محتاج مشورة ضروري في عرض سفر للأمارات

**hazemhany** · 05-05-2016 11:55 AM

المشاركة الأصلية كتبت بواسطة عبدالحكيم

أخي الكريم

قرأت موضوعك الآن فقط من أوله إلى آخره.. ورأيي هو: لا تترك مصر بعد الفرصة النادرة التي جاءت لك في شركتك الآن.. لا تفرط فيها أبداً ولا تخرج من مصر إلا للسياحة أو التدريب..

وها هي مسببات رأيي:

أولاً: أنت الآن في طريقك لتثبيت قدميك في أكبر شركة في مجالها في مصر وحصلت على ترقية وزيادة 100% في الراتب.. 11 ألف جنيه شهري لشاب عازب عنده 4 سنوات خبرة فقط يعد إنجازاً بالنسبة لك ودليل على تمسك شركتك بك.. اصبر واجتهد في عملك وبإذن الله ستتقلد مناصب أعلى قريباً وراتبك يرتفع اضعافاً مضاعفة..

ثانياً: مصر الآن دخلت في مشاريع هندسية وإنشائية كبيرة والطلب على المهندسين ذوي الخبرة لا يتوقف.. حتى أن أحد أصدقائي وهو صعيدي ومهندس متخرج حديثاً من فرانكفورت ألمانيا ويعمل هناك يعتزم النزول إلى مصر والالتحاق بإحدى الشركات الألمانية أو العالمية التي تدفع أجور مجزية

ثالثاً: تأشيرات العمل للمصريين شبه متوقفة في الإمارات السبعة باستثناء دبي، وصدور تأشيرة الدخول إلى الشارقة لا يعني صدور تأشيرة العمل عند وصولك للشركة وإجراء الكشوفات الطبية.. رفض منحك تأشيرة العمل بعد وصولك ممكن بل وحدث مع عدد غير قليل...

رابعاً: إمكانية النقل إلى عمل جديد أصبحت غاية في الصعوبة الآن في الإمارات بسبب الرفض الأمني وبسبب انخفاض حجم أعمال الشركات نتيجة لانخفاض أسعار البترول... شركة أرابتك مثلاً سرحت الآلاف الشهور الماضية، منهم أشخاص أعرفهم معرفة شخصية..

ابق في بلدك وسط أهلك وخلِّانك، واستغل تمسك شركتك بك وحرصها على بقاءك، وابني نجاحاً فوق نجاح وبإذن الله سيتحقق لك ما تتمنى وزيادة

شكرا لرد حضرتك الشافي والوافي ولتمنياتك الصادقة ...

**just4cadbury** · 05-05-2016 03:00 PM

نصيحة خليك في مصر المرتب زاد وبقي مناسب جدا للمعيشة في مصر شركتك اتمسكت بيك وقدرتك وده يدل انك ممتاز في شغلك والشركة مش روتينية في الزيادات و ولائها للموظفين محترم بدليل الكيس الي حصلت معاك
طبيعة شغلك هتتغير والتاسكات هتختلف عشان طبعا زيادة المرتب
كفاية انك في بلدك وسط اهلك.... وده ميغيرش فكرك لو جه اووفر احسن برة مصر اتمسك بيه
وخلي بالك دايما بتطلع لقدام المرة الجاية هتلاقي اووفر بسالري اكبر
بالتوفيق ياهندسة

**عﻻء سالمان** · 06-05-2016 07:41 PM

الخطوات والتحركات المصيرية بتتم فى سرية تامة..انت غلط لما كشفت فى شغلك عن سعيك وتحركاتك.. انت كدة لو خدت اجازة طويلة وسافرت .. قطعت على نفسك خط الرجعة لو أمورك مظبطش..ال 11 الف الى هما عارضينهم عليك مبلغ مش وحش.. العمل هنا انت عارف دواخلة لكن برة انت وحظك.. استخير ربك وشوف حالك.. واهى بﻻدنا بدأت تنهض واقتصادها بدأ ينتعش والشركات الكبرى بتنمو والى جاى اجمل..

