شركات كريم و اوبر و فرصة عمل جديدة للشباب

شركتى اوبر و كريم آخذة فى الانتشار و لاسيما ان توفيق اوضاعهما القانونية اصبحت وشيكة تماما , انا لى صديق باع سيارته و اشترى سيارة زيرو و اشترك فى شركة كريم و هى شركة اماراتية ( هو مهندس) و قال لى بعد التعاقد مع الشركة تقريبا مبيدفعش قسط العربية اقصد المكسب من اشتراكه فى شركة كريم بقى بيغطى نفقات السيارة و القسط , انما طبعا مبتكلمش عن نفسى( بحكم سنى) انما يبدوا الموضوع كويس للشباب و اللى عايز يجيب عربية جديدة لاسيما ان الشركة بتشترط عربيات حديثة , اكيد ده حيسبب بعض المشاكل للتاكسى الابيض بس التنافس هيكون لصالح المستهلك فى النهاية .... يا ريت اللى عنده تجربة عن اوبر او كريم يوضحها لكل القراء و بالذات اللى ممكن يستفيد منها فى دخل مش بطال. مع خالص تحياتى

الموضوع اتعقد خالص وباظ سحب رخص وغرامات واحتجاز سيارات وكماين يعمل اوردر ويمسك العربيه
وبتوع التاكسى مولعينها وقفات احتجاجيه بحجه انه بيدفعوا ضرايب وبصراحه معاهم حق ...
ومع المواطن المصرى فى تركهم كل الحق

تقنين الاوضاع مسئلة ايام و بملحق السيارات الخاص بالاهرام اليوم شركة جديدة اسمها " أسطى" هتبدأ من اول مارس يعنى خلال بضعة ايام , من الواضح ان التاكسى الابيض يناضل بس بدون امل....الأ ... اذا طور من نفسه فالموضوع اشبه باستخدام التليفون ابو قرص دوار ( فيه اجيال مشفتهوش) و السمارت فون و الحل الوحيد ان التاكسى الابيض يبدل القرص الدوار ب لوحة مفاتيح عصرية ( كى بورد)

جربتها فى إسكندرية من أسبوعين .

الخدمة ( أقصد أوبر لإن كريم لسة مش موجود )ممتازة جدا بس يعيبها الآتي

1-الأسعار غالية مقارنة بالتاكسي بسبب إنهم بيحسبوا السعر بالكيلو (140 قرش ) زائد 28 قرش عن كل دقيقة للرحلة فطبعا ده بيخلي الأجرة عالية : المشوار بتاعي عمل 23 جنية رغم إن التاكسي العادي ياخد 10 جنية .

2- معندهمش ميزة حجز المشوار مقدما زى كريم بمعنى مثلا عايز أحجز لمشوار المطار بعد يومين .دي مش موجودة عندهم.

3-طبعا ساعات الذروة غالبا لا توجد سيارة متاحة بسبب نقص عدد السيارات عندهم . لكن مع الوقت تزيد

4- أسوأ شيىء عندهم تطبيق تعريفة ساعة الذروة حسب مبدأ العرض و الطلب .يعنى الطلب يزيد يرفع التعريفة علشان يشجع سواقين كتير ينزلوا يشتغلوا و بالتالى يرجع يقلل التعريفة لما تقل الطلبات . العملية دى فيها مكسب إضافى غير اللى بياخدوه


المميزات :
1- أدب و ذوق و إحترام السائقين عالى جدا لإنك بتتعامل مع إنسان متعلم مثقف مش عربجي أو بلطجي ضارب جل و مشغل ولاد سليم اللبانين و إتعلم إنك لو إديته قرش يطلب إتنين و يقولك هو فيه حد بيشتغل على العداد . (طيب إنت راكبها ليه .علشان تسرق الناس )

2-أطمن على نفسى و أولادى لو رايحين مشوار لإنى متابع خط سيرهم لحظة بلحظة على الخريطة و عارف رقم السيارة و إسم السائق .

3-رغم سعرها العالى أتمنى التوفيق ليهم و بصراحة أنا فرحان فى سواقين التاكسى