الموضوع: يوميات مواطن مصرى فى مبنى مرور طنطا الجديد المطور فى سبرباى لتجديد رخصة تسيير مركبة

اليوم الخامس فى مبنى المرور الجديد

توجهت صباح امس الى مبنى المرور للمرة الخامسه فى الساعه 8:30
لاقيت طابور محترم واقف قدام المبنى بس كان منظم نوعا ما عن اليوم السابق وبيتحرك
من على البوابه بتاخد رقم زى البنوك وشركات المحمول



وبمجرد دخولى عينى على الفور إلتقطت بعض الإيجابيات والتطور التى اتمنى ان تستمر وتتحسن للأفضل ولا يحدث فيها انتكاسه وبعض من السلبيات التى اتمنى تلاشيها فى المستقبل القريب

- المبانى جميلة جدا وفخمة من الداخل وفوجئت بتكييف شغال والجو بديع وفيه كراسى كتيره جدا للمواطنين للجلوس عليها وانتظار الساعه السعيدة التى سيتم نطق الرقم الخاص بسيادتكم
طبعا المكان مزدحم وفيه ضوضاء صاخبه بسبب الجمهور الكبير المتواجد والسيدة صاحبة الصوت العالى الشهيرة التى تنادى على أرقام العملاء ومدخنين زكموا انوفنا بسجائرهم اللعينة وللأسف المكان بيتوسخ رويدا رويدا بأعقاب السجائر
واستغربت ازاى المكان ده مفيهوش اى لوحات لمنع التدخين وغرامات على المدخنين خصوصا انه مغلق ومكيف أو حتى طفايات لأعقاب السجائر علشان متترميش على الأرض وربنا استجاب لأمنياتى وفوجئت وانا منتظر بفرد من أفراد الشرطة بيعلق لوحات ممنوع التدخين ولكن للأسف الناس اللى واقفين حواليه من جمهور المتعاملين أو حتى العاملين فى المرور بيضحكوا معاه وفى ايديهم السجائر ويتصاعد منها الدخان !!!

- من الايجابيات التى وجدتها ان الموظفين لابسين زى بلون موحد واعلى كل شباك موجود شاشة مضيئة بالرقم الذى سيتعامل معه الموظف وكانوا شغالين فى بيئة مناسبه ومريحة ليهم نوعا ما وفيه نظام عالى ومش بيتعامل الا مع العميل صاحب الرقم فقط مش الهرجله واللخبطة والعك اللى كان فى المبنى القديم وكان فيها موظفين كثر مخصصين لتجديد رخص التسيير والارقام كانت ماشيه بسلاسه وبسرعه نسبيه معقولة برغم الزحام الشديد ....فى المبنى القديم كان كل موظف مخصص له مجموعه من ارقام السيارات فكان من الطبيعى انك تلاقى موظف واقف قدامه 10 عملاء فى وقت واحد والتانى مفيش معاه شغل فى النظام الجديد كله شغال وبالرغم من انى انتظرت حوالى ساعة ونصف الا ان الاجراءات امام الموظف وامام الخزنة لدفع الضريبه وشراء النماذج واتمام الاوراق مأخدتش اكتر من ربع ساعه وتمت بسلاسه غير معهودة وبدون واسطه ولا محسوبيه وكنت منبهر جداً بهذه الجزئية تحديدا رغم معاناتى خلال الايام السابقة
ولكن ليا اقتراح للسادة المسئولين قد يفيد
لازمتها ايه تعامل المواطن مع الخزنة ؟ .. ليه اتعامل مع الخزنة ومع اللى بيبيع الاستمارات واللى بيبع الملفات !!!! ... ايه المانع ان العميل يتعامل مه موظف واحد فقط يكون عنده كل هذه الاوراق والمستندات وهو اللى يستلم منى الفلوس ويدينى الوصل ويبقى يحاسب الخزنة فى نهاية اليوم وبكده نوفر وقت اكتر ونحسن الخدمة أكثر
والكل يبقى مرتاح

- الضابط رئيس قسم الترخيص شاب شكله محترم برتبه رائد كان دائم الحركة فى وسط الجمهور وفى وسط الموظفين وبدت عليه العصبيه والتوتر الشديد كان بيرفض وبيصرخ فى وجه اى شخص بيحاول تخطى الدور وكان بيقول كله بالأرقام ومفيش حد احسن من التانى حتى ولو كان أمن دولة وأى موظف بيلاقيه متراخى او تسبب فى تكدس العملاء امامه كان بيهزقه امام الجميع وبيضغط عليه لإتمام عمله ... ولكن طبعا احنا فى مصر وفوجئت بشخص آخر بيزاحمنى فى دورى وتخطى دوره بورقه من سيادة الرائد !!!!

بعد اتمام الاوراق الموظفه قالتلى كده تمام وتنفست الصعداء ولكن الحلو مبيكملش كالعادة طباعة الرخص متوقفه بسبب انقطاع خدمة الانترنت عن مبنى المرور !!!!
فحضرتك هتنتظر حتى عودة النت وتشغيل الطابعة واستلام الرخصه
سألتها طيب ممكن امشى وابقى اجى آخر اليوم لاستلام الرخصة قالتلى ممكن على الساعه 1 الى 2 هتلاقيها جاهزة .. قولتلها مش ممكن تتأخر لبكره قالتلى لا هتاخدها النهاردة
قولتلها طيب علشان ادخل المبنى تانى هقف الطوابير الطويلة اللى تحت ديه تانى قالتلى خد رقمك وابقى ادخل بيه على طول
رجعت تانى الساعه الواحدة ظهراً فوجئت ان خدمة الانترنت لازالت معطله عن المرور !!
انتظرت حتى الساعه 2:30 مفيش فايده!!!

وانتهى اليوم الخامس بدون الحصول على الرخصة المنشوده
وكالعادة فوت علينا بكره ياسيد على ما النت يكون رجع ياخويا

الغريب ان خدمة الانترنت كانت شغاله على موبايلى وفى البيت بدون مشاكل
طيب اتفضلوا اطبعوها عندى

وكده بقيت ماشى بدون رخصة تسيير ومعرض فى أى لحظة للتوقف فى كمين وتطبيق القانون بغرامه وسحب رخصة القيادة أو سحب السيارة بالكامل
وربك اللى بيستر

********************************