انا بحب الصعيد اوي .. وبحب اتكلم عنه بمناسبة وغير مناسبة
وبكون سعيدة لما اتعرف على شخص ويطلع صعيدي خصوصا لو حسيت انه متفتح العقل والادراك
ليه؟؟!!
يمكن لاني صعيدية الاصل
بس هل ده سبب كافي؟؟!!!

طيب ما في ناس كتير صعايدة ومش عندهم نفس احساسي
بالعكس كمان بلاقي ناس حريصين ان محدش يعرف اصلهم

صحيح بابا الله يرحمه وماما ربنا يديها الصحة عاشوا طول عمرهم في القاهرة لكن صلتنا ببلدنا في الصعيد متقطعتش ابدا ومش هتتقطع بأذن الله
اللي بيشوفني انا او اي حد من اخواتي مش بيصدق اننا صعايدة ملامحنا مختلفة عن اهل الصعيد
مش معنى كدة اني اقصد اننا احلى
لكن يمكن علشان البيئة بتأثر في الشكل الخارجي للانسان مش بس في تكوينه الداخلي وتفكيره وادراكه للامور

لكنتي اللي بيسمعها بيحس فيها بشيء غريب
لكنتي كوكتيل قاهري على صعيدى على خليجي

بلدي بحس انها مميزة في كل حاجة عن اي قرية مجاورة ليها
ليا فيها ذكريات جميلة .. اجمل ايام طفولتي اللي قضيتها في البلد
ليا فيها مغامرات كتير تموت من الضحك

معرفش دخلت بقولكم الكلام ده ليه
مش عارفه ليه
بس حاسة بحنين جامد اوي للبلد مع اني كنت فيها من اقل من شهر

ايه رأيكم تحبوا نبدأ في سرد احداث هيكون فيها حاجات كتير ظريفه