برجاء النصيحة شركة محمول عاوزه تأجر 15 متر * 15 متر من الارض الزراعية

**medokemo75** · 15-03-2016 02:25 PM

السلم عليكم ورحمة الله وبركاته

عندنا قطعة ارض زراعية فيها منزل لوحده فى وسط الاراضى الزراعيه غير مأهول تم بناؤه من أكثر من 35 سنة
الأرض بنأجرها للمزارعين كل سنة وكنت بتمنى استغلالها فى نشاط آخر بجوار الزراعه عملنا توصيل كهرباء للمنزل لاستخدامه كمزرعه دواجن او ماشية أو اى نشاط آخر مناسب واتكلفنا تكاليف باهظة فى شراء اعمدة الانارة وتركيبها حتى توصيل الكهرباء الى المنزل من اقرب منطقة سكنية فيها كهرباء طبعا كل حاجه على حسابنا والدولة لا تتكلف اى شيئ

اليوم عدى مندوب من احدى شركات المحمول عاوز يأجر 15 متر * 15 متر من الارض الزراعية لاقامة برج محمول لمدة 15 سنة بسعر 18 ألف جنيه ايجار سنوى
مش عارف هو اختارنا احنا بالذات ليه ؟
هل علشان اعمدة الكهرباء رايحة للارض بتاعتنا ولا علشان فيه منزل وفيه حراسة داخل المنزل للحماية من السرقة ولا ايه ؟
ابراج المحمول بتاخد كهرباء من الشبكة ولا بيكون ليها مولدات خاصة ؟
انا كنت بسمع مبالغ خياليه اكبر من كده بكتير لإقامة هذه الابراج ؟
ايه رأيكم ياجماعه ؟
أنا معنديش فكره عن الموضوع ده ومعرفش ايه الاسعار والاتفاقات بتكون ازاى ؟
هل هذا المبلغ مناسب ولا اتفاوض معاه على مبلغ اكبر ولا ايه ؟

**3abdo.it** · 15-03-2016 03:15 PM

ياولاد النصابة

حبيب قلبى انا بنت خالتى برج راكب فوقيهم .. من خمس سنين دفعين لهم فى السنة 50000 وكل سنة بيزيدو 5000 يعنى دلوقتى بقو 55000 وواخدين خطوط ان ليمتد وانترنت وهدايا كل شوية تجيلهم من الشركة

دول نصابين خش فيهم شمال ولو ناوى ع الموضوع قولهم انا شركة تانية عرضت عليا بسعر 50000 فى السنة هيوافقو

**mk3** · 15-03-2016 05:36 PM

هو ليه احنا كمصريين اى حاجه بتبقى نصب ؟
االشركه عرضت وهو له حريه القبول او الرفض يعنى عرض وطلب ومحدش اجبره واكبر دليل الراجل جاى يستشيرنا...لو فى حاله مشابهه لارض زراعيه مش عماره قوله خدوها بكام

**عبدالله برعى** · 15-03-2016 06:32 PM

خد بتار الشعب

**A7medelfe2y** · 16-03-2016 01:53 AM

انا جالي شركتين فوداون وموبينيل وعايزين سطح البيت الدور الرابع
اول عرض لهم هما الاتنين كان 40000
وفودافون وصلتها ل60000 وانا طلبت 100000 سنويا والعقد مش فاكر كان 10 ولا 15 سنه والزياده 10%
بس انا عندي مخاوف من الموضوع دا لان سالت وعرفت انه له اضرار

**A.Saad** · 16-03-2016 09:27 AM

هما بياخدوا خط كهربا
وبيركبوا مولد لو الكهربا قطعت يأمن المحطة
وفيه تكييف بيركب برده سبليت تقريبا

ولان السرقة للمولد والمكيف انتشر بعد الثورة
بيجيبوا غفير لو المحطة متركبة فى ارض فاضية
فانت كدة موفر عليهم اجر الغفير كمان

**mif** · 16-03-2016 02:03 PM

المشاركة الأصلية كتبت بواسطة 3abdo.it

ياولاد النصابة

حبيب قلبى انا بنت خالتى برج راكب فوقيهم .. من خمس سنين دفعين لهم فى السنة 50000 وكل سنة بيزيدو 5000 يعنى دلوقتى بقو 55000 وواخدين خطوط ان ليمتد وانترنت وهدايا كل شوية تجيلهم من الشركة

دول نصابين خش فيهم شمال ولو ناوى ع الموضوع قولهم انا شركة تانية عرضت عليا بسعر 50000 فى السنة هيوافقو

البرج اللى بيتعمل على الارض ايجاره ارخص بكتير جدا
عن المرفوع على مبنى سكنى

لان مش اى حد بيوافق انه يقتل نفسه ببرج اتصلات فوق راسه

اعرف واحد حاطط برج فوق بيته (بقاله 20 سنة تقريبا ) و بيته 7 ادوار اخر 4 فاضيين و رغم ذلك ابنه (24 سنة ) اصيب بمرض مش معروف له علاقة بالمناعة و الاعصاب .

لكن الارض واسعة و اللى حيرفض عشرة حيقبلوا