**TAMERMEGAHED** · 07-05-2016 11:25 AM

اخى الكريم نصيحه من متغرب وأول ماقريت موضوعك كنت هقولك سافر وش لانه خبره السفر نفسها مفيده لتفتيح الافاق للتعامل مع كل الجنسيات وهتختلف وجهه نظرك لكل حاجه وخصوصا انك عازب ولكن بعد موضوع زياده راتبك اعتقد الموضع يختلف نظرا لان رغم المميزات للغربه فلها مساؤى عده تكاد تغطى على المميزات فرائى من اخ خليك في البلد لان أصلا الخليج الفتره ده يعانى التقشف في اقتصادياته وده بتاثر على الجميع وبالتوفيق ان شاء الله

**hazemhany** · 16-05-2016 12:10 PM

يا جماعة الواحد في حيرة بصراحة وتردد لا يحسد عليه ...وده بناءا ع كذا حاجة
1- الوضع بالنسبالي في شركتي بقي ممتاز ماديا ومعنويا
2- الوضع في مصر زفت وغلاء اسعار ببشاعة ومش عارفين احنا رايحين لفين ولا هترسي علي ايه..يعني ضبابية ع الاخر
3- المرتب في الامارات مش مغري
4-وضع الامارات كدولة ممتاز وعايش في ليفيل اوروبي بنكهة عربية

بدعي ربنا يلهمني الصواب وبدعي علي اللي خلوا بلدنا بالشكل ده ...منهم لله

**amr011111** · 16-05-2016 02:39 PM

المشاركة الأصلية كتبت بواسطة hazemhany

يا جماعة الواحد في حيرة بصراحة وتردد لا يحسد عليه ...وده بناءا ع كذا حاجة
1- الوضع بالنسبالي في شركتي بقي ممتاز ماديا ومعنويا
2- الوضع في مصر زفت وغلاء اسعار ببشاعة ومش عارفين احنا رايحين لفين ولا هترسي علي ايه..يعني ضبابية ع الاخر
3- المرتب في الامارات مش مغري
4-وضع الامارات كدولة ممتاز وعايش في ليفيل اوروبي بنكهة عربية

بدعي ربنا يلهمني الصواب وبدعي علي اللي خلوا بلدنا بالشكل ده ...منهم لله

الوضع مش محتاج اختيار. خليك فى مصر لان المرتب اللى هتخده هنا هيبقى اعلى من اللى هتخده هناك

**hany121** · 16-05-2016 04:18 PM

المشاركة الأصلية كتبت بواسطة hazemhany

يا جماعة الواحد في حيرة بصراحة وتردد لا يحسد عليه ...وده بناءا ع كذا حاجة
1- الوضع بالنسبالي في شركتي بقي ممتاز ماديا ومعنويا
2- الوضع في مصر زفت وغلاء اسعار ببشاعة ومش عارفين احنا رايحين لفين ولا هترسي علي ايه..يعني ضبابية ع الاخر
3- المرتب في الامارات مش مغري
4-وضع الامارات كدولة ممتاز وعايش في ليفيل اوروبي بنكهة عربية

بدعي ربنا يلهمني الصواب وبدعي علي اللي خلوا بلدنا بالشكل ده ...منهم لله

لو ال "ليفيل الاوروبي" مزغلل عنيك سافر بس ما ترجعش تندم... واضح انك عايز كل حاجه وده صعب لحد في سنك وسنين خبرتك.. الغلاء اللي انت بتشتكي منه في مصر ما يشتكيش منه حد في مستوي دخلك الحالي وغير متزوج وما يتقارنش ب الغلاء في الامارات...

بالتوفيق

**arabian-eagle** · 16-05-2016 06:01 PM

انا خليجي وقريت موضوعك بالكامل. واعرف كثير مصريين في بلدي وفي الإمارات. وبقول لك لا تسافر بناء على هذه المعطيات.

