الموضوع: استفسارعن استهلاك البنزين لجيب شيروكى xj موديل 1998 ؟؟

المشاركة الأصلية كتبت بواسطة Mohamed Desoky

السلام عليكم ورحمة الله وبركاته كل احترامى لجميع ملاك الجيب انا اعمل فى مجال المساحه وكل شغلى فى الجبل ومدقات ومفيش عربيه تستحمل الشقى ده غير الجيب والكومودو الصينى وانا المسئول عن السيارتين فى المكتب الاستيشارى وهقول رايى بكل صدق عربيات الدفع الرباعى كلها جيده للطرق الوعره والرمليه والغيرممهده اما على الطرق العاديه استهلاك البنزين بيعلى لاننا عايزين نجرى ومعتقدين ان الجيب هطير وبننسى ان العربيه دفع رباعى متكتفه بكردان امامى واخرخلفى بيشتغله فى دوران واحد حتى لو الغرز مش شغال برضه العربيه متكتفه الحل من خلال تجربتى سنين مع الجيب وقطع غيارها الغاليه جدا ان كردان الغرز الامامى يتفك وتشيله من العربيه كده الجيب بقت عربية مدن واستهلاك البنزين هيقل شويه وخلى بالك انتى راكب عربيه وزن ثقيل وموتور اكتر 4000 cc و 6سلندر و كل ده اكيد انتى عارف من زمان ان الامريكى مستهلك للبنزين والكل يعلم ان السيارات الامريكيه ملهاش سوق مصر زى البويك والشفر والدودج دول عربيات ركوب عاديه للمدن وعربيات قويه جدا لكن احنا المصريين عندنا فهلوه الجيب مخصصه للجبل والسفارى واحنا بنشغلها عربية مدن وده مش مكانها فى العمل المصنعه له للجيوش و فى الاماكن الجبليه والرمليه فقط لكن الطرق العاديه استهلاك البنزين بيزيد وبص على دول الخليج البنزين ببلاش عندهم عربيات الدفع الرباعى للصحراء والتخييم وعربيات المدن اغلبه يابانى علشان تكييف افضل من الامريكى ونعومه افضل على الطرق اسف طولت بس حبيت اقول بحكم خبرتى مع الجيب ان العربيه فى الجبل استهلاكها افضل من الطرق العاديه وشكرا

حضرتك معظم العربيات الفور باى فور دلوقتى دفع خلفى ولما بتحتاج انها تبقى دفع رباعى بتحولها عن طريق فتيس الغرز اللى فيه وضعين وضع هاى ووضع لو - ولو انا ماشى على الاسفلت عادى والطريق مزحلق نتيجة امطار او تراب بتحتاج الدفع الرباعى الهاى علشان يحسن تماسك واتزان العربية - فلو شيلت الكردان الامامى بتلغى الميزة دى وكمان مابتوفرش فى استهلاك البنزين - بالنسبة لقطع الغيار للجيب بالذات انا مش شايف فيها حاجة غالية جدا يعنى قطع الغيار الاستهلاكية اسعارها ارخص من العربيات السيدان الجديدة دلوقتى وعلى سبيل المثال المراية بتاعة الجانب فى الشيروكى ال kk فى حدود ال ٤٥٠ - ٥٠٠ جنيه والفانوس الامامى فى حدود ال ٧٠٠ جنيه لو قارنت الاسعار دى مثلا بالقاشقاى ومايماثلها زى الكيا او الهيونداى حتحط صفر كمان جنب الاسعار اللى انا ذكرتها - بالنسبة مثلا للمساعدين حتلاقيهم الطقم الامامى فى حدود ال ١٠٠٠ جنيه - وكمان قطع غيارها اصلا معمرة - البربريز الامامى مثلا فى الجيب مش بيعدى ال ٥٠٠ جنيه .
واستهلاك البنزين اللى فى الصحرا اقل من الاسفلت ده انا مش معاك فيه لانك بتبقى ماشى بسرعة مش عالية يعنى على التانى مثلا وده بيبقى الار بى ام عالى واستهلاك البنزين بيكون اعلى بكتير من الاسفلت علاوة على انك لو كنت ماشى كمان دفع رباعى وده كمان بيزود الاستهلاك بتاع البنزين - ركوب العربيات الدفع الرباعى داخل المدن ليه ميزة كبيرة فى مصر بالذات وهى المطبات والطرق البايظة فانت بتوفر عفشة وجاكمان وخبطات كل ده ليه تمنه وكمان لو اتزنقت بتقدر تتصرف .
الخلاصة لو انت راكب عربية دفع رباعى والدنيا مظبوطة فيها استهلاكها فى الاجمالى حايكون فى حدود مرة ونص او ١،٧ من استهلاك السيدان .
انا باكلمك بمنتهى الحيادية مش علشان انا راكب جيب لان شركة كرايزلر مش محتاجانى اعمل ليها دعاية :) - يكفى مثلا ان الجيب لو دخلت على النت حتلاقى عنها معلومات بالهبل فى الصيانات وقطع الغيار والمواقع اللى بتبيع قطع الغيار وارقام البارت نمبر والاعطال وطرق اصلاحها ودى فى العربيات التانية بتبقى عاملة زى الاسرار الحربية مش بتقدر تلاقيها بسهولة - وتقبل تحياتى واحترامى