مساعدة في شراء الأكسيل

**Mostafa Treka** · 25-02-2016 12:51 PM

أنا عايز أشتري عربية أكسيل ودي أول مرة أشتري عربية
وأول مرة أسوق عربية أساساً
عايز أعرف إيه المميزات والعيوب بتاعتها
في ناس بيحذروني من الموتور بتاعها لأنه مش موجود وهي خفيفة على الطريق أنا قلقت بصراحة لما قالولي الكلام ده

ولو وحشة إيه البديل بتاعها بس متوسط السعر 29 ألف

أرجو المساعدة وشكراً ليكم

**ahmed.biso13** · 25-02-2016 09:12 PM

خد ميكانيكى وسمكرى معاك يبصوا على العربية قبل ماتدفع جنيه
واذا قالولك كويسة يبقى توكل على الله
واشترى عربية تكون بيتى وشبعانة مصاريف حتى لو كانت غالية 2000 او3000ولا تشترى سيارة جعانة من المعارض احسن ماتصرف عليها 10000 وتخسر فيها وساعتها يقولك المشترى ده استهلاك
وعلى فكرة اى عربية فى الدنيا اهم حاجة فيها قطع الغيار متوفرة وعلى قد الايد
واى صنياعى يشتغل فيها
واهم حاجة تحافظ على العربية وتمش على قدك وابعد عن السر عة الجنونية عشان ربنا يسترها معاك
وربنا يوفقك

**tasaka** · 25-02-2016 10:56 PM

ممتازه .. و موش حتلاقى حاجه احسن منها فى سعرها ده

قطع الغيار ببلاش .. و بدل النوع حتلاقى 10 انواع حسب امكانياتك

اشترى ال 1500 الكامله .. و احسن موديلاتها ال 95 و 96 اول انتاجها فى مصر

الكاوتش المصرى اللى كانت بتنزل بيه زيرو كان بيخليها تعوم جامد و تنط فى المطبات .. لدرجه انى كنت عايز ابيعها فى اول اسبوع

اشتريتها زيرو سنه 1995 و غيرت كاوتش ميشلان .. و العربيه اصبحت ناعمه جدا فى المطبات و ايضا الثبات اصبح جيد جدا

صيانات توكيل حتى انتهاء الضمان .. انا عملت بالعربيه دى 190 الف كيلو بدون تغيير اى شيئ جوهرى خلال 12 او 13 سنه .. فقط صيانات دوريه بوجيهات و زيت و تيل .. بس غيرت رادياتير مره واحده فقط بعد 130 الف كيلو ( علشان احيانا كنت باحط ميه حنفيه ) .. جيربوكس ( بعض الصيانات الخفيفه بعد ال 120 الف كم ) .. غيرت مساعدين امامى بعد 6 سنوات و العفشجى قال لى القدام كويسين خليهم معاك

على الطوالى 315 كم فى الصفيحه .. جوه البلد 180 او 200 كم فى الصفيحه .. بنزين 92

بعد ال 190 الف بعتها و كل الاشياء الاساسيه سليمه و تعمل بكفاءه .. باور .. تكييف ( باشغله بصفه شبه مستمره ) .. موتور .. جيربوكس .. مارش .. دينامو .. لم تحدث بها اى اعطال كهرباء نهائيا ( بس فقط ركبت كتاوت نور .. و الضفيره قابريكه لم المسها )

الحاجه الوحيده اللى شفتها فى العربيه دى لما كنت عايز اشترى واحده لاختى بعد كده .. ركبه المساعد اليمين من داخل الموتور وجدت عربيات كتير فيها شرخ فى المكان ده ( انا عربيتى مفيهاش فيها الشرخ ده ) و محدش بيعتبره عيب من التجار !! ؟؟ .. اعتقد ده حصل فى العربيات دى بسبب الكاوتش او الله اعلم ايه السبب

عربيه حلوه لو سليمه .. و اوعى تأخذ عربيه واقعه ابدا و تشدها لانك حتتعب و حتندم برضه .. و خليك فى الكامله ال 1500 cc

في ناس بيحذروني من الموتور بتاعها لأنه مش موجود

ماعنديش فكره عن تواجد قطع غيارها دلوقتى لانى بعتها من فتره طويله .. بس اعتقد اللى بيكلمك الكلام ده معندوش فكره خالص .. العربيه دى تقدر تعتبرها زى الفيات ايام زمان .. يعنى قطع غيار فى كل حته .. و حتى اسعار التوكيل فرقها ما كانشى جامد عن بره وقت ما كانت معى

بالتوفيق