لا مؤاخذة

**OlaOsman** · 26-11-2008 08:18 AM

النهاردة كنا بنركن العربية عند الشغل انا و أخويا، واحد بيركن ورانا، احنا كنا خلاص ركنا عربيتنا، و هو بيركن بأه قام حك في عربيتنا حكة غبية

واحنا واقفين سمعنا صوت الحكة اللي هي تكاد يعني تكون خبطة و أثر الحكة باين جدا و مبوظ شكلها فما كان منه إلا انه رفع إيده و قال لا مؤاخذة.. و كمل ركن عادي.. و خلاص على كده.

مش عارفة.. انا شايفة ان الموضوع يستاهل اكتر من لا مؤاخذة.. و لا انتوا ايه رأيكوا؟ :k41:

**Terrible_DaRsH** · 26-11-2008 08:23 AM

هههههههههه انتوا كنتوا بتركنوا عجلة !!!
المفروض كان نزل على الاقل واعتذر ويشوف انتوا عايزين ايه لانه هو اللى غلطان !!
لكن على العموم احمدوا ربنا انه قال لا مؤاخده فى غيره مبيهتمش اساسا !!

**alaa_dash** · 26-11-2008 08:29 AM

نفس الموضوع حصل معايا انا ووالدي ..كانت العربية لسه زيرو مافيها غلطة كانت افنسيس ايجار

بس الراجل نزل و اعتذر و اللي تأمروا بيه ...الخ..

بس طبعا يستاهل اكتر من لامؤاخذة ! خصوصا لو كانت السيريون :)

**youssefmustang** · 26-11-2008 08:34 AM

قال لامؤاخذة قال ده على الاقل اطلع الكوريك واروح على ازاز عربيته ادغدغ امه وعادى جدا واقوله لامؤاخذة .......... حاجة تحرق الدم على الاخر
ده بقى شعب مستفز على الاخر واحد يخبط عربيتك ويطلعك غلطان وواحد يقولك انت ما بتعرفش تركن وواحد يقولك انت ما بتعرفش تسوق اساس ... والله الحكومة دى ليها الجنة على اللى بتعمله مع الشعب وفى الاخر نقول ان الحكومة هى السبب..
اخوكم يوسف

**emadkamel** · 26-11-2008 08:43 AM

انا رأيى انه راجل "لا مؤاخذة" عايش فى زمن "لا مؤاخذة" وصلت فيه الاخلاق لمستويات "لا مؤاخذة" وبالتالى بيتصرف تصرفات "لا مؤاخذة"

ربنا يرحمنا من السواقة فى مصر الـ "لا مؤاخذة"

**Hacker5** · 26-11-2008 08:48 AM

هههههههه
حلوة لامؤاخذة دى انا مش عارف انتوا سكتوا ليه؟ :)
انا لو مكانك كنت رحت حكيتلو عربيتو برضو و اقوله لامؤخذة
لامؤخذة انا بقى عشان نازل :)

**human** · 26-11-2008 08:54 AM

ده كده حلو اوى
كويس ان خد باله و قال لا مؤاخذه الراجل ده كويس
فيه ناس تانيه كانت نزلت و لبستكوا انتوا الموضوع و ممكن تلاقى واحد يقولك و مالها يعنى نستحمل بعض ( و احد قاللى كده قبل كده)

**human** · 26-11-2008 08:55 AM

المشاركة الأصلية كتبت بواسطة emadkamel

انا رأيى انه راجل "لا مؤاخذة" عايش فى زمن "لا مؤاخذة" وصلت فيه الاخلاق لمستويات "لا مؤاخذة" وبالتالى بيتصرف تصرفات "لا مؤاخذة"

ربنا يرحمنا من السواقة فى مصر الـ "لا مؤاخذة"

بس هى لا مؤاخذه بقت ليه لامؤاخذه؟

**enas75** · 26-11-2008 09:00 AM

الحمد لله ان علي الاقل قال لا مؤاخذة اناالنهاردة وانا نازلة لقيت واحد حكللي العربية ومشي ولاقال حاجة ولا كأنة خبط حاجة اصلا

**م.احمد زكريا** · 26-11-2008 09:00 AM

إلا انه رفع إيده و قال لا مؤاخذة.. و كمل ركن عادي.. و خلاص على كده.

وخلاص على كدة إزاي يعني

طيب انتي سكتي ليه؟

لازم على الاقل يعرف غلطته ويتأنب شوية وبعدين ممكن تسامحيه أو تأخدي حقك.