الموضوع: مشكلتي مع المصرية للإتصالات وإستفسار حول القرية الذكية

المشاركة الأصلية كتبت بواسطة elpilot

بص ياباشا اختصارا لوقتك ومجهودك
وعن تجارب شخصية لاكثر من12 سنة
لدرجة اني نزلت مشكلتي في الجرايد ولدرجة اني اشتكيت لوزير الاتصالات ولرئيس الوزراء وبعت كمان لرئيس الجمهورية
كان عطل شبية بعطلك بالظبط
في الاخر اكتشفت انه شخص واحد في العالم هو اللي يقدر يحللك مشكلته وبمنتهي السهوله
الشخص ده هو "حاتم" المصرية للإتصالات
الشخص ده هو عامل السنترال المسئول عن منطقتك
ده الانسان الوحيد في العالم القادر علي حل مشكلتك
اديله 100 او 200 بصورة وديه واتفرج علي خطك بعد كده
دي خلاصة الموضوع وخلاصة تجارب واعطال وشكاوي كتيره جدا

كنت سعات بنصح الناس بكدة بردو
لكن انا بقى مش هعمل كدة دلوقت .. انا كنت بديهم فلوس على سبيل المراضيه والجو دة
لكن انا اطلع جنيه وانا مش راضي وبعد الضرر وحرقة الدم دي كلها مش هيحصل طبعاً
وإن شاء الله هحل مشكلتي من غير ما ادفع مليم لحد

انا عندي خط تاني ممكن انقل عليه النت وامشي شغلي عادي .. ومعايا فلاشه ومش هعطل
لكن الموضوع بقى بالنسبالي رد أعتبار مع السنترال
ومعنديش اي مشكلة ادفع الف جنيه شهرياً مقابل انترنت مستقر ( لكن بمزاجي )

انا العميل .. وهو الموظف اللي يخاف على وظيفته واكل عيشه والميغه اللي هو فيها
وانا اللي على حق .

في ايه يا استاذنا .. على اخر الزمن هنطاطي لعامل تليفونات !

مش هروح اطلع مع وائل الابراشي علشان في أهمال وتجاهل في اصلاح تليفوني
ربنا ما يحوجنا لحد إن شاء الله .

وعلى فكرة انا روحت لمدير السنترال .. وشوفت المهازل على الواقع

مبدئياً دخلت من الشارع على مكتب المدير بدون ما حد يقولي رايح فين ولا عايز ايه
وكل اوضه تعدي عليها تلاقي شوية ناس قاعدة مرحرحه وعمالين يرغوا .. وبعض الاوض فيها مكاتب وناس قاعدة ومفيش في ايدهم قلم حتى ولا ورقة اودامهم ( هما والمكاتب والكراسي فقط )

وقعدت مع مدير السنترال نص ساعه تقريباً نرغي .. علشان افهم شخصيته
واتضحلي انه راجل مرحرح هو كمان ومش بتاع شغل وبيروح يقضي يومه وخلاص
واتضحلي بردو انه يقدر يخلص اي حاجة ويقدر يعطل اي حاجه .

ماتنخدعش في الناس دي مايخضكش يعني كلمة مدير سنترال ولا رئيس مش عارف ايه
صفات مديرين الحكومة والروتين كالأتي

وشه مبعجر .. جسمه ضخم .. نص كلامه غير مفهوم والنص التاني كدب وخباثه
وفي النهاية انت قاعد قصادك واحد كل كلامه وشغله بلح
هيش على مفيش .

بفضل الله تم حل المشكلة

المشاركة الأصلية كتبت بواسطة 7oda

ياريت تقولنا ازاى

كل ما سبق بالإضافة الى " يوم الحسم "
ذهبت الى سنترال رمسيس واتكلمت مع موظفة خدمة العملاء
طبعاً علشان انا بقالي شهرين بشتكي وتوجهت بالشكوى لعدة جهات .. ومهتم جداً بإصلاح العطل
فبالتالي لقيت إهتمام أنها تسمعلي وتساعدني

واللي عزز موقفي أكتر .. انهم في السنترال قبلها بيوم بعتوا الفني وقالي ظبتلك الخط
واتفاجئت ان الخط متبدل عندي مع خط مشترك اخر .. ودي كانت غلطة منهم في صالحي وخدمتني اوي .. وكانت حجة قوية ليه ان في إهمال جسيم في السنترال .

الموظفة اتصلت بمدير السنترال وانا واقف وعملتله ( شبورة ) وقالتله التليفون يشتغل النهاردة يعني النهاردة ومش هقفل الشكوى عندي الا لما اتابع مع العميل واتأكد انه اشتغل .

واديتني رقمها ومشيت

طلعت على سنترال الدقي ( مكتب رئيس المنطقة )
قابلتني السكرتيرة اللي كنت ديما اتصل وترد هي عليه وعرفتني وحفظت اسمي ومشكلتي من كتر التليفونات

اتصلت بمدير السنترال وانا موجود وعملتله بردو ( شبوره )
وادتهولي كلمته في التليفون .. وقعدت يقول كلام الهدف منه يهديني ويحسسني انه مهتم .. ويقولي كنت عايز نشرب الشاي مع بعض وانت عندي
لكن انت ماصبرتش ومادتنيش فرصه وانت راجل محترم وجيتلي المكتب واتكلمت معايا بإحترام وانا قدرتك .. الخ الخ
لأنه اترعب لما لقاني في مكتب رئيس المنطقه .. وممكن ادخل للرئيس واكلمه مباشرة لو طلبت
واتبرجل اكتر لما عرف ان الخط متبدل مع مشترك اخر من امبارح .

وقالي خلال ساعة هيكون تليفونك شغال ومتظبط وخود تليفوني الشخصي وتابع معايا لو ماشتغلش

كنت ناوي اطلع ادارة جهاز تنظيم الاتصالات في مدينة نصر .. وكنت ناوي اطلع عالقرية الذكية
لكن الوقت ماسعدنيش

وانا راجع عالبيت .. لقيت العامل بيتصل بيه وبيكلمني بكل هدوء وبيقولي التليفون بقى تمام
لما ترجع هتلاقيه شغال .

رجعت البيت لقيت التليفون مش شغال ! فاصل حرارة خالص

اتصلت بمدير السنترال على الموبايل اللي اخدته بتاعه
بعدها بعشر دقايق لقيت الفني بيكلمني والتليفون اشتغل والزنة راحت وكله بقى تمام

لكن ما زال النت سعات بيفصل وبدأت اشك ان سببها مشاكل في اجهزة النت في السنترال
لأن خط التليفون بقى تمام اوي ومفهوش اي وش ولا اي حاجة

ودي بقى هتبقى جولة تانيه مع شركة النت إن شاء الله

وطبعاً مش هسكت على فترة العطل اللي مرت وهطلب تعويضها في الفاتورة القادمة .


الخلاصة :
مع الاسف قطاع الإتصالات بالكامل في مصر ضاايع .. وحله مش محتاج فلوس ولا خطة قومية ولا اي بتنجان من دة

حله انه محتاج اداره قوية بتاعة شغل .. تعرف ازاي تدير الوزارة وتجبر الناس تشتغل
لكن الوضع الحالي اقدر اقول 95% من موظفين شركة TE Data والمصرية للاتصالات
ملهمش اي تلاتين لازمة .. و وجودهم زي عدمه
وكل خدمات الشكاوي عن طريق 111 وغيره .. اهدار للمال والوقت .