**eslamrace** · 16-05-2016 08:22 PM

حضرتك الموضوع محسوم بنسبه كبيره بعد زيادة المرتب الاخيره حضرتك في مصر معاك وظيفة جيده جداً بدخل اصبح محترم وسط اهلك يبقي السفر ملهوش لازمه خاصه وان شكوتك بتتلخص في غلاء المعيشه في مصر وده مش سبب انك تسيب مصر بل بالعكس حضرتك مهما عيشتك حتغلى في مصر فَهى أكيد أرخص من الإمارات حضرتك ممكن تسأل اى حد مسافر الإمارات عن متوسط أسعار المعيشه حتكتشف انك في مصر الأسعار لا تقارن بالامارات

اما عن احوال البلد فأحب أقول لحضرتك ان مرتب حضرتك يسمحلك تعيش في مستوى أفضل من ناس كتير في الإمارات فعلي الأقل حضرتك كنت حتأجر شقه في الإمارات وممكن تكون شيرينج انت في مصر لو اجرت شقه في القاهره الجديده في حدود ٣٠٠٠ جنيه حتلاقي انك عايش في مكان أفضل من إللى حتكون فيه داخل الإمارات
وخد بالك انك في مصر عندك ميزه انك في بلد عايش فيها كل المستويات من اول المليارديرات الي اغلب خلق الله وكلهم بيقدروا يعيشوا ويستمتعوا لان في مصر تقدر تفطر ب ٥ جنيه وتقدر تفطر ب٥٠٠ جنيه غير الإمارات البلد غاليه علي الناس كلها وللعلم ان مصر فيها أماكن حضرتك لو دخلتها حتحس انك في أوروبا مش في بلد عربي بس كله بتمنه

النهايه انا مش بقنعك تفضل في مصر بس انت حتتغرب وتواجه مجهول وانت في غنى عنه لأنك في مصر بقيت شغال في مكان كويس بمرتب جيد يسمحلك تعيش في مكان محترم وبفلوسك حتقدر تيسر علي نفسك حاجات كتير في هيكل الفساد المصري تقدر تتفسح في أماكن داخل مصر في مستوى منتجعات بره وتقدر برضه تاخد خبرات السفر بأنك تسافر سياحه في بلاد كتير طالما انك اعزب ومرتبك ليك بس وحتقدر تحوش مبلغ كويس كمان وكل ده وانت معاك اهم حاجه اهلك وأصحابك
الحاجه الوحيدة اللي شايفها ميزه في الإمارات هى النظام انك بتكون عارف كل حاجه بتتعمل ازاى وخطواتها ايه وعواقبها ايه علي عكس مصر فلا انت عارف اى حاجه بتتعمل ازاى ولا عارف عواقبها ايه فأنت ممكن تتحبس علشان مخالفه مرور وممكن تسرق بنك وتاخد براءه بس المهم انك في مصر لو عرفت من أين تؤكل الكتف حتعيش سعيد باقي عمرك إنما في الإمارات مش محتاج تكون مفتح علشان تعيش سعيد
وخللي بالك ان النفوس المريضه موجودة في كل مكان زى محتلاقيهم في مصر حتلاقيهم في الإمارات

اخيراً زى مقولتلك انا مش بحاول أقنعك بان مكانك في مصر أحسن بس انا مقتنع ان اللي بيتغرب يتغرب علشان مش مقدر مادياً في مصر او انه حيسافر ومش حيرجع حتى لو اضطر انه ينام علي الرصيف بره لانه نفسياً انتهت علاقته بالبلد غير كده طالما مستواك المعادى كويس في مصر يبقي اعرف بلدنا بيتعاش فيها ازاي وعيش حتبقي مبسوط واعتبر انك زي مفي في الإمارات ممنوعات اعتبر في مصر في ممنوعات بس مختلفه شويه ورى محتيجى علي نفسك في حاجات جوه الإمارات تعالي علي نفسك في حاجات جوه مصر ومتضحيش بوجودك جنب اهلك
وزن مانت قلقان من تدهور الأوضاع في مصر أحب أبشّرك ان مبقاش في مكان آمن في العالم دلوقتي لا الخليج ولا غيره كله محاصر بالأزمات الاقتصاديه والسياسيه وربنا يستر

تحياتى ليك وآسف للإطالة وأتمنى ربنا يوفقك للأصلح ليك

**hazemhany** · 16-05-2016 09:00 PM

شكرا لاخواتي الذين لا يبخلون بالنصيحة ...تم بحمد الله حسم الموضوع...واختمه بالبيت الشعري

"وطني لو شُغِلتُ بالخُلدِ عنّه * * * نازعتني إليه في الخُلدِ نَفسي"