ازاى نعرف ان العربية محتاجة تظبيط عفشة او تغيير عفشة

السلام عليكم و رحمة الله و بركاته
اود ان اطرح الموضوع الاتى للنقاش وذلك للافادة العامة انا معى عربية بيجو 104 موديل 1978 باسمع صوت قدام و انا ماشى على سرعة 100 كم و الركسيون يهتز فى ايدى جامد و بعد شوية الصوت و الهزة تنتهى وبعد شوية ترجع تانى و بعدين تروح و بعدين ترجع ........... ولما اخفف السرعة شوية تروح خالص على فكرة النهاردة حصلت معى على سرعة 60كم ولما روحت للميكانيكى قاللى محتاج تغير العفشة اللى قدام كلها وكمان تجيب ركبتين قدام بصراحة انا مش باعرف فى الميكانيكة قوى علشان كده حاسس ان الميكانيكى بيشتغلنى ارجو من اخوانى الافاضل النصيحة و كمان لو ممكن ميكانيكى كويس للنوع ده من العربيات ( على فكرة ان عندى الفتيس جوه الموتوريعنى معنديش زيت للفتيس منفصل ) :roll: :roll: :evil: :cry: :cry: :shock:

الموضوع محتاج عفشجى مش ميكانيكى

ياريت فعلا يا جماعه تقولولنا عالاعراض اللي في العربية عشان يبان اننا محتاجين نغير عفشة ولا لأ ؟؟؟

او حتى العربية امتى تكون محتاجه عفشتها تتربط

العفشه مالهاش مواعيد علشان تبو او تحتاج تتربط بتختلف علي حسب حاله الطريق اللي بتمشي فيه سواء طريق كويس او مكسر و علي حسب اسلوب السواقه يعني بتجري و بتاكل مطبات ولا بتحاف و بتهدي عند الحفر و المطبات ....
لو كنت من النوع اللي مش محاف او بتمششي بسرعه في طرق غير ممهده يبقي حتحتاج تربط عفشه مره كل شهرين ولا حاجه ولو من النوع المحافظ يبقي ممكن كل سنه علي ما تروح تربطا دا لو ما طلعش منها حاجه في خلال السنه و روحت للعفشجي و لو من النوع المحاف و بتحب عربيتك دايما سليمه و شكاك يبقي كل 6 شهور تروح تكشف عليها زي ما انا بعمل بس انا مش بربط بس لا انا بفك العفشه كلها علي الارض و اغسلها و اشحمها و اركبها من جديد ولو اي حاجه بايظه او بتشاور عقلها بغيرها فورا و بكده مش بصرف عليها كتير.
طب الاعراض ايه و ايه اللي يعرفك ان عفشتك مش ولا بد و لازم تروح للعفشجي.....
1.تسمع اصوات شخشخه في العربيه من تحت و تحس ان الدركسيون سايب في ايدك.
2.العربيه بتعوم و مش مبوطه علي الطريق.
3.بتلاقي العربيه بتحدف و انت الكاوتش بتاعك مقاسه مضبوط يبقي كده العربيه خلفت زوايا .طب ايه اللي يخليها تخلف ؟؟ ممكن مقص اتعوج و خبط في رصيف و انت بتركن ف قبل ما تروح تظبط زوايا تروح عند بتاع العفشه تطمن الاول و تخليه ياخد لقطه بالمقاس البلدي اللي عنده و بعد كده تبط زوراياك.
4.صوت ونه في العجل(وووووو) و كل ما تزود السرعه الصوت يزيد ولما تمور العربيه و تسيبها تمشي تسمع الونه دي اوي دا بيبقي من بلي العجل و لازم يتغير و يتشحم بدل ما البليه تفرط منك و ساعتها مش حتعرف تتحرك...
دا اللي انا فاكره حاليا لو افتكرت حاجه تانيه حكتبها...


بالنسبه لسؤالك يا اخ اكسبورت ممكن اللي بيحصل عندك دا بسبب ان الكاوتش مش حلو .لو انت مركب كاوتش سلك و خبط في رصيف ولا حاجه الفرده ممكن تتعوج و تعمل اللي انت بتقول عليه دا بالضبط.
حاجه تانيه يا تري انت بتحس بالدردره دي في الدركسيون بس ولا في العربيه كلها يعني لو انت بتزود السرعه بتحس بيها بتروح و تيجي و ترعش العربيه كلها ولا الدركسيون بس.
لو الدركسيون بس يبقي كاوتش يا اما عفشه و في الحاله دي تروح للعفشجي يشوف بلي المقصات و يظبط العربيه كلها و اكيد ان شاء الله حترجع لوضعها.
لو العربيه كلها بترعش يبقي دا ممكن يكون عيب في ديسك الدبرياج او كهربه العربيه.

احسن حل انك تروح لعفشجى بس يكون امين علشان ما يفتحش عليك فتحة كبيرة لان اللى بتقوله ده ممكن يكون ليه اكثر من سبب ولا يمكن الحكم بالكلام والوصف فقط لابد من تجربة السيارة والكشف عليها

شكر يا حازم باشا عالمعلومات القيمة دي

بجد انا كمان عربيتي كنت خدت بيها مطب جامد ومن بعدها بحس انها مش متظبطة ولما بوصل لـ 100 بالاقي الدريكسيون مش ثابت في ايديا واتقالي اروح لواحد ظبط زوايا وكدة بس المشكلة اني عايز اولا حد يكون امين ويشتغل بضمير ثانيا يكون بيفهم كويس ويقولي العربية محتاجه اية بالظبط عشان هيا شوية تحدف مني يمين وشوية تحدف شمال لما بشد بيها... وانت عارف الناس اللي بتراعي ربنا دول نادرين واللي يراعي ربنا وهو عارف ان اللي قدامة مش فاهم دة اكثر ندرة... ربنا يكرمني بحد كويس يااااارب

http://www.nilemotors.net/Forum/viewtopic.php?t=766

اشكر جميع اخوانى على ما قدموه من تعاون كامل يوكد مصدقية المنتدى الذى اتشرف بكونى احد الاعضاء فيه - والظاهر كده انى فعلا محتاج اروح لعفشجى و نبقى نشوف باذن الله العيب فين بالظبط و اشكركم جميعا

روح لعفشجي كويس وصلح العفشة
وبعدين روح اظبط زوايا ورصص الأربع عجلات ووقت الترصيص بص على الكوتش يمكن محتاج تغيير