمد على الوزن,وتقدر تعرف وزن الحاجه قبل ما تجيبها عن طريق تفاصيل المنتج اللى بتكون مكتوبه على موقع الشراء وبيكون مبين فيه ابعاده ووزن الشحنه, وبتختلف طريقه الحساب من طريقه الى اخرى,
واليكم امثله:
لو بتستخدم Shop & Ship بيحسب اول نص كيلو ب 12 دولار وكل نص كيلو زياده 9 دولار
لو بتستخدم ادفعلى او ديل جامد بيحسب سعر موحد 7.5 او 8 دولار
4-الجمارك والضرائب: ودى المصاريف اللى الدوله بتفرضها على كل منتج داخل البلد, ومفيش حاجه اسمها معفيه , لازم حتدفع, يسموها ضريبه يسموها جمارك, المهم انك حتدفع , والقيمه بتبقى اعتمادا على هيئه المنتج , يعنى مستلزمات الموبايل غير مستلزمات الكمبيوتر غير الملابس ....وهكذا ,كل حاجه ليها تصنيف وكل تصنيف ليه ضريبه او جمرك او كليهما.
ولازم نذكر ان اى منتج بيعتمد على شبكات او بيبث شبكات لازم ياخد موافقه الهيئه المصريه للاتصلات, يعنى موبايل او تابلت او وايرلس راوتر او حتى سماعه بلوتوث , لازم بتعدى عليهم.
5-اتعاب الشركه الوسيطه: ودى حتشوفها بس فى طريقه الشراء الثالثه, وبتكون حوالى 5-6% , وفى بعضهم ليه حد ادنى فى الاتعاب(ادفعلى مثلا 6 دولار حد ادنى)
**لازم تبقى عارف انك بتتعامل بالدولار فى كل تعاملتك, فلازم تبقى عارف سعر الصرف بتاع البنك تقريبا كام علشان تقدر تحدد بالظبط التكلفه بتاعة الطلب, انت بتشحن الفيزا بالمصرى ولكن المواقع بتسحب بالدولار والبنك هو اللى بيحول.
**لو اشتريت من موقع Aliexpress حتلاقى ان فيه شحن مجانى لمصر وبيكون عن طريق البريد , واحيانا بيكون ب2-3 دولار بس , ودى تعتبر ارخص وسيله شحن, بيعيبها طبعا طول المده ممكن توصل ل60 يوم, ولكنها رخيصه.
**دى تجارب ناس كاتبها عن التعامل مع موقع Aliexpress
http://tgrba.com/shopping-experience...xperiment.html
تجربة الشراء من Ali Express | عجلــــــــــــــــــــــ ــة
**نصيحه حاول تعمل كنترول على نفسك فى موضوع الشراء وخصوصا فى الاول, لانك بمجرد ما تدخل الموقع حتلاقى ما لذ وطاب وخصوصا لو من هواة الاليكترونيات والتكنولوجيا زى حلاتى , او من هواة الملابس, حتلاقى نفسك عايز تشترى الموقع كله, فمن البدايه وانت داخل تدور حدد ميزانيتك وحدد انت عايز ايه بالظبط, والا الموضوع حيفلت منك جامد.
**لو لقيت المنتج اللى انت عاوزه متوفر فى السوق المحلى , يبقى مفيش داعى انك تجيبه من بره, حتى لو فى مصر اغلى حاجه بسيطه , يبقى هاتوا من هنا احسن, حاول متستخدمش الشراء من الخارج الا فى الضرورة,لانه مهما كان الموضوع فيه نسبة مجازفه.
**اعمل حسابك دايما انك تراجع المصاريف مع الشركات وخصوصا مع الوسيط , لانه احيانا ممكن يدخلك منتجك فى شريحة جمارك مختلفه فتفرق معاك فى السعرالكلى, ممكن بردوا يكون وازن غلط.
**اعرف الجمارك كويس واحسب المنتج حيقف عليك بكام, ميغركش ان سعره على الموقع رخيص , ممكن تكلفة الشحن والجمارك يخليك تدفع اكتر من تمن السلعه....لازم تحسبها كويس.
**وانت بتدور على منتج اقرا تقييم الناس للمنتج وتقييم الناس للبائع, مهم جدا انك تعرف اراء الناس لانها ممكن تخليك تلغى الفكرة او تدور على منتج بديل....وبردوا فى Reviews على اليوتيوب تقريبا لكل حاجه دى حتساعدك كتير.
**لو بتعامل بالطريقه التانيه والتالته لازم تتاكد من اسعار الخدمه , يعنى تتاكد من سعر الشحن والاتعاب , لانهم ممكن يتغييروا وانت متخدش بالك الا بعد ما تشترى, فكل مرة اتاكد علشان تعمل حسبتك صح.
**وانت بتشترى اتاكد اذا كان المنتج جديد ولا معاد تهيئته Refurbished او مستخدم, لان ممكن السعر يغريك وتلاقيه لقطه بس ميكونش جديد, وبالنسبه لمعاد تهيئته Refurbished دى بتكون منتجات فيها عيوب تصنيع وودوها المصنع صلحوها واعادوها للبيع, يعنى بالبلدى كدا ملعوب فيه, ولكن بيكون حاله جديده عن المستعمل.
**مهم جدا انك تدى تقييم للمنتج بعد ما تشتريه , لان دا حيفيد غيرك , زى ما فادتك اراء الناس قبل ما تشترى.
اسف على الاطاله ,اعتقد بكدا انا غطيت معظم المواضيع او على حسب خبرتى وتجربتى فى الموضوع دا, اتمنى ان الناس تستفيد منه, طبعا اى حد عندوا تجربه او اضافه او معلومه يقدر او يحب يضيفها فهو مرحب بيه, لانى زى ما قولت عايز ان الموضوع يبقى مرجع شامل لكل مقدم على الشراء من الخارج, وانا بردوا اى حاجه جديده او معلومه اعرفها حضيفها لتمام الافادة.
والله الموفق والمستعان.