موقف غريب حصل من التوكيل !

**Eng_Designer** · 23-03-2016 01:56 AM

طبعا زي ما كلنا دايما بننبهر بغبور وبانجازاته حصل النهارده موقف غريب

بعد ما العربية خلصت ف الصيانة ورايح استلمها مع مهندس الاستقبال بفتح العريبة مش بتفتح والمفتاح جوا

بيقولي ايه ده هيه قفلت لوحدها ! قلتله جهاز الانذار اللى مركبه اللى قفل العربية لو نزلت والباب مقفول بيقفل لوحده عشان لو نسيت

طيب والحل ؟ مفيش حل العربية مقفولة والموظفين خلصوا والساعة كانت 5 ونص تقريبا ومفيش غير عربيتي وكام موظف بيقفلوا وماشيين

قلتله ده المفتاح البديل ومفيش نسخه من جهاز الانذار عشان جايبه من برا

قالي طيب معلش بكره وهما معاهم علي حد كلامه "Tools" هيفتحوا بيها العربية علطول

قلتله تمام لسه خارج من البوابة لقيت اتوبيس غبور جاي منه 2 شكلهم حرامية كدا :D بيقولولي انت اللى عربيتك مقفولة ؟ قلتله اها قالي طيب تعالي معانا

رجعت تاني لموظف الاستقبال قالي خليك هنا ثوانى وهما دخلوا جوا الورشة وانا قلت اعمل عبيط واتكلم ف الموبايل وابص ع العربية من بعيد :D

هوب لقيت الموظف بيقولي تعالي نراجع الفاتورة ده فيه غلطه ف الخصم طبعا من كلامه حسيت انها اشتغالة المهم دخلت جوا مفيش "نص دقيقة" وسمعت الانذارين بتوع العربية الداخلي واللي متركب قلتله ع فكره العربية اتفتحت ولقيت الـ 2 اللي كانو سالوني انت صاحب العربية ولا لأ ماشيين من بعيد مروحين ومعاهم زي حديدة رفيعه طويلة او سلك معرفتش احدد بالظبط

المهم واحد زميله قاله كله تمام يا برنس اي خدمة ولقيته بيقولي خد الفاتورة تمام

ضحكتله قلتله مش محتاجه اشتغالة انا فاهم خصوصية حاجه زي كدا قلتله انا جايلكم بكره نكمل شغل العربية

خدت العربية وخلعت وفليت كل حاجه عند الباب عشان افهم اللي حصل ملقتش حتي خدتش !!!! ولا عند الازاز ولا فوق ولا تحت ولا مكان المفتاح ولا اي مكان ممكن تتخيلوه

السؤال هنا انا فاهم ان الفيرنا بطيخ ف السيكيورتي بتاعها بس ازاى ف ظرف نص دقيقة تتفتح العربية بالشكل ده ! ازاى الواحد ممكن ينام وهوه مطمن وفرحان بجهازين الانذار والعربية تفتح ف كام ثانية !

**mif** · 23-03-2016 03:23 AM

https://www.youtube.com/watch?v=GvqzSbdCEng

**volociximab** · 23-03-2016 09:51 AM

يمكن ده انذار ان حرامى محترف ممكن يفورلك العربية
امن العربية اكتر

**ali ashraf** · 23-03-2016 10:14 AM

اللى حصل مع حضرتك تمام زى اللى بيحصل مع الشركات و البنوك اللى بتتعامل مع "هكرز" برامج للبحث عن الثغرات الامنية للدخول على انظمتها على الكومبيوتر , بس موصلتش لسلك طويل و حته حديدة و كله تمام يا برنس .

**samihanwar** · 23-03-2016 10:16 PM

انت فى مصر ...انت فى أماااااااااااااااااان

**mizomizomizo** · 24-03-2016 02:18 AM

ولا غريبة ولاحاجة كل الي عملوة هوة ازاحة الباب بمفك وادخال حتتة السلك علي مسوجر الباب و شدة وفتح الباب شفتة قبل كدة وحدة نسيت المفتاح في العربية وجابت بتاع مفاتيح بسلكة طويلة و كان مفك حشروة بين الباب و السقف من الجنب ودخل السلك وقعد ينكش في المسوجر لفوق لحد ما فتحة مخدش في خمس دقائق وكان عربية علي ما اتذكر اكسينت ولا الهوي بدون مشاكل

**aboharf** · 24-03-2016 10:38 AM

شوف ياسيدياللي فتحوا العربيه كان معاهم حديده شكلها بيبقي زي المسطره بس طويله و اخرها متني تنيه بسيطه
يقوم الأخ مدخل المسطره الحديد في جنب قزاز شباك العربيه ناحيه القفل يعني بين القزاز وصاح الباب بحيث تكون التنيه لتحت وللداخل ناحيه القفل ويروح ساحب المسطره لفوق يقوم التنيه شابكه في القفل من تحت وترفعه

**GAMAL DAWOOD** · 24-03-2016 10:50 AM

السلام عليكم

أسمحوا لى أن أحكى عن شيئ مماثل حدث لى

أنا عربيتى أوبل أسترا قديمة (2003) . فى يوم رجعت للمنزل و عند فتح السيارة لاحظت قطع كاوتش الشباك من الناحيتين حوالى 1 سم مع أثار كحت لبوية الباب من الداخل من الناحيتين و لاحظت نفس أثار الكحت عند الشنطة مما دل على محاولات متكررة لفتح السيارة بطريقة (رجالة البرنس) و لكن الفشل كان من نصيب ذلك الحرامى و لله الحمد علما بأننى لا أضع أية أجهزة إنذار.

ربنا ينجى الجميع